أصوات العراق

رێكخراوه‌كانی‌ كۆمه‌ڵگه‌ی‌ مه‌ده‌نی‌ له‌ كوردستان داوا له‌ ئێران ده‌كه‌ن له‌سێداره‌دانی‌ چالاكه‌وانه‌ كورده‌كان رابگرێت

5ahab — Sun, 23 Jan 2011 13:26:00 GMT

هه‌ولێر/ ئه‌سوات ئه‌لعیراق: ژماره‌یه‌ك له‌ نوێنه‌رانی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌ له‌ كوردستان، یه‌كشه‌ممه‌، یاداشتێكی ناڕه‌زاییان ئاراسته‌ی‌ كونسوڵگه‌ریی‌ گشتیی‌ ئێران كرد له‌ هه‌ولێر‌و تێیدا داوایان له‌ حكومه‌تی‌ ئه‌و وڵاته‌ كرد هه‌ڵمه‌تی‌ له‌سێداره‌دانی‌ چالاكه‌وانه‌ سیاسییه‌ كورده‌كان رابگرێت.

سه‌رۆكی‌ یه‌كێیتی‌ رێكخراوه‌ ناحكومییه‌كان له‌ كوردستان عه‌دنان ئه‌نوه‌ر به‌گ له‌گه‌ڵ هاتنه‌ده‌ره‌وه‌ی‌ له‌ كونسوڵگه‌ریی‌ ئێران له‌ هه‌ولێر، له‌ لێدوانێكدا به‌ رۆژنامه‌نوسانی‌ راگه‌یاند "ئێمه‌ وه‌ك نوێنه‌رانی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌ له‌ كوردستان یاداشتێكی‌ ناڕه‌زاییمان دایه‌ كونسوڵگه‌ریی‌ ئێران بۆ گه‌یاندنی‌ ده‌نگی‌ هاوڵاتیانی‌ كوردستان به‌ به‌رپرسانی‌ ئێران بۆ راگرتنی‌ ئه‌و هه‌ڵمه‌تی‌ له‌سێداره‌دانه‌ی‌ له‌ ئێستادا له‌ ئێران دژ به‌ چالاكه‌وانه‌ سیاسییه‌كان به‌ڕێوه‌ده‌چێت".

ناوبراو ئاماژه‌ی‌ به‌وه‌شدا كه‌ له‌ یاداشته‌كه‌دا داوایان كردووه‌ "ئه‌و هه‌ڵمه‌تی‌ له‌سێداره‌دانه‌ له‌ ئێران رابگیرێت‌و بوار بدرێته‌ چالاكه‌وانه‌ سیاسییه‌كان به‌ ئازادی‌ كاربكه‌ن‌و كێشه‌كانیان له‌گه‌ڵدا چاره‌سه‌ر بكرێت به‌بێ‌ ئه‌وه‌ی‌ له‌سێداره‌بدرێن".

یه‌كێتیی‌ رێكخراوه‌ ناحكومییه‌كان له‌ كوردستان زیاتر له‌ 150 رێكخراوی‌ كۆمه‌ڵگه‌ی‌ مه‌ده‌نی‌ له‌ هه‌رێمی‌ كوردستان له‌خۆده‌گرێت، یه‌كێتییه‌كه‌ مانگێك له‌مه‌وبه‌ریش هه‌ڵمه‌تێكی‌ هاوشێوه‌ی‌ بۆ هه‌مان مه‌به‌ست رێكخست.
(خ/ت) – ع ع

تاڵه‌بانی‌ له‌گه‌ڵ ئه‌ندامانی‌ ده‌ستپێشخه‌ری‌ مه‌ده‌نی‌ بۆ پاراستنی‌ ده‌ستوور كۆبووه‌وه‌

jamal — Tue, 25 Jan 2011 16:21:00 GMT

به‌غدا/ئه‌سوات ئه‌لعێراق: سه‌رۆك كۆماری‌ عێراق جه‌لال تاڵه‌بانی‌، رۆژی‌ سێشه‌ممه‌، له‌گه‌ڵ ئه‌ندامانی‌ ده‌ستپێشخه‌ری‌ مه‌ده‌نی‌ بۆ پاراستنی‌ ده‌ستووردا بارودۆخی‌ رێكخراوه‌كانی‌ كۆمه‌ڵگای‌ مه‌ده‌نیان تاوتوێكرد، به‌پێی‌ به‌یاننامه‌یه‌كی‌ سه‌رۆكایه‌تی‌.

به‌یاننامه‌كه‌ وێنه‌یه‌كی‌ نێردراوه‌ بۆ ئاژانسی‌(ئه‌سوات ئه‌لعێراق)‌و تێیدا هاتووه‌ كه‌ "تاڵه‌بانی‌ له‌میانی‌ كۆبونه‌وه‌كه‌دا به‌ وردی‌ گوێی‌ له‌ وته‌ی‌ ئه‌ندامانی‌ ده‌ستپێشخه‌ری‌ مه‌ده‌نی‌ بۆ پاراستنی‌ ده‌ستوور گرت، كه‌ تایبه‌ت بوون به‌ كاره‌كانی‌ ده‌ستپێشخه‌ری‌ ناوبراو‌و چاڵاكییه‌كانی‌ رێكخراوه‌كانی‌ كۆمه‌ڵگای‌ مه‌ده‌نی‌ له‌چه‌ند مانگی‌ رابردوودا".

به‌پێی‌ به‌یاننامه‌كه‌ "ئه‌ندامه‌كان ئاماژه‌یان به‌و به‌ربه‌ست‌و رێگرییانه‌ داوه‌ كه‌ دێنه‌ به‌رده‌م كاره‌كانیان‌و له‌مباره‌یه‌شه‌وه‌ نیگه‌رانی‌ خۆیان ده‌ربڕیوه‌، هاوكات ئاره‌زووی‌ خۆیان نیشانداوه‌ له‌ هه‌وڵدان بۆ كۆتاییهێنان به‌ بارودۆخی‌ خراپی‌ ئه‌منی‌‌و خزمه‌تگوزاریی‌ وڵات".

له‌به‌یاننامه‌كه‌دا ئه‌وه‌شهاتووه‌ كه‌ "له‌م كۆبونه‌وه‌یه‌دا یاداشتنامه‌یه‌ك دراوه‌ به‌ تاڵه‌بانی‌ سه‌باره‌ت به‌ داواكارییه‌كانیان، لای‌ خۆشییه‌وه‌ تاڵه‌بانی‌ به‌ڵێنی‌ پێداون پاڵپشتی‌ ته‌واویان بكات له‌چوارچێوه‌ی‌ ده‌ستووردا، به‌شێوه‌یه‌ك كه‌ ببێته‌ هۆی‌ پته‌وكردنی‌ كاری‌ كۆمه‌ڵگای‌ مه‌ده‌نی‌".
س خ(ب/ع)- ج پ

كۆنگره‌یه‌كی‌ نێوده‌وڵه‌تی‌ سه‌باره‌ت به‌ رۆڵی‌ ژن له‌ هێنانه‌كایه‌ی‌ ئاشتی‌‌و ئاشتببونه‌وه‌ له‌ هه‌ولێر سازده‌كرێت

jamal — Sun, 23 Jan 2011 16:59:00 GMT

هه‌ولێر/ئه‌سوات ئه‌لعێراق: له‌كۆتایی‌ ئه‌م مانگه‌دا به‌ ئاماده‌بوونی‌ ژماره‌یه‌كی‌ گه‌وره‌ی‌ كه‌سایه‌تییه‌ نێوده‌وڵه‌تیی‌‌و ناوخۆییه‌كان یه‌كه‌مین كۆنگره‌یه‌كی‌ نێوده‌وڵه‌تی‌ سه‌باره‌ت به‌ "رۆڵی‌ ژن له‌ بونیادنانی‌ ئاشتی‌‌و ئاشتببونه‌وه‌" له‌ هه‌ولێر سازده‌كرێت، به‌پێی‌ لێدوانی‌ به‌ڕێوبه‌ری‌ رێكخستنی‌ كۆنگره‌كه‌.

له‌مباره‌یه‌وه‌ به‌ختیار ئه‌مین كه‌ وه‌زیری‌ پێشووتری‌ مافی‌ مرۆڤی‌ عێراق بووه‌‌و دامه‌زرێنه‌ری‌ "هاوپه‌یمانی‌ نێوده‌وڵه‌تیی‌ له‌پێناو دادپه‌روه‌رییه‌"‌و رێكخه‌ری‌ كۆنگره‌كه‌یه‌، به‌ ئاژانسی‌(ئه‌سوات ئه‌لعێراق)ی‌ وت "كۆنگره‌كه‌ له‌ رۆژانی‌ 27‌و 28ی‌ مانگی‌ كانونی‌ دووه‌م له‌ هۆڵی‌ سه‌عد عه‌بدوڵلا به‌ ئاماده‌بوونی‌ 100 كه‌سایه‌تی‌ په‌ڕله‌مانی‌‌و نوێنه‌رانی‌ ئه‌نجومه‌نی‌ پارێزگاكان‌و چه‌ند كه‌سایه‌تیه‌كی‌ دیاری‌ ژنان له‌ رێكخراوه‌كانی‌ كۆمه‌ڵگای‌ مه‌ده‌نی‌‌و ئه‌كادیمیست‌و سیاسیی‌‌و دیپلۆماتكاران‌و نوێنه‌رانی‌ هه‌ردوو حكومه‌تی‌ به‌غدا‌و هه‌ولێر‌و باڵیۆزه‌كانی‌ نه‌ته‌وه‌ یه‌كگرتووه‌كان‌و كۆمكاری‌ عه‌ره‌بی‌‌و رێكخراوی‌ كۆنگره‌ی‌ ئیسلامی‌ به‌ڕێوه‌ده‌چێت".

ئاماژه‌شیدا به‌وه‌ی‌ كه‌ "بابه‌ته‌كانی‌ كۆنگره‌كه‌ بریتیی‌ ده‌بن له‌ ته‌وه‌ره‌كانی‌ ژن‌و به‌شداری‌ سیاسیی‌، یه‌كسانی‌ له‌به‌رامبه‌ر یاسا، ده‌روه‌ازه‌یه‌ك بۆ دادپه‌روه‌ری‌، ئاشته‌وایی‌‌و لێپرسینه‌وه‌‌و توندوتیژی‌ له‌سه‌ر بنه‌مای‌ جێنده‌ر، ژن له‌ ژیانی‌ گشتیی‌‌و دامه‌زراوه‌كاندا، هه‌روه‌ها پرسی‌ هه‌مواركردنه‌ یاساییه‌كانی‌ په‌یوه‌ست به‌ ژنان‌و چاكسازییه‌ په‌روه‌رده‌یی‌و فێركردنه‌كان‌و تواناسازی‌ ئافره‌تانیش تاوتوێده‌كرێن".

وتیشی‌ "له‌ كۆنگره‌كه‌دا دانیشتنێكی‌ ستراتیژیی‌ بۆ كاری‌ داهاتوو ده‌به‌سترێت‌و پاشان لیژنه‌یه‌ك به‌مه‌به‌ستی‌ داڕشتنی‌ راسپارده‌كان پێكده‌هێنرێت".

روونیشیكرده‌وه‌ كه‌ "كۆنگره‌كه‌ له‌لایه‌ن رێكخراوه‌كانی‌ "به‌ بێ‌ دادپه‌روه‌ری‌ ئاشتی‌ نایه‌ته‌دی‌، دامه‌زراوه‌ی‌ ئاینده‌، دامه‌زراوه‌ی‌ وێست مینیسته‌ری‌ ناحكومی‌ به‌ریتانی‌‌و رێكخراوه‌كه‌ی‌‌و نوێنه‌رانی‌ حكومه‌تی‌ ئیتالی‌".

هه‌روه‌ها وتی‌ "داوه‌تنامه‌ بۆ چه‌ندین كه‌سایه‌تی‌ نێردراوه‌ له‌ چه‌ندین وڵاتی‌ جیاجیا، وه‌ك به‌ڕێوبه‌ری‌ كۆمیسیۆنی‌ مافه‌كانی‌ مرۆڤی‌ ئه‌فغانستان‌و سربیا‌و كۆسۆڤۆ‌و وڵاتانی‌ به‌ڵقان‌و په‌ڕله‌مانی‌ ئه‌وروپی‌‌و ئێرله‌ندا‌و جێگری‌ سه‌رۆكی‌ ئه‌نجومه‌نی‌ پیرانی‌ ئیتالیا‌و سویسرا كه‌ شاره‌زاییان له‌ ئه‌زموونی‌ پلوڕالی‌(فره‌یی)دا هه‌یه‌، هه‌روه‌ها دامه‌زراوه‌كانی‌ تایبه‌ت به‌ ژنانی‌ وڵاتانی‌ نه‌رویج‌و دانیمارك‌و سوید‌و وڵاتانی‌ ئه‌فریقیی‌ ئۆگه‌ندا‌و سیرالیۆن‌و كینیا‌و لوبنان، هه‌روه‌ها وه‌زیری‌ ده‌ره‌وه‌ی‌ پێشووی‌ ئه‌رده‌ن‌و تونس‌و مه‌غریب‌و میسر‌و فه‌ڵه‌ستین‌و وڵاتانی‌ كه‌نداو‌و یه‌مه‌ن‌و په‌ڕله‌مانی‌ كوێت‌و ژه‌نه‌ڕال كاراری‌ به‌ڕێوبه‌ری‌ هێزه‌كانی‌ ناتۆ له‌ كۆسۆڤۆ‌و یابان".
س خ(مق/ع)- ج پ

یه‌كێتیی‌ مامۆستایان: ئه‌و تانانه‌ی دژ به‌ هه‌ڵبژاردنه‌كانی‌ مامۆستایان به‌رزكرانه‌وه‌ هیچ كاریگه‌ریان نه‌بوو به‌سه‌ر ئه‌نجامه‌كانه‌وه‌

Tue, 21 Dec 2010 19:07:00 GMT

هه‌ولێر/ئه‌سوات ئه‌لعێراق: سه‌رۆكی لیژنه‌ی باڵای هه‌ڵبژاردنی نوێنه‌رانی كۆنگره‌ی یه‌كێتیی مامۆستایانی كوردستان، رۆژی‌ سێشه‌ممه‌، رایگه‌یاند ئه‌و تانانه‌ی دژ به‌ هه‌ڵبژاردنه‌كانی‌ مامۆستایان به‌رزكرانه‌وه‌ هیچ كاریگه‌ریان نه‌بوو به‌سه‌ر ئه‌نجامه‌كانه‌وه‌.

جه‌لال هه‌مزه‌ كاكه‌شین له‌كۆنگره‌یه‌كی رۆژنامه‌وانیدا كه‌ له‌ته‌ڵاری یه‌كێتیه‌كه‌ له‌شاری هه‌ولێر به‌ڕێوه‌چوو، تێیدا ئاژانسی‌(ئه‌سوات ئه‌لعێراق)ئاماده‌یبوو، وتی‌" هه‌ڵبژاردنی نوێنه‌رانی كۆنگره‌ی داهاتووی یه‌كێتیی مامۆستایانی كوردستان هه‌ڵبژاردنێكی سه‌ركه‌توو بوو، ئه‌و تانانه‌ی له‌هه‌ڵبژاردنه‌كان گیران هیچ كاریگه‌ریان نه‌بوو به‌سه‌ر ئه‌نجامی هه‌ڵبژاردنه‌كانه‌وه‌".

هه‌ر له‌كۆنگره‌ رۆژنامه‌وانیه‌كه‌دا عه‌بدولواحید محه‌مه‌د حاجی بڕیارده‌ری لیژنه‌ی بالاَی هه‌ڵبژاردن ڕایگه‌یاند لیسته‌كانی "كوردستانی 243كورسی، مامۆستایانی سه‌رده‌م 66 كورسی، یه‌كگرتوو 57 كورسی، كۆمه‌ڵ 36كورسی، پیشه‌یی 8كورسی، سه‌ربه‌خۆ 9 كورسی زه‌حمه‌تكێشان 3 كورسی له‌سه‌رتاسه‌ری هه‌رێمی كوردستان به‌ده‌ستهێناوه‌".

ئاماژه‌یبه‌وه‌شدا كه‌ "له‌كۆی ئه‌م كورسیانه‌ی به‌ده‌ست هاتوون 136 یان له‌هه‌ولێر ‌و 122 یان له‌سلێمانی‌و 76یان له‌دهۆك‌و 47یان له‌گه‌رمیان‌و 32یان له‌كه‌ركوك‌و ته‌نها پێنج كورسیشیان له‌ موسڵه‌وه‌ بوون".. وتیشی" 418 نوێنه‌ر به‌شداری له‌كۆنگره‌ی داهاتوو ده‌كه‌ن، له‌گه‌ڵ 10كورسی كۆتا بۆ توركمانه‌كان و 15بۆ كلدۆ ئاشوریه‌كان‌و 117ی‌ دیكه‌ش له‌وانه‌ی‌ كه‌ ئه‌ندامی شه‌ش ده‌سته‌ی‌ رابردووی‌ یه‌كێتی مامۆستایان ".

جێی‌ باسه‌ هه‌ڵبژاردنی‌ یه‌كێتیی‌ مامۆستایانی‌ كوردستان رۆژی‌ پێنجشه‌ممه‌ی‌ رێكه‌وتی‌ 2/12/2010 ئه‌نجامدرا‌و تێیدا له‌ كۆی‌ 100180 ده‌نگده‌ردا لیستی‌ مامۆستایانی‌ كوردستان به‌ پله‌ی‌ یه‌كه‌م 57,740 ده‌نگ‌و لیستی‌ مامۆستایانی‌ سه‌رده‌م به‌ پله‌ی‌ دووه‌م 15,705 ده‌نگ‌و لیستی‌ مامۆستایانی‌ یه‌كگرتووی‌ ئیسلامی‌ به‌ پله‌ی‌ سێیه‌م 13,605 ده‌نگیان به‌ده‌ستهێنا، هه‌روه‌ها لیستی‌ مامۆستایانی‌ كۆمه‌ڵی‌ ئیسلامی‌ 8,366 ده‌نگ‌و مامۆستایانی‌ زه‌حمه‌تكێشان 698 ده‌نگ‌و لیستی‌ توركمان260 ده‌نگیان به‌ده‌ستهێناوه‌‌و ده‌نگه‌كانی‌ تریش دابه‌شكرابوونه‌ سه‌ر لیستی‌ توركمانی‌ هه‌ولێری‌‌و ئاشورییه‌كان. \

یه‌كێتیی‌ مامۆستایانی‌ كوردستان رێكخراوێكی‌ پیشه‌ییه‌‌و له‌ ساڵی‌ 1962 دامه‌زراوه‌.

ف م(م)- ج پ

خۆپیشاندانێك له‌به‌رده‌م په‌ڕله‌مانی‌ كوردستان دژ به‌ یاسایی‌ رێكخستنی‌ خۆپیشاندانه‌كان رێكخرا

Tue, 04 Jan 2011 14:25:00 GMT

هه‌ولێر/ئه‌سوات ئه‌لعێراق: خۆپیشاندانێك، رۆژی‌ سێشه‌ممه‌، وه‌ك ناڕه‌زاییه‌ك به‌رامبه‌ر به‌تێپه‌ڕاندنی‌ یاسای‌ رێكخستنی‌ خۆپیشاندانه‌كان له‌به‌رده‌م په‌ڕله‌مانی‌ كوردستان رێكخرا. ئاژانسی‌(ئه‌سوات ئه‌لعێراق) له‌ناو ئاپۆرای‌ خۆپیشاندانه‌كه‌ ئاماده‌بوو، تێیدا خۆپیشانده‌ران دروشمی‌(نا بۆ یاسای‌ خۆپیشانانه‌كان)یان به‌رزكردبووه‌وه‌‌و له‌ پاركی‌ شانه‌ده‌ره‌وه‌ به‌ ئاراسته‌ی‌ په‌ڕله‌مانی‌ كوردستان هه‌نگاویان نا‌و چه‌ند دروشمێكی‌ تریشیان به‌رزكردبوه‌وه‌ له‌وانه‌(په‌سه‌نكدرنی‌ یاسای‌ خۆپیشاندان له‌سێداره‌دانی‌ ئازادییه‌كانه‌ له‌ هه‌رێمی‌ كوردستان)‌و(به‌ڵی‌ بۆ هه‌مواركردنه‌وه‌ی‌ یاساكه‌). له‌مباره‌یه‌وه‌ نیاز عه‌بدوڵلا یه‌كێك له‌ رێكخه‌رانی‌ خۆپیشاندانه‌كه‌ وتی‌ "ئێمه‌ جارێكی‌ تریش له‌گه‌ڵ په‌ڕله‌مانی‌ كوردستاندا كۆده‌بینه‌وه‌ تاكو ناچاری بكه‌ین یاسای‌ ژماره‌ 11ی‌ رێكخستنی‌ خۆپیشاندانه‌كان هه‌مواربكاته‌وه‌، به‌شێوه‌یه‌ك كه‌ له‌گه‌ڵ پره‌نسیپه‌ نێوده‌وڵه‌تییه‌كانی‌ ئازادی‌ راده‌ربڕین‌و ده‌ستوری‌ عێراقی‌و ره‌شنوسی‌ ده‌ستوری‌ هه‌رێمی‌ كوردستان بگونجێت". وتیشی‌ "خۆپیشانده‌ران ناڕه‌زایی‌ به‌رامبه‌ر چه‌ند بڕگه‌یه‌كی‌ یاساكه‌ ده‌رده‌بڕن، له‌وانه‌ وه‌رگرتنی‌ مۆڵه‌تی‌ پێشوه‌خته‌ بۆ رێكخستنی‌ خۆپیشاندان‌و له‌مباره‌یه‌شه‌وه‌ زیاتر له‌ هه‌زار ئیمزامان كۆكردۆته‌وه‌‌و راده‌ستی‌ په‌ڕله‌مانی‌ ده‌كه‌ین بۆ هه‌ڵوه‌شاندنه‌وه‌‌و ره‌تكردنه‌وه‌ی‌ یاساكه‌". جێی‌ باسه‌ یاساكه‌ رۆژی‌ 12/12/2010 له‌لایه‌ن سه‌رۆكی‌ هه‌رێمی‌ كوردستان مه‌سعود بارزانییه‌وه‌ په‌سه‌ندكرا، دوای‌ ئه‌وه‌ی‌ پێشتر ره‌زامه‌ندی‌ په‌ڕله‌مانی‌ كوردستانی‌ به‌ده‌ستهێنابوو. ك ن م(خ/ع)- ج پ

به‌هۆی‌ خۆپیشاندانێكی‌ ناڕه‌زاییه‌وه‌ رێگای‌ سه‌ره‌كی‌ نێوان هه‌ولێر‌و كه‌ركوك داخرا

jamal — Mon, 17 Jan 2011 15:35:00 GMT

كه‌ركوك/ئه‌سوات ئه‌لعێراق: ده‌یان كه‌س له‌ دانیشتوانی‌ ناحیه‌ی‌ ئاڵتون كوپری‌، رۆژی‌ دووشه‌ممه‌، خۆپیشاندانێكی‌ ناڕه‌زاییان دژ به‌ بڕانی‌ كاره‌با ئه‌نجامدا‌و به‌هۆیه‌وه‌ رێگای‌ سه‌ره‌كی‌ نێوان هه‌ردوو پارێزگای‌ هه‌ولێر‌و كه‌ركوك داخرا.

له‌مباره‌یه‌وه‌ محه‌مه‌د عه‌لی‌ ئه‌حمه‌د یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "خۆپیشاندانه‌كه‌ له‌لایه‌ن دانیشتوانی‌ ئاڵتون كوپریی(35كم باكوری‌ خۆرهه‌ڵاتی‌ كه‌ركوك) رێكخراوه‌، وه‌ك ناڕه‌زاییه‌ك له‌به‌رامبه‌ر بڕانی‌ كاره‌با له‌ماوه‌ی‌ ئه‌م مانگه‌دا".

وتیشی‌ "داوا له‌ ئیداره‌ی‌ پارێزگای‌ كه‌ركوك ده‌كه‌ین چاره‌سه‌رێكی‌ دادپه‌روه‌رانه‌ بۆ ئه‌م گرفته‌ بدۆزێته‌وه‌".
له‌مباره‌یه‌وه‌ عه‌مید سه‌رحه‌د قادر به‌ڕێوبه‌ری‌ پۆلیسی‌ قه‌زا‌و ناحییه‌كانی‌ كه‌ركوك به‌(ئه‌سوات ئه‌لعێراق)ی‌ وت "هیچ پێشێلكارییه‌ك رووینه‌داوه‌‌و خۆپیشانده‌رانیش به‌دانانی‌ تایه‌ی‌ ئۆتۆمبێل‌و به‌رد رێگای‌ سه‌ره‌كی‌ نێوان كه‌ركو‌و هه‌ولێرییان گرتووه‌‌و نه‌یانهێشتووه‌ ئۆتۆمبێڵ هاتوچۆ بكات".

وتیشی‌ "هێزه‌كانی‌ پۆلیس ناوچه‌كه‌یان گه‌مارۆداوه‌ بۆ رێگه‌گرتن له‌هه‌ر كارێكی‌ تێكده‌رانه‌".
ك ك(خ/ع)- ج پ

كه‌سوكاری‌ شه‌هیدانی‌ چه‌مچه‌ماڵ له‌ خۆپیشاندانێكدا داوای‌ ته‌رخانكردنی‌ زه‌وی‌ نیشته‌جێبونیان كرد

Sun, 09 Jan 2011 16:45:00 GMT

هه‌ولێر/ئه‌سوات ئه‌لعێراق: ده‌یان كه‌س له‌ كه‌سوكاری‌ شه‌هیدانی‌ قه‌زای‌ چه‌مچه‌ماڵ، رۆژی‌ یه‌كشه‌ممه‌، له‌به‌رده‌م باڵه‌خانه‌ی‌ وه‌زاره‌تی‌ شاره‌وانی‌‌و گه‌شتوگوزاری‌ هه‌رێمی‌ كوردستان له‌ شاری‌ هه‌ولێر له‌خۆپیشاندانێكدا داوای‌ دابینكردنی‌ زه‌وی‌ نیشته‌جێبونییان كرد. له‌مباره‌یه‌وه‌ حه‌مه‌د ئه‌مین یه‌كێك له‌به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "خۆپیشانده‌ران داوا ده‌كه‌ن حكومه‌ت به‌ڵێنی‌ خۆی‌ جێبه‌جێبكات له‌دابینكردنی‌ زه‌وی‌ نیشته‌جێبوون بۆ كه‌سوكاری‌ شه‌هیدان". روونیشیكرده‌وه‌ كه‌ "خۆپیشانده‌ران نوێنه‌رایه‌تی‌ 162 خێزانی‌ شه‌هیدان ده‌كه‌ن له‌ سنوری‌ قه‌زای‌ چه‌مچه‌ماڵی‌ سه‌ر به‌ پارێزگای‌ سلێمانی‌، پێشتریش ره‌زامه‌ندی‌ وه‌زاره‌تی‌ شه‌هیدان‌و ئه‌نفالكراوه‌كانیان به‌ده‌ستهێناوه‌ بۆ ته‌رخانكردنی‌ 200م زه‌وی‌ بۆ هه‌ر خێزانێك، به‌ڵام تا ئێستا وه‌زاره‌تی‌ شاره‌وانی‌ ره‌زامه‌ندی‌ نیشان نه‌داوه‌". خۆپیشانده‌رێكی‌ تریش له‌م نێوانه‌دا باسی‌ له‌ بارودۆخی‌ خێزانه‌كان كرد‌و وتی‌ "ئێمه‌ له‌ بارودۆخێكی‌ سه‌ختدا ژیان به‌سه‌رده‌به‌ین‌و ره‌زامه‌ندی‌ وه‌زاره‌تی‌ شه‌هیدانمان هێناوه‌ كه‌ هاوكات ره‌زامه‌ندی‌ ئه‌نجومه‌نی‌ وه‌زیرانیشی‌ له‌گه‌ڵدایه‌ بۆ وه‌رگرتنی‌ پارچه‌ زه‌وی‌، به‌ڵام وه‌زاره‌تی‌ شاره‌وانی‌ تا ئێستا ره‌زامه‌ندی‌ نیشان نه‌داوه‌، بۆیه‌ ئه‌م خۆپیشاندانه‌مان رێكخستوه‌". لای‌ خۆشییه‌وه‌ سه‌میر عه‌بدوڵلای‌ وه‌زیری‌ شاره‌وانی‌‌و گه‌شتوگوزار پێشوزای‌ له‌ خۆپیشانده‌ران كرد‌و به‌ڵێنی‌ پێدان ئه‌م بابه‌ته‌ چاره‌سه‌ر بكات‌و وتی‌ "نووسراوێكی‌ فه‌رمی‌ بۆ شاره‌وانی‌ سلێمانی‌ به‌مه‌بستی‌ لێكۆڵینه‌وه‌ له‌ بابه‌ته‌كه‌، تا ده‌ركه‌وێت بۆچی‌ تا ئێستا زه‌وی‌ بۆ ئه‌م خێزانانه‌ دابین نه‌كراوه‌". ك ن م(خ/ع)- ج پ

هه‌ولێر ...كۆنگره‌ی‌ نێوده‌وڵه‌تیی‌ رۆڵی‌ ئافره‌ت له‌ بنیاتنانی‌ ئاشتیدا ده‌ستیپێكرد

5ahab — Thu, 27 Jan 2011 12:44:00 GMT

هه‌ولێر/ ئه‌سوات ئه‌لعیراق: پێشنیوه‌ڕۆی‌ پێنجشه‌ممه‌ كۆنگره‌ی‌ نێوده‌وڵه‌تیی‌ رۆڵی‌ ئافره‌ت له‌ بنیاتنانی‌ ئاشتی‌‌و ئاشته‌واییدا له‌ هه‌ولێر ده‌ستپێكرد‌و ئاماده‌بوونێكی‌ ره‌سمی‌‌و مه‌ده‌نیی‌ به‌رفروانی‌ له‌سه‌ر ئاستی‌ جیهانی‌‌و هه‌رێمی‌‌و ناوخۆیی‌ به‌خۆه‌وه‌ بینی‌.

كۆنگره‌كه‌ كه‌ ئاژانسی‌ (ئه‌سوات ئه‌لعیراق) ئاماده‌ی‌ بوو، له‌ هۆڵی‌ شه‌هید سه‌عد عه‌بدوڵا له‌ هه‌ولێر ده‌ستی‌ به‌ كاره‌كانی‌ كرد، تێیدا سه‌رۆكی‌ په‌رله‌مانی‌ كوردستان دكتۆر كه‌مال كه‌ركوكی‌ له‌ وته‌یه‌كدا پێشوازیی‌ له‌ ئاماده‌بووان كرد كه‌ له‌ چه‌ندین وڵاتی‌ جیهانه‌وه‌ هاتبوون.

كۆنگره‌كه‌، كه‌ بۆ ماوه‌ی‌ دوو رۆژ به‌رده‌وام ده‌بێت، رۆڵی‌ ئافره‌ت له‌ پرۆسه‌ی‌ سیاسی‌و هه‌موراكردنی‌ یاساكاندا تاووتوێ‌ ده‌كات به‌شێوه‌یه‌ك كه‌ خزمه‌ت به‌ پرۆسه‌ی‌ دیموكراسی‌ بكات له‌ عێراق.

جێی‌ ئاماژه‌یه‌ ژماره‌یه‌ك له‌ ئه‌ندامانی‌ په‌رله‌مانی‌ عێراق‌و په‌رله‌مانی‌ كوردستان ئاماده‌ی‌ كۆنگره‌كه‌ بوون، جگه‌ له‌ چه‌ندین كه‌سایه‌تیی‌ نێوده‌وڵه‌تی‌ له‌ ئافره‌تان‌و ژماره‌یه‌ك له‌ چالاكه‌وانانی‌ بواری‌ مافه‌كانی‌ ئافره‌ت‌و نوێنه‌ری‌ رێكخراوه‌ جیهانییه‌كان.
(خ/ت) – ع ع

مێلكه‌رت: به‌داخه‌وه‌ین كه‌ حكومه‌تی‌ نوێی‌ عێراق ژنی‌ تێدا نییه‌

5ahab — Thu, 27 Jan 2011 13:49:00 GMT

هه‌ولێر/ ئه‌سوات ئه‌لعیراق: نوێنه‌ری‌ تایبه‌تی‌ ئه‌مینداری‌ گشتیی‌ نه‌ته‌وه‌ یه‌كگرتووه‌كان له‌ عێراق ئاد مێلكه‌رت، پێنجشه‌ممه‌، نیگه‌رانیی‌ خۆی‌ نیشان دا له‌ نه‌بوونی‌ نوێنه‌رایه‌تیی‌ ژن له‌ حكومه‌تی‌ نوێی‌ عێراقدا، به‌ پێویستیشی‌ زانی‌ ژنان هاوشانی‌ پیاوان له‌ به‌ڕێوه‌بردنی‌ وڵاتدا به‌شداربن.

مێلكه‌رت له‌ وته‌یه‌كدا له‌ كۆنگره‌ی‌ نێوده‌وڵه‌تیی‌ رۆڵی‌ ژناندا له‌ هه‌ولێر كه‌ ئاژانسی‌ (ئه‌سوات ئه‌لعیراق) ئاماده‌ی‌ بوو، وتی‌ "له‌ په‌نجاكانی‌ سه‌ده‌ی‌ رابردوودا ژنی‌ عێراقی‌ له‌ پێكهێنانی‌ حكومه‌تدا به‌شداربووه‌ به‌ڵام به‌ داخه‌وه‌ له‌ عێراقی‌ نوێدا ژن نوێنه‌رایه‌تیی‌ له‌ حكومه‌تدا نییه‌"، وتیشی‌ "پێویسته‌ ژنانیش هاوشانی‌ پیاوان له‌ بنیاتنانی‌ وڵاتدا به‌شداربن".

مێلكه‌رت ئاماژه‌ی‌ به‌وه‌شدا كه‌ "مه‌سه‌له‌ی‌ گه‌نده‌ڵی‌ یه‌كێكه‌ له‌و مه‌سه‌لانه‌ی‌ رووبه‌ڕووی‌ حكومه‌تی‌ عێراق ده‌بێته‌وه‌‌و ئه‌گه‌ر پیاو و ژن پێكه‌وه‌ كاربكه‌ن یان ژن به‌رپرس بێت، دیارده‌ی‌ گه‌نده‌ڵی‌ كه‌م ده‌بێته‌وه‌ چونكه‌ ژنان كه‌متر له‌ پیاوان له‌ گه‌نده‌ڵییه‌وه‌ ده‌گلێن".

جێی‌ ئاماژه‌یه‌ پێشنیوه‌ڕۆی‌ ئه‌مڕۆ كۆنگره‌ی‌ نێوده‌وڵه‌تیی‌ رۆڵی‌ ئافره‌ت له‌ بنیاتنانی‌ ئاشتی‌‌و ئاشته‌واییدا له‌ هه‌ولێر ده‌ستپێكرد‌و ئاماده‌بوونێكی‌ ره‌سمی‌‌و مه‌ده‌نیی‌ به‌رفروانی‌ له‌سه‌ر ئاستی‌ جیهانی‌‌و هه‌رێمی‌‌و ناوخۆیی‌ به‌خۆه‌وه‌ بینی‌.

كۆنگره‌كه‌، كه‌ بۆ ماوه‌ی‌ دوو رۆژ به‌رده‌وام ده‌بێت، رۆڵی‌ ئافره‌ت له‌ پرۆسه‌ی‌ سیاسی‌و هه‌موراكردنی‌ یاساكاندا تاووتوێ‌ ده‌كات به‌شێوه‌یه‌ك كه‌ خزمه‌ت به‌ پرۆسه‌ی‌ دیموكراسی‌ بكات له‌ عێراق.
(خ/ت) – ع ع

قاوه‌خانه‌یه‌كی‌ تایبه‌ت به‌ ژنان له‌ هه‌ولێر كرایه‌وه‌

jamal — Mon, 31 Jan 2011 15:21:00 GMT

هه‌ولێر/ئه‌سوات ئه‌لعێراق: قاوه‌خانه‌یه‌كی‌ تایبه‌ت به‌ ژنان، رۆژی‌ دووشه‌ممه‌، له‌ شاری‌ هه‌ولێر كرایه‌وه‌ كه‌ به‌شێوه‌یه‌كی‌ مانگانه‌ چاڵاكیی‌ رۆشنبیری‌‌و هونه‌ریی‌ ژن‌و منداڵانیشی‌ تێدا ئه‌نجامده‌درێت.

له‌مباره‌یه‌وه‌ نه‌سرین محه‌مه‌د كه‌ یه‌كیكَ له‌ دامه‌زرێنه‌رانی‌ پڕۆژه‌كه‌یه‌ به‌ ئاژانسی‌(ئه‌سوات ئه‌لعێراق)ی‌ وت "پڕۆژه‌كه‌ تایبه‌ته‌ به‌ ژنان‌و ئه‌وانه‌ش كه‌ تێیدا كارده‌كه‌ن ته‌نها ژنان ده‌بن‌و به‌ته‌نها ژنانیش بۆیان ده‌بێ سه‌ردانی‌ بكه‌ن".

وتیشی‌ "ده‌مێكه‌ بیرۆكه‌ی‌ كردنه‌وه‌ی‌ ئه‌م قاوه‌خانه‌یه‌مان هه‌یه‌‌و پێمانوایه‌ بیرۆكه‌یه‌كی‌ باشه‌، هه‌روه‌ك چۆن شوێنی‌ تایبه‌ت بۆ كۆبوه‌نه‌وه‌ی‌ پیاوان هه‌یه‌، بۆیه‌ پێویسته‌ شوێنی‌ ئاواش بۆ ژنان هه‌بێت، كه‌ تێیدا خواردنه‌وه‌ی‌ سارد‌و گه‌رم ده‌فرۆشرێت".

ئاماژه‌شیدا به‌وه‌ی‌ كه‌ "ژنان ده‌توانن بۆنه‌كانی‌ له‌دایكبوون له‌م قاوه‌خانه‌یه‌دا رێكبخه‌ن، هاوكات شوێنی‌ تایبه‌تیش هه‌یه‌ بۆ منداڵان".

هه‌روه‌ها وتی‌ "له‌ ئێستا سه‌رگه‌رمی‌ رێكخستنی‌ كۆڕ‌و چاڵاكیین به‌ شێوه‌یه‌كی‌ مانگانه‌، له‌ باره‌ی‌ مافه‌كانی‌ خێزان‌و په‌روه‌رده‌ی‌ منداڵان، هه‌روه‌ها كتێبخانه‌یه‌كیشمان هه‌یه‌ چه‌ندین كتێبی‌ تایبه‌ت به‌ چیرۆكی‌ منداڵان‌و رۆمان‌و كتێبه‌كانی‌ بواری‌ ژنان له‌خۆوه‌ده‌گرێت".
ك ن م(خ/ع)- ج پ

رێکخراوە ناحکومییەکانى کوردستان داوا دەکەن شەڕى راگەیاندنى نێوان هەردوو حزبى دەسەڵاتدارو گۆڕان بوەستێت

jamal — Tue, 08 Feb 2011 13:42:00 GMT

هەولێر/ئەسوات ئەلعێراق: فیدراسیۆنى رێکخراوە ناحکومییەکانى هەرێمى کوردستان، رۆژى سێشەممە، داوایکرد شەڕى راگەیاندنى نێوان هەردوو حزبى دەسەڵاتدارى کوردستان(پارتى و یەکێتیى)و بزوتنەوەى گۆڕان بوەستێت، کە لەدواى دەرکردنى بەیاننامەکەى بزوتنەوەکەوە دەستیپێکردووە.

لەمبارەیەوە سەرۆکى فیدراسیۆنەکە عەدنان ئەنوەر بەگ لەمیانى کۆنگرەیەکى رۆژنامەوانییەوە کە ئەمڕۆ لە هۆتێلى چوارچرا بەڕێوەچوو، تێیدا ئاژانسى(ئەسوات ئەلعێراق) ئامادەیبوو، وتى "داوا دەکەین ئەو شەڕە میدیاییەى کە لەدواى دەرکردنى بەیاننامەیەکى بزوتنەوەى گۆڕانەوە لەنێوان بزوتنەوەکە و هەردوو حزبى دەسەڵاتدار(پارتى و یەکێتیى)یەوە سەریهەڵداوە، بوەستێت".

وتیشى "پیشنیار دەکەین سەرۆکایەتى هەرێم لیژنەیەک پێکبهێنێت بۆ بەدواداچوونى هۆکارەکانى دەرکردنى بەیاننامەکەى گۆڕان، لەگەڵ وەستانى دەستبەجێى ئەو هەڵمەتە ئیعلامییەو دوورکەوتنەوە لە زمانى تەشهیر، هەروەها بۆ لێپرسینەوە لە بەرپرسانى ئەم دۆسییەیەو دۆزینەوەى زەمینەیەکى گونجاو لەپێناو کۆبونەوە لەسەر مێزى دیالۆگ، لەجیاتى ئەم شەڕە ئیعلامییە".

روونیشیکردەوە کە "ئێمە وەک رێکخراوەکانى کۆمەڵگاى مەدەنى پێمانوایە کە ئۆپۆزیسیۆن مافى ئەوەى هەیە پێشنیار بخاتە بەردەم دەسەڵات، تا چاکسازىی بکات لەبەرژەوەندى گەلى کوردستاندا، بەڵام لەرێگەى ئامرازە یاسایى و دەستوورییەکانەوە".

جێی‌ باسه‌ بزوتنه‌وه‌ی‌ گۆڕان،هەفتەى رابردوو له‌ به‌یاننامه‌یه‌کدا ژماره‌یه‌کی‌ داواکاری‌ خسته‌‌ڕوو له‌نێویاندا هه‌ڵوه‌شاندنه‌وه‌ی‌ په‌ڕله‌مان‌و حکومه‌تی‌ هه‌رێمی‌ کوردستان‌و کشانه‌وه‌ی‌ ره‌شنوسی‌ ده‌ستوری‌ هه‌رێم‌و چه‌ند یاسایه‌کی‌ په‌یوه‌ندار به‌ سیستمی‌ حوکمڕانیی‌.

له‌وه‌ڵامی‌ ئه‌م به‌یاننامه‌یه‌دا به‌رهه‌م ساڵح سه‌رۆکی‌ حکومه‌تی‌ هه‌رێمی‌ کوردستان، رۆژی‌ دووشه‌ممه‌ی‌ رابردوو،رایگه‌یاند داواکاریی‌ هه‌ڵوه‌شاندنه‌وه‌ی‌ په‌ڕله‌مان‌و حکومه‌ت مه‌ترسیی هه‌یه‌ بۆ سه‌ر ئه‌زموونی‌ کوردستان، روونیشیکرده‌وه‌ که‌ بارودۆخی‌ عێراق له‌گه‌ڵ وڵاتانی‌ تردا جیاوازه‌.
ک ن م (خ/ع)- ج پ

دانیشتوانى گوندێکى تورکمانى سەر بە پارێزگاى کەرکوک لە خۆپیشاندانێکدا داواى گەڕاندنەوەى زەوى و زارەکانیان دەکەن

jamal — Mon, 14 Feb 2011 13:48:00 GMT

کەرکوک/ئەسوات ئەلعێراق: سەدان کەس لە دانیشتوانى گوندى بەشیرى تورکمانى لە پارێزگاى کەرکوک، رۆژى دووشەممە، لە خۆپیشاندانێکدا داواى گەڕاندنەوەى زەوى و زارەکانیان دەکەن کە لەسەردەمى رژێمى پێشووەوە "لێیان زەوتکراوە".

لەمبارەیەوە نەجات حوسێن ئەندامیى گروپى تورکمان لە ئەنجومەنى پارێزگاى کەرکوک کە لە خۆپیشاندانەکەدا ئامادەبوو، بە ئاژانسى (ئەسوات ئەلعێراق)ى وت "نزیکەى 400 کەس لە دانیشتوانى گوندى بەشیر، ئەمڕۆ(شەممە) لەبەردەم باڵەخانەى بەڕێوبەرایەتى ناحیەى تازە(20 کم باشورى کەرکوک) خۆپیشاندانێکیان ئەنجامداو داوایان کرد پەلەبکرێت لە گەڕاندنەوەى ئەو زەوى و زارەى خۆیان کە لەسەردەمى رژێمى حزبى بەعسەوە لێیان زەوتکراوە".

وتیشى "خۆپیشاندەران داوایان لە برا عەرەبەکانى نیشتەجێى ئەو ناوچەیە کرد تەجاو نەکەنە سەر زەوییەکانى خەڵکى گونجى بەشیر، لەمبارەیەشەوە پێنج ساڵ لەمەوبەر لە ئەنجومەنى پارێزگاى کەرکوکدا رێککەوتن ئیمزاکراوە، بەڵام لە ئێستادا کێشەکە لەچاوەڕوانى بڕیارى دادگاو حکومەتدایە بۆ ئەوەى خەڵکى ئەم گوندە مافەکانیان بۆ بگەڕێنرێتەوە".

لاى خۆشییەوە هادى فەتاحى بەڕێوبەرى ناحیەى تازە بە(ئەسوات ئەلعێراق)ى وت "دەسەڵات لە چارەسەرکردنى کێشەکانى ناوچە جێناکۆکەکاندا دواکەوتووە، ئەمەش دەبێتە هۆى روودانى کێشەو گرفت لەم ناوچانەدا".

ئەوەشى وت کە "دانیشتوانى گوندى بەشیر کە تورکمانى سەر بە مەزهەبى شیعەن بەهۆى بونیادنانى چەند باڵەخانەیەک لەسەر زەوییەکانیان لەلایەن عەرەبەکانەوە، ئەم خۆپیشاندانە ناڕەزاییەیان ئەنجامداوە".

ناوبراو داواشی لە خۆپیشاندەران کرد کە "هێمن بن و پەنا نەبەنە بەر توندوتیژى، چونکە مافەکانیان بۆ دەگەڕێنرێتەوە بەو پێیەى کە بۆ لایەنە پەیوەندارەکانى حکومەت بەرزکراوەتەوە".

جێى باسە چەند رۆژێک لەمەوبەر لەسەر کێشەى زەوى و زار لەنێوان دانیتشوانى تورکمان و عەرەبى ئەم ناوچەیە پێکدادانێک روویدا و بووە هۆى کوژرانى چوار کەس و برینداربوونى شەشى دیکە.
ک ک(خ/ع)- ج پ

خۆپیشاندانێک لە کەرکوک بۆ باشترکردنى خزمەتگوزارییەکان رێکخرا

jamal — Tue, 15 Feb 2011 14:35:00 GMT

کەرکوک/ئەسوات ئەلعێراق: دەیان کەس لە دانیشتوانى شارى کەرکوک، رۆژى سێشەممە، لە خۆپیشاندانێکدا داواى باشترکردنى بارودۆخى خزمەتگوزارییەکان و هەلى کارو زیادکردنى بابەتەکانى کۆبونى خۆراکیان کرد.

لەمبارەیەوە حاسم حوسێن ئەندامى لیژنەى لاوان و قوتابیانى سەربەخۆو یەکێک لە رێکخەرانى خۆپیشاندانەکە بە ئاژانسى(ئەسوات ئەلعێراق)ى وت "رێکخستنى ئەم خۆپیشاندانە لە ئەنجامى کەڵەکەبوونى کەموکورتییە خزمەتگوزارییەکانەوە بووە لە پارێزگاکەدا".

وتیشى "لەماوەى رابردوودا لەسەر ئەم بابەتە لەگەڵ ژمارەیەک رێکخراوى مەدەنى و پارتى سیاسییدا کۆبووینەتەوەو ماوەى هەفتەیەکیش کار بۆ رێکخستنى ئەم خۆپیشاندانە دەکەین".

لەلایەکى ترەوە شەهاب ئەحمەد حوسێن کە ئەندامى کۆمەڵە جوتیارییەکانى کەرکوکە وتى "خۆپیشاندانەکەمان ئاشتییانەیەو داوا دەکەین نرخە نوێیەکانى کارەباو ئاو هەڵوەشێنرێنەوەو چارەسەرێکیش بۆ بێکارى دابنرێت، هەروەها بابەتەکانى کۆبونى خۆراک زیادبکرێن".
ک ک(خ/ع)- ج پ

خۆپیشاندەران هەڵیانکوتایە سەر باڵەخانەى پارێزگاى واسیت و پرسگەکەیان سوتاند

jamal — Wed, 16 Feb 2011 13:38:00 GMT

واسیت/ ئەسوات ئەلعێراق: خۆپیشاندەران، رۆژى چوارشەممە، هەڵیانکوتایە سەر باڵەخانەى پارێ.گاى واسیت لە شارى کوت و پرسگەکەیان سوتاند، پۆلیسیش تەقەى لێکردن وبرینارى لێکەوتۆتەوە.

سەرچاوەیەک لەناو خۆپیشاندانەکەدا بە ئاژانسى(ئەسوات ئەلعێراق)ى وت "ژمارەیەکى زۆرى خۆپیشاندەران لە شارى کوت هەڵیانکوتایە سەر باڵەخانەى پارێزگاى واسیت و بەردبارانیان کردو جامى پەنجەرەکانیان شکاند و پرسگەکەشیان سوتاند".

وتیشى "هێزەکانى پۆلیس ناچاربوون تەقە لە خپیشاندەران بکەن و ژمارەیەک خۆپیشاندەر برینداربکەن".

لەمبارەیەوە (ئەسوات ئەلعێراق) پەیوەندیکرد بە بەرپرسانى پارێزگاکە بەڵام سەرچاوەیەکیان نەیویست ناوى خۆى ئاشکرا بکات و وتى "سەرجەم ژوورەکانى باڵەخانەکە لەلایەن بەرپرسەکانەوە بەتاڵ کراون".

جێى باسە سەدان کەس لە خۆپیشاندەرانى شارى کوت بۆ داواکردنى باشتربوونى خزمەتگوزارییەکان ئەمڕۆ خۆپیشاندەکەیان رێکخست.

شارى کوت کە سەنتەرى پارێزگاى واسیتە بە 180 کم دەکەوێتە باشورى خۆرهەلاتى شارى بەغداوە.
غ و(خ/ع)- ج پ

لەخۆپیشاندانێکدا لەسلێمانى داواى چاکسازى لە حکومەتى هەرێمى کوردستان کرا

jamal — Thu, 17 Feb 2011 14:23:00 GMT

سلێمانى/ئەسوات ئەلعێراق: سەدان کەس لە شارى سلێمانى، دواى نیوەڕۆى پێنجشەممە، خۆپیشاندانێکیان رێکخست و تێیدا داوایان لە حکومەتى هەرێمى کوردستان کرد چاکسازى ئابورى و سیاسیى و کۆمەلایەتى ئەنجامبدات.

خۆپیشاندانەکە لەلایەن تۆڕى بەرگرى لە ماف و ئازادییەکانى خەڵک رێکخراوەو سەرەتا لە بەردەم دەرى سەرا(ناوەڕاستى سلێمانى) دەستیپێکرد.

لەمبارەیەوە نەوزاد بابان ئەندامى تۆڕى ناوبراو بە ئاژانسى(ئەسوات ئەلعێراق)ى وت "ئامانج لە رێکخستنى ئەم خۆپیشاندانە پیرۆزباییکردن و پشتگیریکردنى خۆپیشاندانەکانى هەردوو وڵاتى تونس و میسرە کە بەمدواییانە سەرکەوتنیان بەدەستهێنا".

وتیشى "هاوکات مەبەست لە خۆپیشاندانەکە هۆشدارییدانە بە حکومەت بۆ پێداچوونەوەى کارەکانى خۆى و چاکسازى ئابورى و سیاسیى و کۆمەلایەتى ئەنجامبدات".

تۆڕى بەرگرى لە ماف و ئازادییەکانى خەڵک لە ساڵى 2006 لەلایەن کۆمەڵێک گەنجەوە لە شارى سلێمانى پێکهێنراوەو چەندین چاڵاکیى و خۆپیشاندانى رێکخستووە.
س غ(خ/ع)- ج پ

سەدان خوێندکارى زانکۆى سلێمانى لە خۆپیشاندانێکدا داواى لێپێچینەوە لەو کەسانە دەکەن کە تەقەیان لە خۆپیشاندەران کردووە

jamal — Sat, 19 Feb 2011 15:00:00 GMT

سلێمانى/ئەسوات ئەلعێراق: سەدان خوێندکارى زانکۆى سلێمانى، رۆژى شەممە، رژانە سەر شەقامەکان و داواى ئازادکردنى گیراوەکانى رووداوەکەى رۆژى پێنجشەممەى رابردوو دەکەن، هەروەها داواى لێپێچینەوە لەو کەسانە دەکەن کە تەقەیان لە خۆپیشاندەران کردووە.

لەمباریەوە سەرچاوەیەکى ئاگادار بە ئاژانسى(ئەسوات ئەلعێراق)ى وت "نزیکەى دوو هەزار خوێندکار و مامۆستاى زانکۆ هاوڵاتییانى مەدەنى، ئەمڕۆ(شەممە) رژانە سەر شەقامەکان و لە خۆپیشاندانێکدا داوایانکرد ئەو دەستگیرکراوانەى لەمیانى خۆپیشاندانەى رۆژى پێنجشەممەدا دەستگیرکراون ئازادبکرێن، هەروەها ئەو کەسانەشى کە تەقەیان لە خۆپیشاندەران کردووە لێپێچینەوەیان لەگەڵدا بکرێت".

جێى باسە سەدان کەس رۆژى پێنجشەممەى رابردوو لە شارى سلێمانى بۆ داواکردنى "چاکسازى "لە هەرێمى کوردستان خۆپیشاندانێکیان سازکردو دواتر رێڕەوى خۆپیشاندانەکە گۆڕاو تێیدا بارەگاى لقى چوارى پارتى دیموکراتى کوردستان بەردباران کراو پەنجەرەکانى شکێنران، لەوەڵامدا پاسەوانانى بارەگاکە بە تەقەکردن وەڵامى خۆپیشاندەرانیان دایەوەو لەئەنجامدا خۆپیشاندەرێک کوژراو زیاتر لە 50 کەسیش برینداربوون.
س غ(خ/ع)- ج پ

دەیان خوێندکارى زانکۆى کۆیە کوژرانى ئەو مێردمنداڵەیان پرۆتێستۆ کرد کە لەخۆپیشاندانەکانى سلێمانیدا کوژرا

jamal — Sun, 20 Feb 2011 13:24:00 GMT

کۆیە(هەولێر)- ئەسوات ئەلعێراق: سەرچاوەیەکى بەرپرس لە قەزاى کۆیە، رۆژى یەکشەممە، رایگەیاند دەیان خوێندکارى زانکۆى کۆیە لە خۆپیشاندانێکدا کوژرانى ئەو مێردمنداڵەیان پرۆتێستۆ کرد کە لە خۆپیشاندانەکانى سلێمانیدا کوژرا.

سەرچاوەکە بە ئاژانسى(ئەسوات ئەلعێراق)ى وت "دەیان خوێندکاى زانکۆى کۆیە ئەمڕۆ لە خۆپیشاندانێکى هێمنانەدا بۆ پرۆتێستۆکردنى کوژرانى ئەو مێردمنداڵەى لە خۆپیشاندانەکانى سلێمانیدا کوژرا، رژانە سەر شەقامەکان".

روونیشیکردەوە کە "خۆپیشاندانەکە بە بێ مۆڵەت ئەنجامدراو لەلایەن هێزە ئەمنییەکانیشەوە پارێزگارى لێدەکرا".

جێى باسە سەدان خوێندکارى زانکۆى سلێمانى، ئەمڕۆ رژانە سەر شەقامەکان و داواى ئازادکردنى گیراوەکانى رووداوەکەى رۆژى پێنجشەممەى رابردوو دەکەن، هەروەها داواى لێپێچینەوە لەو کەسانە دەکەن کە تەقەیان لە خۆپیشاندەران کردووە.

لە خۆپیشاندانەکەى رۆژى پێنجشەممەى رابردووشدا سەدان کەس بۆ داواکردنى "چاکسازى "لە هەرێمى کوردستان رژانە سەر شەقامەکان، بەڵام دواتر رێڕەوى خۆپیشاندانەکە گۆڕاو تێیدا بارەگاى لقى چوارى پارتى دیموکراتى کوردستان بەردباران کراو پەنجەرەکانى شکێنران، لەوەڵامدا پاسەوانانى بارەگاکە بە تەقەکردن وەڵامى خۆپیشاندەرانیان دایەوەو لەئەنجامدا خۆپیشاندەرێک کوژراو زیاتر لە 50 کەسیش برینداربوون.
ق م(خ/ع)- ج پ

نزیکەى 6 هەزار کەس لە سلێمانى لە خۆپیشاندانێکدا داواى چاکسازیى سیاسیى دەکەن

jamal — Tue, 22 Feb 2011 17:23:00 GMT

سلێمانى/ئەسوات ئەلعێراق: نزیکەى 6 هەزار کەس لە شارى سلێمانى، رۆژى سێشەممە، لە خۆپیشاندانێکدا داواى چاکسازیى سیاسیى و دادگاییکردنى ئەو لایەنانە کدر کە تەقەیان لە خۆپیشاندەران کردووە، بەپێى یەکێک لە رێکخەرانى خۆپیشاندانەکە.

شوان رەووف بە ئاژانسى(ئەسوات ئەلعێراق)ى وت "ژمارەى ئەو کەسانەى کە بۆ داواکردنى ئەنجامدانى چاکسازى و دادگاییکردنى ئەو لایەنانەى تەقەیان لە خۆپیشاندەران کردووە گەیشتە نزیکەى 6 هەزار کەس".

وتیشى "خۆپیشاندان و مانگرتنەکە بەشێوەیەکى هێمنانە بەڕێوەدەچێت و هیچ توندوتیژییەکى بەخۆیەوە نەبینیوە".

جێى باسە ماوەى چەند رۆژێکە شارى سلێمانى چەندین خۆپیشاندانى بەخۆیەوە بینیوەو کە لەئەنجامدا پێکدادانى لێکەتوۆتەوەو تا ئێستا بۆتە هۆى برینداربوونى زیاتر لە 121 کەس و کوژرانى سێ لە خۆپیشاندەرەکان.
س غ(خ/ع)- ج پ

خۆپیشاندەران داواى گۆڕینى ناوى شەقامى موعەمەڕ قەزافى دەکەن لە سلێمانى

jamal — Thu, 24 Feb 2011 22:20:00 GMT

سلێمانى/ئەسوات ئەلعێراق: بەڕێوبەرى راگەیاندنى شارەوانى سلێمانى، رۆژى پێنجشەممە، رایگەیاند لەسەر داواى خۆپیشاندەران ناوى ئەو شەقامەى شارى سلێمانى دەگۆڕن کە بەناوى موعەممەر قەزافى سەرۆکى لیبیا کراوە.

زەردەشت رەفیق بە ئاژانسى(ئەسوات ئەلعێراق)ى وت "خۆپیشاندەرانى بەدەرکى سەرا(ناوەڕاستى سلێمانى) داوایان کرد ناوى ئەو شەقامە بگۆڕدرێت کە بەناوى موعەممەر قەزافى سەرۆکى لیبیا کراوە، بەهۆى ئەو توندوتیژییەى دژ بەگەلەکەى ئەنجامیدەدات".

روونیشیکردەوە کە "سەرۆکى ئەنجومەنى شارەوانى سلێمانى بڕیاریدا ئەم ناوە بگۆڕێت و بڕیاریشە رۆژى یەکشەممەى داهاتوو ناوێکى تازەى لێبنرێت".

وتیشى "شارەوانى سلێمانى پێیباشە خۆپیشاندەران خۆیان ناوێک بۆ شەقامەکە دەستنیشان بکەن".

جێى باسە چەند ساڵێکە شەقامەکە ناوى قەززافى لێنراوە، وەک رێزگرتنێک لەو هەڵوێستانەى کە بەرامبەر بە گەلى کورد هەیبووەو داواى مافى چارەى خۆنوسینى بۆ کورد کردووە، ئەمەش هەڵوێستێک بووە کورد پێیوایە لەنێو سەرکردە عەرەبەکاندا دەگمەنە.
س غ(خ/ع)- ج پ

خۆپیشاندەران باڵەخانەى پارێزگاى نەینەوایان سوتاند

jamal — Fri, 25 Feb 2011 13:33:00 GMT

نەینەوا/ئەسوات ئەلعێراق: خۆپیشاندەرانى پارێزگاى نەینەوا، رۆژى هەینى، هەڵیانکوتایە سەر باڵەخانەى پارێزگاکەو سووتاندیان.

پەیامنێرى ئاژانسى(ئەسوات ئەلعێراق) لە شوێنى رووداوەکە بوو، رایگەیاند کە "خۆپیشاندەران دواى ماوەیەکى کورت لە گرتنى باڵەخانەى پارێزگاى نەینەوا، ئاگریان لە باڵەخانەکە بەرداو سووتاندیان".

جێى باسە سەرلەبەیانى ئەمڕۆ خۆپیشاندەرانى ئەو شارە بۆ دەربڕینى ناڕەزاییى خۆیان خۆپیشاندانەکەیان ئەنجامداو باڵەخانەى پارێزگاکەیان گرت و ئاڵاى عێراقییان لەسەر بەرزکردەوە، هێزە ئەمنییەکانیش دەستڕێژییان لەو خۆپیشاندەرانە نەکرد کە چوونە ناو باڵەخانەکەوە.
ا ح(خ/ع)- ج پ

روانگەیەکى رۆژنامەوانیى: 25ى شوبات رۆژێکى خراپ بوو بۆ دیموکراسى و ئازادیى رۆژنامەگەریى لە عێراقدا

jamal — Sat, 26 Feb 2011 13:22:00 GMT

بەغدا/ئەسوات ئەلعێراق: کۆمەڵەى بەرگریکردن لە ئازادى رۆژنامەوانیى، دەستگیرکردنى ئەو رۆژنامەوانانەى ئیدانەکرد کە دوێنێ هەینى لەکاتى روماڵکردنى خۆپیشاندانەکانى بەغداو پارێزگاکانى ترى عێراقدا لەلایەن هێزە ئەمنییەکانەوە دەستگیرکران، پێشیوایە 25ى شوبات رۆژێکى خراپ بوو بۆ دیموکراسى و ئازادیى رۆژنامەگەریى لە عێراقدا.

کۆمەڵەى ناوبراو لە بەیاننامەیەکیدا کە وێنەیەکى دەست ئاژانسى(ئەسوات ئەلعێراق)کەوتووە، رایگەیاندووە کە "بە توندى ئەو دەستگیرکردن و هێرشکردنە سەر رۆژنامەنووسان ئیدانە دەکەین کە لەچەن ناوچەیەکى جیاجیاى عێراقدا ئەنجامدران".

ئەوەشى وتوە کە "کەناڵى تەلەفزیۆنى دیار رایگەیاندووە کە دوێنێ هێزێکى سەربازى هەڵیکوتاوەتە سەر بارەگاکەى و حەوت کارمەندی دەستگیرکراوەو پەخشى تەلەفزیۆنەکە وەستێراوە، بەهۆى ئەوەى خۆپیشاندانەکانى گۆڕەپانى تەحریرى شارى بەغداو چەند پارێزگایەکى راستەوخۆ گواستۆتەوە".

هەروەها روونیشیکردۆتەوە کە "بەهەمان شێوە ئاژانسى سۆمەرییە نیوزیش رایگەیاندووە کە سینان عەبدوڵلاو ئیدریس جەوادى پەیامنێرانى ئاژانسەکەو سەفا حاتەمى وێنەگرى هەمان ئاژانس لە گۆڕەپانى تەحریر دەستگیرکراون، هەروەها ئاماژەشیداوە بەوەى کە سێ کارمەندى دیکەیان دەستگیرکراوەو دووانى دیکەش هێرشیان کراوەتەسەر بەڵام توانیویانە لەدەست هێزەکاندا رابکەن".

هێماشى بۆ ئەوەکردووە کە "دەیان رۆژنامەنووس لە گۆڕەپانەکەى ناوەڕاستى بەغدادا دەستبەسەرکرابوون، لەوانە مازن زەیدى و خلود عامرى و ستار حاجى ئەندامانى کۆمەڵ’ى بەرگرى لە رۆژنامەنووسان، هاوکات کەلوپەلى رۆژنامەوانى و مۆبایل و کامێراکانیان لێسەنرابوو".

بەیاننامەکە ئەوەشى راگەیاندووە کە "هێزە ئەمنییەکان دواى چوار رۆژنامەنووس کەوتوون و دووانیان لەناو چێشتخانەى تەرفى ناوچەى کەڕادەى ناوەڕاستى بەغدا دەستگیرکردووە".

ئاماژەشیداوە بەوەى کە " چوار رۆژنامەنووسەکە بریتى بوون لە بەرپرسى بەشى رۆشنبیرىى رۆژنامەى سەباحى نوێ حوسام سەراى و بەرپرسى بەشى سیاسیى لە رۆژنامەى مەدا عەلى عەبدولسادە و هادى عەبدولمەهدى پێشکەشکار لە ئیستگەى دەیموزى و عەلى موسەوى هەواڵساز لە رۆژنامەى سەباحى نیمچە فەرمى".

لەکۆتاییشدا ئەوەهاتووە کە "هێزێکى ترى ئەمنى لە پارێزگاى کەربەلا لەکاتى روماڵکردنى خۆپیشاندانەکاندا وێنەگرى ئاژانسى رۆیتەرز موشتاق محەمەدیان داوەتە بەرشەق و هەروەها وێنەگرى کەناڵى سەلام ،ئەیاد جومەیلی لەئەنجامى تەقەکردنى هێزە ئەمنییەکاندا برینداربووە".

کۆمەڵەى ناوبراو لە بەیاننامەکەیدا داواى لە حکومەت کردووە "لێپێچینەوە لەگەڵ سەرجەم ئەو مەفرەزە ئەمنییانە بکرێت کە پەلامارى رۆژنامەوانانیان داوە".
م ا(ب/ع)- ج پ

كه‌ناڵی‌ نالیا: ئه‌گه‌ر له‌ ماوه‌ی‌ 10 رۆژدا وه‌ڵاممان نه‌درێته‌وه‌ په‌نا ده‌به‌ینه‌ به‌ر لێكۆڵینه‌وه‌ی‌ نێوده‌وڵه‌تی‌

5ahab — Thu, 03 Mar 2011 12:16:00 GMT

سلێمانی‌/ ئه‌سوات ئه‌لعیراق: كه‌ناڵی‌ ئاسمانیی‌ نالیا كه‌ به‌ر له‌ چه‌ند هه‌فته‌یه‌ك كه‌وته‌ به‌ر هێرشێكی‌ چه‌كداری‌‌و سوتێنرا، پێنجشه‌ممه‌، داوای‌ له‌ حكومه‌تی‌ هه‌رێم كرد له‌ماوه‌ی‌ 10 رۆژی‌ داهاتوودا ئه‌و كه‌سانه‌ راده‌ستی‌ دادگا بكات كه‌ ده‌ستیان له‌ سوتاندنی‌ كه‌ناڵه‌كه‌دا هه‌بووه‌‌و كه‌ناڵه‌كه‌ش قه‌ره‌بوو بكاته‌وه‌، به‌ پێچه‌وانه‌وه‌ په‌نا بۆ لێكۆڵینه‌وه‌ی‌ نێوده‌وڵه‌تی‌ ده‌بات.

كه‌ناڵی‌ نالیا له‌ رونكردنه‌وه‌یه‌كدا، كه‌ وێنه‌یه‌كی‌ ئاراسته‌ی‌ ئاژانسی‌ (ئه‌سوات ئه‌لعیراق) كراوه‌، سوپاسی‌ سه‌رجه‌م ئه‌و ئه‌ندامانه‌ی‌ په‌رله‌مانی‌ كردووه‌ كه‌ پشتیوانیی‌ خۆیان بۆ كه‌ناڵه‌كه‌ نیشان داوه‌‌و داوایان كردووه‌ ئه‌نجامده‌رانی‌ ئه‌و هێرشه‌ بدرێنه‌ دادگا‌و كه‌ناڵه‌كه‌ش قه‌ره‌بوو بكرێته‌وه‌.

كه‌ناڵه‌كه‌ داوای‌ كردووه‌ "هه‌مو ئه‌و كه‌سانه‌ی‌ ده‌ستیان له‌هه‌ڵكوتانه‌ سه‌ر NRT‌و دواتر سوتاندنیدا هه‌بوه‌، راده‌ستی‌ دادگا بكرێن، هاوكات حكومه‌تی هه‌رێم‌و ده‌زگا ئه‌منییه‌كان به‌ڵێننامه‌ی نوسراو به‌ كه‌ناڵه‌كه‌ بده‌ن‌و تێیدا به‌ڵێن بده‌ن كه‌ به‌رپرسن به‌رامبه‌ر به‌پاراستنی گیان‌و ماڵی كارمه‌ندان‌و كه‌ناڵه‌كه‌، هه‌روه‌ك قه‌ره‌بوی‌ زیانه‌ داراییه‌كانی‌ كه‌ناڵه‌كه‌ش بكرێته‌وه‌".

هه‌ر له‌و رونكردنه‌وه‌یه‌دا هاتووه‌ "لێره‌وه‌ به‌رپرسانی باڵای حكومه‌تی هه‌رێمی كوردستان (كه‌ به‌رپرسن له‌پاراستنی سه‌رو ماڵ و گیانی هاووڵاتیان و دامه‌زراوه‌ ره‌سمییه‌كان)، ئاگادار ده‌كه‌ینه‌وه‌، ئه‌گه‌ر له‌ماوه‌ی (10) رۆژی داهاتوودا، داواكانمان جێبه‌جێ نه‌كرێن، ناچارده‌بین په‌نابه‌رینه‌ به‌ر لێكۆڵینه‌وه‌ی نێوده‌وڵه‌تی بۆ چاره‌سه‌ركردنی كێشه‌كه‌مان".

كه‌ناڵی‌ ئاسمانیی‌ نالیا، كه‌ كه‌ناڵێكی‌ هه‌واڵیی‌ تایبه‌تی‌ سه‌ربه‌خۆیه‌ له‌ سلێمانی‌، له‌ شه‌وی‌ 20ی‌ شوباتی‌ رابردوودا‌و دوای‌ سێ‌ رۆژ له‌ ده‌ستپێكردنی‌ په‌خشی‌ ئه‌زموونیی‌ خۆی‌، كه‌وته‌ به‌ر هێرشێكی‌ چه‌كداریی‌ رێكخراو و سوتێنرا هه‌روه‌ك یه‌كێك له‌ پاسه‌وانه‌كانی‌ بیناكه‌ برینداركرا.
به‌رپرسانی‌ كه‌ناڵه‌كه‌ زیانه‌ مادییه‌كانی‌ ئه‌و هێرشه‌ به‌ زیاتر له‌ نۆ ملیۆن دۆلار ده‌خه‌مڵێنن.
(خ) – ع ع

هەزاران کەس لە سلێمانى بێزارى خۆیان دەردەبڕن لەبێدەنگى حکومەت بەرامبەر بە داواکارییەکانیان

jamal — Fri, 11 Mar 2011 15:29:00 GMT

سلێمانى/ئەسوات ئەلعێراق: خۆپیشاندانەکانى شارى سلێمانى، ئەمڕۆ هەینى پێى نایە 21ەمین رۆژى خۆى بەبێ وەستان و بەهەزاران کەس بێزارى خۆیان دەربڕى لەبێدەنگى حکومەتى هەرێم لەبەرامبەر داواکارییەکانیان.

بەبەشدارى هەزاران کەس لە گۆڕەپانى سەراى ناوەڕاستى سلێمانى نوێژى هەینییان کردو بە دروشمەکانیان "داواى چاکسازییان دەکردو هاوکات بێزارى خۆیان دەردەبڕن لەبێدەنگى حکومەت بەرامبەر بەداواکارییەکانیان".

لەمبارەیەوە ئارام جەمال یەکێک لە خۆپیشاندەرەکان بە ئاژانسى(ئەسوات ئەلعێراق)ى وت "داواکارییەکانى خۆپیشاندەران داواى مەشروعن و بریتین لە دادگاییکردنى ئەو کەسانەى تەقەیان لە خۆپیشاندەران کردووە هەروەها هەنگاونان بە ئاراستەى چاکسازیى سیاسیى و کۆتاییهێنان بە گەندەڵیى".

جێى باسە لە 17ى شوباتەوە تا ئێستا شارى سلێمانى و چەند شارۆچکەیەکى سەر بەم پارێزگایە چەندین خۆپیشاندانیان تێدا سازکراوەو لەسەرەتادا پێکدادان لەنێوان خۆپیشاندەران و هێزە ئةمنى و حزبییەکان هاتەکایەوەو کە بووە هۆى کوژرانى چەند کەسێک و برینداربوونى نزیکەى 200 کەس.
س غ(خ/ع)- ج پ

خۆپیشاندان لە سلێمانى پێینایە هەفتەى پێنجەمەوە

jamal — Sat, 26 Mar 2011 08:24:00 GMT

سلێمانى/ئەسوات ئەلعێراق: خۆپیشاندانەکانى شارى سلێمانى پێیاننایە هەفتەى پێنجەمەوە، کە تێیاندا داواى چاکسازیى سیاسیى و باشترکردنى خزمەتگوزاریى و دادگاییکردنى ئەوانە دەکرێت کە بوونەتە هۆى کوژران و برینداربوونى خۆپیشاندەران، لەمبارەیەشەوە خۆپیشاندەران وێڕاى باران بارین نوێژى هەینییان لەناوەڕاستى شارەکەدا کرد.

پەیامنێرى ئاژانسى(ئەسوات ئەلعێراق) لە شارى سلێمانى وتى "نزیکەى 3 هەزار کەس لە خۆپیشاندەران وێڕاى باران بارین نوێژى هەینییان لە مەیدانى سەرا کردو جەختیانکردە سەر بەردەوامیدان بە خۆپیشاندانەکان تا ئەو کاتەى داواکارییەکانیان جێبەجێدەکرێن".

وتیشى "خۆپیشاندەران دواى تەواوبوونى نوێژى هەینى، دروشمى دادگاییکردنى ئەو کەسانەیان بەرزکردەوە کە لە خۆپیشاندانەکانى رابردوودا لە سلێمانى و هەڵەبجە تەقەیان لە خۆپیشاندەران کردووەو تێیدا ژمارەیەک خۆپیشاندەر کوژراون و دەیانیشیان برینداربوون".

روونیشیکردەوە کە "هەروەها لە خۆپیشاندانەکەدا داواى چاکسازیى سیاسیى و کۆتاییهێنان بە گەندەڵى کرا".

جێى باسە لە 17ى شوباتى رابردووەوە خۆپیشاندان لە شارى سلێمانییەوە دەستیپێکردووەو تا ئێستا بەردەوامەو لەسەرەتادا روبەڕووبوونەوەو پێکدادان لەگەڵ هێزە ئەمنییەکاندا هاتەکایەوەو بەم هۆیەشەوە لە هەڵەبجەو سلێمانى و کەلار هەشت کەس کوژران و دەیان کەسیش برینداربوون.
س غ(خ/ع)- ج پ

خۆپیشاندەرانى سلێمانى داواى دەستلەکارکێشانەوەى سەرۆکى هەرێم و سەرۆکى حکومەت دەکەن

jamal — Mon, 04 Apr 2011 19:36:00 GMT

سلێمانى/ئەسوات ئەلعێراق: ژمارەیەک خۆپیشاندەرى سلێمانى، رۆژى دووشەممە، داواى دەستلەکارکێشانەوەى سەرۆکى هەرێم و سەرۆکى حکومەتى هەرێمى کوردستان و هەڵوەشاندنەوەى پەڕلەمانیان کرد، وەک ناڕەزاییەک بەرامبەر وەڵامنەدانەوەیان ئەم لایەنانە بۆ داواکارییەکانیان.

لەبەیاننامەیەکدا کە لەسەر زارى وتەبێژى ئەنجومەنى خۆپیشاندەرەکانى سەراى (ئازادى)بڵاوکراوەتەوەو
وێنەیەکى دەست ئاژانسى(ئەسوات ئەلعێراق)کەوتووە، خۆپیشاندەران "داواى دەستلەکارکێشانەوەى سەرۆکى هەرێم و سەرۆکى حکومەتى هەرێمى کوردستان و هەڵوەشاندنەوەى پەڕلەمانیان کرد، وەک ناڕەزاییەک بەرامبەر وەڵامنەدانەوەیان ئەم لایەنانە بۆ داواکارییەکانیان کە ماوەى 45 رۆژە لە مەیدانى سەرا کۆدەبنەوە".

بەپێى بەیاننامەکە "ئەم داواکارییانە لەدەرەنجامى بێدەنگبوون و وەڵامنەدانەوەى حکومەتەوە دێن کە ماوەى 45 رۆژە لە مەیدانەکەدا کۆدەبنەوەو تێیدا داواى ئەنجامدانى چاکسازى سیاسیى و دادگاییکردنى ئەو کەسانە دەکرێت کە تەقەیان لە خۆپیشاندەران کردووە.وێڕاى داواکردنى ئازادى رادەربڕین".

سەدرییەکان لەمیانى خۆپیشاندانێکى گەورەدا لەبەغدا داواى رۆیشتنى هێزە ئەمریکییەکان دەکەن

jamal — Sat, 09 Apr 2011 11:23:00 GMT

بەغدا/ئەسوات ئەلعێراق: سەرکردەیەکى رەوتى سەدریى، رۆژى شەممە، لەنێو ئاپۆرایەکى گەورەى جەماوەریدا لە شارى بەغداو لەسەر زارى موقتەدا سەدرەوە داواى رۆیشتنى یەکجارەکى هێزە ئەمریکییەکانى کرد لە کۆتایى ئەمساڵدا.

حازم ئەعرەجى لەمیانى خۆپیشاندانێکدا کە بەبۆنەى رۆژى 9ى نیسانى یادى روخانى رژێمى سەدام حوسێن و داگیرکردنى عێراق لەلایەن هێزەکانى ئەمریکاوە لەشارى بەغدا رێکخرابوو، بەیاننامەیەکى موقتەدا سەدرى رابەرى رەوتەکەى خوێندەوەو تێیدا داواى "مانگرتنێکى کراوەى کردبوو تا ئەو کاتەى هێزەکانى ئەمریکا لە کۆتایى ئەمساڵدا بەیەکجارى عێراق جێدێڵن".

هەروەها داواشیکردبوو کە "ئەو کەسانەى ئەمڕۆ لە خۆپیشاندانەکەدا ئامادەن و توانایان هەیە بڕۆنە شارى نەجەف بۆ سەردانى گۆڕى شەهیدى یەکەم سەماحەتى سەید محەمەد باقر سەدر".
ع ل(خ/ع)- ج پ

بەپێى راپرسییەکى ئاژانسى ئەسوات ئەلعێراق ئەولەوییەت لاى گەنجان بریتییە لەدژایەتیکردنى گەندەڵیی

jamal — Tue, 12 Apr 2011 13:31:00 GMT

بەغدا/ئەسوات ئەلعێراق: لەمیانى راپرسییەکى ئاژانسى(ئەسوات ئەلعێراق)دا کە لەماوەى نێوان 23ى شوبات تا 11ى نیسان لەهەردوو بەشى عەرەبى و کوردى ماڵپەڕى ئەلیکتڕۆنیەکەیدا راگەیەنرابوو، زۆرینەى بەشداربووان پێیانوایە ئەولەوییەت لاى گەنجان له دژایەتیکردنى گەندەلییدایە.

لە کۆى 1879 بەشداربووى بەشى عەرەبیدا 27.78%ى دەنگدەران لەگەڵ زەرورەتى دژایەتیکردنى گەندەڵیدان، هەروەها 27.43%یشیان گەرەنتى کارى بەردەوامیان بە ئەولەوییەت داناوە، 19.93%شیان ئەولەوییەتیان داوە بە ئازادى رادەربڕین، لەهەمانکاتدا 9.93%یان ئەولەوییەت بە کۆچى لاوان دەدەن بۆ دەرەوەى وڵات.

هەر لەم بەشەدا 6.5% پێیانوایە ئەولەویەت لاى گەنج چوونە ناو پرۆسەى هاوسەرگیرییە، 5.37%یشیان بەشداریکردن لە بڕیارى سیاسیى بە ئەولەوییەت دادەنێن، هەروەها 3.03% بەدەستهێنانى قەرزى ئاسانکارییان بە ئەولەوییەت داناوە.

سەبارەت بە بەشداربووانى بەشى کوردى کە ژمارەیان گەیشتە 421 کەس و لەم ژمارەیەدا 37.91%یان دژایەتیى گەندەلییان بە ئەولەوییەت داناوە، 20.37%یشیان پێینوایە ئازادى رادەربڕین دەبێتە ئەولەوییەت، هەروەها 13.74%یان مەسەلەى دابینکردنى کارى بەردەوامیان لا ئەولەوییەتە.

بەهەمان شێوە 9.47%یشیان ئەولەوییەت دەدەن بە بەشداریکردن لە بڕیارى سیاسیى، هەروەها 8.29%یان لەگەڵ ئەوەدان ئەولەوییەت بۆ کۆچکردن بێت بۆ دەرەوەى وڵات، 7.81%یشیان پرسى هاوسەرگیرییان بەلاوە ئەولەوییەتە، بەڵام 2.36%ى کۆى دەنگدەرانیش لەگەڵ ئەوەدابوون پێدانى قەرزى ئاسانکاریى ئەولەوییەتە.
م ا (خ/ع)- ج پ

کەسوکارى ئەنفالکراوان داواى دادگاییکردنى میلیشیا کوردییە بەشداربووەکانى پرۆسەى ئەنفال دەکەن

jamal — Thu, 14 Apr 2011 19:27:00 GMT

سلێمانى/ئەسوات ئەلعێراق: کەسوکارى ئەنفالکراوانى ناحیەى رزگارى سەر بە قەزاى کەلار،رۆژى پێنجشەممە، لەمیانى مەراسیمى یادکردنەوەى رۆژى ئەنفالدا کە تێیدا وەزیرى رۆشنبیرى و لاوانى حکومەتى هەرێم ئامادەیبوو، داواى دادگاییکردنى میلیشیا کوردییەکانى بەشداربوو لەم پرۆسەیان کرد.

لەمەراسیمەکەدا کە ئاژانسى(ئەسوات ئەلعێراق)یش ئامادەیبوو، نوێنەرى کەسوکارى ئەنفالکراوەکان وتى "داوا لە حکومەت دەکەین سەرجەم سەرکردەکانى میلیشیا کوردییە بەشداربووەکانى پرۆسەى ئەنفال دەکەین کە بە موستەشارەکان ناسراون، بەهەمان شێوە داواى قەرەبوکردنەوە دەکەین بۆ کەسوکارى قوربانیانى ئەنفال و گەیاندنى خزمەتگوزاریى بۆ گوندە ئەنفالکراوەکان".

هەر لەمبارەیەوە چاڵاکوان تەها سلێمان بە ئاژانسى(ئەسوات ئەلعێراق)ى وت "پێویستە لەسەر حکومەتى هەرێم خزمەتگوزاریى بۆ ئەو گوندانە دابین بکات کە بەر شاڵاوى ئەنفال کەوتوون، بەو پێیەى کە تا ئێستاش بەدەست خراپى بوارى خزمەتگوزارییەوە دەناڵێنن".

وتیشى "هەروەها داوا دەکەین تاوانبارانى ئەم کارەساتە دەستگیربکرێن، بۆ ئەوەى دادگایى بکرێن و بە سزاى خۆیان بگەن".

جێى باسه پرۆسەى ئەنفال یەکێک بوو لەو هەڵمەتانەى دەسەڵاتى حزبى بەعس بۆسەر چەند ناوچەیەکى هەرێمى کوردستان و لئەنجامدا بەپێى ئامارەکانى حکومەتى هەرێم زیاتر لە 182 هەزار کەس لە هاوڵاتیانى مەدەنى بێسەروشوێنکران و دواى نەمانى دەسەڵاتى سەدام حوسێنیش چەندین گۆڕى بە کۆمەڵ لە ناوەڕاست و باشورى عێراقدا دۆزرانەوە کە روفاتى بێسەروشوێنکراوو ئەنفالکراوەکانیان تێدابووە.
س غ(خ/ع)- ج پ

رێکخراوە ناحکومییەکانى کوردستان هێرشەکەى سوپاى عێراقى بۆسەر موجاهیدینى خەڵق سەرکۆنە دەکەن

jamal — Mon, 11 Apr 2011 07:22:00 GMT

هەولێر/ئەسوات ئەلعێراق: ئەنجومەنى فیدراسیۆنى رێکخراوە ناحکومییەکانى هەرێمى کوردستان، رۆژى یەکشەممە، هێرشەکەى سوپاى عێراقى بۆسەر سەربازگەى ئەشرف و موجاهیدینى خەڵقى سەرکۆنەکرد، کە بەهۆیەوە چەند کەسێک کوژران و زیاتر لە 100ى دیکەش برینداربوون.

لەمبارەیەوە سەرۆکى فیدراسیۆنەکە عەدنان ئەنوەر بەگ بە ئاژانسى(ئەسوات ئەلعێراق)ى وت "130 رێکخراوى ناحکومیى ناو فیدراسیۆنەکەمان، ئەو هێرشەى سوپاى عێراقى سەرکۆنە دەکەین کە کرایە سەر موجاهیدینى خەڵق لە خێوەتگاى ئەشرەف لە پارێزگاى دیالە".

وتیشى "فیدراسیۆنەکەمان لەروانگەى سیاسییەوە سەیرى رووداوەکە ناکات، بەڵکو لە روانگەى مرۆییەوە ئەو کارە سەرکۆنە دەکات، بۆیە زۆر بەتوندى دژى ئەو رووداوەین و داوا لە نورى مالیکیى سەرۆک وەزیران دەکەین گەمارۆ سەربازییەکەى سەر ئەم خێوەتگایە کۆتایى پێبێنێت، تا رێکخراوە مرۆییەکان بتوانن سەردانى خێوەتگاکە بکەن، چونکە ئەوانەى کە لەم خێوەتگایەدا نیشتەجێن پێویستیان بە هاوکارى پزیشکى و خۆراک هەیە".

ناوبراو هێماشى بۆ ئەوەکرد کە "ناکرێ چەک لە دژى هاوڵاتیانى بێ دەسەڵات بەکاربهێنرێت، بۆیە هەر هێرش و پەلامارێک بۆسەر خێوەتگاکە سەرکۆنە دەکەین".

جێى باسە بەپێى سەرچاوەیەکى سەربازى عێراقیى، سەرلەبەیانى هەینى، سێ چەکدارى سەر بە رێکخراوى موجاهیدینى خەلقى ئێرانى لەئەنجامى پێکدادانێکدا لە سەربازگەى ئەشرەف لەگەڵ هێزێکى ئەمنیى عێراقیدا کوژران و 13کەسى تریش برینداربوون. بەڵام لەمبارەیەوە ماڵپەڕى موجاهیدینى خەلق بڵاویکردۆتەوە کە "لەئەنجامى ئەم پێکدادانەدا 28 ئەندامى رێکخراوەکە کوژراون و دەیانى دیکەش برینداربوون.
ک ن م(خ/ع)- ج پ

داوادەکرێت پەڕلەمانى عێراق هەڵوێست وەرگرێت لە بەرامبەر پێشێلکارییەکانى دژ بەرۆژنامەنووسانى کوردستان

jamal — Tue, 19 Apr 2011 14:51:00 GMT

بەغدا/ئەسوات ئەلعێراق: کۆمەڵەى عێراقى بۆ بەرگریکردن لە مافەکانى رۆژنامەنوسان، رۆژى سێشەممە، داواى لەپەڕلەمانى عێراق کرد بەپەلە هەڵوێست وەرگرێت لە پێشێلکارییەکانى دژ بەرۆژنامەنووسانى هەرێمى کوردستان.

لەمبارەیەوە ئیبراهیم سەراجى سەرۆکى کۆمەڵەکە بە ئاژانسى(ئەسوات ئەلعێراق)ى وت "کۆمەڵەکەمان چاودێریى ئەو پێشێلکارییانە دەکات کە لە هەرێمى کوردستاندا دژ بە رۆژنامەنووسان ئەنجامدەدرێن، لە ماوەى نێوان 17ى شوباتى رابردوەوە تا ئێستا 226 پێشێلکارى ئەنجامدراون و زۆربەیان لە پارێ.گاى سلێمانییەوەبون".

وتیشى "ئێمە بەنیگەرانییەوە لەو توندوتیژییانەى دژ بە رۆژنامەنووسان دەڕوانین، هەروەها بێدەنگیى نێردەرى نەتەوە یەکگرتووەکان(یۆنامى) لە ئاست ئەم بابەتەدا بە کارێکى نامۆ دەزانین".

جێى باسە لە 17ى شوباتى رابردووەوە خۆپیشاندان لە شارى سلێمانیی و چەند شارو شارۆچکەیەکى تر دەستیپێکردووەو تا ئێستا بەردەوامەو لەسەرەتادا روبەڕووبوونەوەو پێکدادان لەگەڵ هێزە ئەمنییەکاندا هاتەکایەوەو بەم هۆیەشەوە لە هەڵەبجەو سلێمانى و کەلار هەشت کەس کوژران و دەیان کەسیش برینداربوون، هاوکات چەندین پێشێلکاریى دژ بە رۆژنامەو رۆژنامەنوسان ئەنجامدراوە دیارترینیان سوتاندنى کەناڵى ئاسمانى نالیابوو
ع ف(خ/ع)- ج پ

وتەبێژى خۆپیشاندەرانى سلێمانى: ئەمڕۆ 50 خۆپیشاندەرى دەستگیرکراو ئازاد دەکرێن

jamal — Wed, 20 Apr 2011 10:44:00 GMT

سلێمانى/ئەسوات ئەلعێراق: وتەبێژ بەناوى خۆپیشاندەرانى مەیدانى سەرا، رایگەیاند کە 50 کەس لەو خۆپیشاندەرانەى دوێنێ لەبەردەم دادگاى سلێمانیدا دەستگیرکراون ئەمڕۆ چوارشەممە ئازاد دەکرێن.

ناسک قادر بە ئاژانسى(ئەسوات ئەلعێراق)ى وت "لە سەرچاوەکانى بەرپرسەوە زانیومە کە هێزە ئەمنییەکان ئەمڕۆ(چوارشەممە) 50 خۆپیشاندەرى دەستگیرکراو ئازادەکەن کە دوێنێ بەشێوەیەکى هاکەزاییانە لەبەردەم دادگاى سلێمانیدا دەستگیرکرابوون".

جێى باسە هێزە ئەمنییەکان رۆژى دووشەممەى رابردوو دەستیان بەسەر بەردەرکى سەرادا گرت کە لاى خۆپیشاندەران بە"مەیدانى ئازادى"ناسراوەو ماوەى دوو مانگە کراوە بە شوێنى سەرەکى خۆپیشاندانەکان.
س غ(خ/ع)- ج پ

خوێندکارانى زانکۆى سلێمانى سەرلەنوێ ماندەگرنەوە

jamal — Sat, 23 Apr 2011 17:08:00 GMT

سلێمانى/ئەسوات ئەلعێراق: ژمارەیەک خوێندکارى زانکۆى سلێمانى، رۆژى شەممە، جارێکى تر دەستییان بە مانگرتن کردەوەو داوا روونکردنەوەیان لەوەزیرى خوێندنى باڵاو ئەو لایەنانە کرد کە پەلامارى خوێندکاران و حەڕەمى زانکۆیان داوە، لەمبارەیەوە روونکردنەوەى خۆیان بدەن.

نوێنەرى خوێندکارە مانگرتووەکان لەمیانى کۆنگرەیەکى رۆژنامەوانییدا لەناو باڵەخانەى زانکۆکەدا وتى "لەم مانگرتنە بەردەوام دەبین تا ئەو کاتەى ئەو لایەنانەى کە پەلامارى خوێندکاران و حەڕەمى زانکۆیان داوە، تەشهیریییان بە ئایینى ئیسلام کردووە دەدرێن بەدادگاو داواى لێبوردندەکەن".

وتیشى "لەهەمانکاتدا لەمبارەیەوە داوا لە وەزیرى خوێندنى باڵا دەکەین هەڵوێستى خۆى هەبێت و روونکردنەوەى خۆی بدات".

پاشان خوێندکارەکان بە ئاراستەى دەرگاى سەرەکى زانکۆکەو بەمەبەستى ئەنجامدانى خۆپیشاندان چوون، بەڵام هێزێکى ئەمنیى رێگەى نەدان بچنە دەرەوە.

جێى باسە لیژنەى ئەمنى پارێزگاى سلێمانى هەفتەى رابردوو بڕیاریدا خۆپیشاندانى بێ مۆڵەت لە شارەکەدا قەدەغە بکات، ئاماژەشیدا بەوەى کە هەر کەسێک بە بێ مۆڵەت بۆ خۆپیشاندان بێتە دەرەوە دەستگیردەکرێت و رادەستى دادگا دەکرێت.

جێى باسە لە 17ى شوباتى رابردووەوە خۆپیشاندان لە سلێمانیی و چەند شارو شارۆچکەیەکى تر دەستیپێکردووەو لەسەرەتادا روبەڕووبوونەوەو پێکدادان لەگەڵ هێزە ئەمنییەکاندا هاتەکایەوەو بەم هۆیەشەوە لە هەڵەبجەو سلێمانى و کەلار چەند کەسێک کوژران و دەیان کەسیش برینداربوون، هاوکات چەندین پێشێلکاریى دژ بە رۆژنامەو رۆژنامەنوسان ئەنجامدراوە دیارترینیان سوتاندنى کەناڵى ئاسمانى نالیابوو.
س غ(خ/ع)- ج پ

حزبى شیوعى عێراقى بەبۆنەى رۆژى جیهانى کرێکارانەوە رێپێوانێکى لە بەغدا سازکرد

jamal — Sun, 01 May 2011 15:12:00 GMT

بەغدا/ئەسوات ئەلعێراق: حزبى شیوعى عێراقى، رۆژى یەکشەممە، بەبۆنەى رۆژى جیهانى کرێکارنەوە رێپێوانێكى لەشارى بەغدا رێکخست و تێیدا داوایکرد سیفەتى فەرمانبەر لەسەر کرێکاران لاببرێت و یاساى تایبەت بە رێکخستنى ژیان و کارى کرێکاران دەربکرێت.

پەیامنێرى ئاژانسى(ئەسوات ئەلعێراق) کە لەناو خۆپیشاندانەکەدا ئامادەبوو وتى "خۆپیشاندەران لە گۆڕەپانى فیردەوسەوە بەناو شەقامى سەعدون بەڕێکەوتن تا گەیشتنە گۆڕەپانى تەحریر(ناوەڕاستى بەغدا)".

وتیشى "خۆپیشاندەران کە زۆربەیان سەر بە حزبى شیوعى بوون چەند دروشمێکیان بەرزکردبووەو تێیدا داوایانکردبوو سیفەتى فەرمانبەر لەسەر کرێکاران لاببرێت و یاساى تایبەت بە رێکخستنى ژیان و کارى کرێکاران دەربکرێت".

لەمبارەیەوە ئەندامێکى سەندیکاى کرێکاران بەناوى لەتیف مەشهەدانى بە(ئەسوات ئەلعێراق)ى وت "وەک کرێکارانى عێراق داوا لە ئەنجومەنى نوێنەران وحکومەت دەکەین یاساى کار دەربکەن و سەرجەم ئەو بڕیارانەش هەڵبوەشێننەوە کە دژ بە کرێکاران دەرچوون، هەروەها داوا دەکەن مافى تەواو بەکرێکاران بدرێت، و گەندەڵى و بێکاریى نەمێنێت".
ع ف(خ/ع)- ج پ

سەندیکاى رۆژنامەنووسانى کوردستان پێشێلکارییەکانى دژ بەرۆژنامەنووسان ئیدانە دەکات

jamal — Tue, 03 May 2011 15:31:00 GMT

هەولێر/ئەسوات ئەلعێراق: سەندیکاى رۆژنامەنووسانى کوردستان، رۆژى سێشەممە، هەموو ئەو پێشێلکارییەکانەى ئیدانەکرد کە لەکاتى روماڵکردن و بەجێگەیاندنى کارى رۆژنامەنووسیدا دژ بەرۆژنامەنووسان ئەنجامدەدرێن.

حاکم ئازاد کە سەرۆکى لقى هەولێرى سەندیکاى نابوراوە لەلێدوانێکیدا بە ئاژانسى(ئەسوات ئەلعێراق)ى وت "بەبۆنەى 3ى ئایارى رۆژى جیهانى رۆژنامەنوسییەوە، سەندیکاى رۆژنامەنوسانى کوردستان بەتوندى سەرجەم ئەو پێشێلکارییانە ئیدانە دەکات کە دژ بە رۆژنامەنوسان ئەنجامدەدرێن لەکاتى بەجێگەیاندنى کارەکانیاندا".

ناوبراو داواشی لە رۆژنامەنووسان کرد "لەچوارچێوەى یاساو پاراستنى پرەنسیپ و ئیتیکى کارى رۆنامەنووسیدا کارى خۆیان ئەنجامبدەن".

روونیشیکردەوە کە "ئەو دۆخەى ئێستا لە هەرێمى کوردستاندا هاتۆتە پێشەوە رەنگدانەوەى خراپى بەسەر کارى رۆژنامەوانى دەبێت".

هێماشى بۆ ئەوەکرد کە "سەندیکا پێیوایە ئەو پێشێلکارییانەى دژ بە ئازادى رۆژنامەگەریى ئەنجامدەدەرێن، واتاى پێشێلکردنى یاساى ژمارە 35ى کارى رۆژنامەوانیی دەگەیەنێت".

بەم بۆنەیەوە ئەندامانى سەندیکاى رۆژنامەنووسانى کوردستان لە باڵەخانەى سەندیکادا ئاهەنگیانگێڕا.
ق م(خ/ع)- ج پ

وەزیرى ژنانى عێراق داوادەکات لەسەرجەم پارێزگاکاندا بنکەى گەشەپێدانى تواناکانى ژنان بکرێتەوە

jamal — Sat, 21 May 2011 10:00:00 GMT

واسیت/ئەسوات ئەلعێراق: وەزیرى دەوڵەت بۆ کاروبارى ژنانى عێراق، رۆژى هەینى، داوایکرد لەسەرجەم پارێزگاکانى عێراقدا بنکەى گەشەپێدانى تواناکانى ژنان بکرێتەوە، نیگەرانى خۆشى دەربڕى لەوەى ئەنجومەنى زانکۆى واسیت هیچ ئەندامێکى ژنى نییە.

ئیبتیهال گاسد زەیدى لەمیانى سەردانێکیدا بۆ پارێزگاى واسیت، بە ئاژانسى(ئەسوات ئەلعێراق)ى وت "پێویتسە لەسەرجەم پارێزگاکانى عێراقدا بنکەى گەشەپێدانى تواناکانى ژنان بکرێتەوە، تاکو ژنان بتوانن گەشە بە تواناکانیان بدەن و خۆیان بژێوى خۆیان پەیدابکەن".

وتیشى "دەبێ ژنان فێرى پیشە بکرێن بەجۆرێک کە ببێتە سەرچاوەیەک بۆ خۆژیاندن، بێئەوەى پشت بە مووچەى چاودێرى کۆمەلایەتى ببەستێت".

ئاماژەشیدا بەوەى کە "یەکەمین بنکەى تواناسازى ژنان لە بەغدا کراوەتەوە، لەسەر بودجەى ئەنجومەنى پارێزگاى بەغدا".

وەزیرى ناوبراو نیگەرانى خۆشى دەربڕى لەوەى کە " ئەنجومەنى زانکۆى واسیت هیچ ئەندامێکى نییە لە رەگەزى مێینە، وێڕاى ئەوەى کە زانکۆکە چەندین کادر و ئەکادیمیستى ژنى هەیەو توانى وەرگرتنى پۆستەکانیان هەیە".
غ و(خ/ع)- ج پ

بەبەشدارى موقتەدا سەدر رێپێوانێکى گەورە لەبەغدا بەڕێوەدەچێت

jamal — Thu, 26 May 2011 08:28:00 GMT

بەغدا/ئەسوات ئەلعێراق: بەهەزاران کەس لەهەواداران و لایەنگرانى رەوتى سەدریى، سەرلەبەیانى پێنجشەممە، لەناوچەى سەدرى شارى بەغدا رژانە سەر شەقامەکان و تێیدا موقتەدا سەدرو ژمارەیەک سەرکردەى رەوتەکەى بینراون.

لەمبارەیەوە پەیامنێرى ئاژانسى(ئەسوات ئەلعێراق)لەناو رێپێوانەکەدا وتى "رەوتى سەدرى ئەمڕۆ(پێنجشەممە) داواى ئەنجامدانى ئەم گردبونەوەو رێپێوانەى کردووە بەبۆنەى یادى لەدایکبوونى فاتیمەى زەهرا".

هەر لەسەر ئەم رێپێوانە، ئەمیر کەنانى پەڕلەمانتارى کوتلەى سەدریى دوێنێ بە (ئەسوات ئەلعێراق)ى وت "ئەم خۆپیشاندان و رێپێوانە ملیۆنیە بەبۆنەى یادى لەدایکبوونى فاتیمەى زەهرا بەشێوەیەکى هێمنانەو ئیسلامیانە بەڕێوەدەچێت و تێیدا بە جلى مەدەنى رێپێوانەکە دەستە دەستە بەڕێوەدەچێت، بەشێوەیەک کە هەر دەستەیەک لە 100 کەس پێکبێت".

روونیشیکردەوە کە "زانیارى تەواوى لەبەردەستدا نییە چەند کەس بەشدارى لەم رێپێوانە دەکەن، بەڵام پێشبینیدەکات ژمارەیەکى یەکجار زۆر لە هەواداران بەشداربن".
ح ل(خ/ع)- ج پ

چوار کەس لە رێکخەرانى خۆپیشاندانێک لە شارى بەغدا دەستگیرکران

jamal — Fri, 27 May 2011 12:42:00 GMT

بەغدا/ئەسوات ئەلعێراق: گروپێکى چاڵاکوانى گەنجانى شارى بەغدا، رۆژى هەینى، رایگەیاند کە چوار گەنجى رێکخەرى خۆپیشاندانى گۆڕەپانى تەحریر بەدەستى هێزە ئەمنییەکان دەستگیرکران.

گروپى شەقامە عێراقییەکان لەپێناوى گۆڕان بە ئاژانسى(ئەسوات ئەلعێراق)ى وت "چوار کەس لەو گەنجە چاڵاکوانانەى کە ئەمڕۆ(هەینى) خۆپیشاندانێکیان لە گۆڕەپانى تەحریرى ناوەڕاستى شارى بەغدا رێکخست لەناوى خۆپیشاندانى هەینى بڕیار دەستگیرکران".

وتیشى "چور کەسەکە لەگەڵ نزیکەى 250 کەسى دیکە خۆپیشاندانەکەیان رێکخست و تێیدا رەخنەیان لە شکستى حکومەت گرت لەبەرامبەر کەمى خزمەتگوزاریى وێڕاى تێپەڕبوونى ئەو 100 رۆژەى کە حکومەت وەک وادە بۆ باشترکردنى کارەکانى دەستنیشانى کردبوو".

روونیشیکردەوە کە "چوار کەسەکە لەلایەن هێزێکى فیرقەى 11ى سەر بە سوپاى عێراقی دەستگیرکران و بەرەو شوێنێکى نادیار بردراون".
ع م(خ/ع)- ج پ

بەپێى راپرسییەکى ئەسوات ئەلعێراق زۆرینەى خوێنەران پێیانوایە حکومەتى مالیکیى ناتوانێ چوار ساڵەکەى خۆى تەواو بکات

jamal — Sat, 28 May 2011 13:09:00 GMT

بەغدا/ئەسوات ئەلعێراق: بەپێى راپرسییەکى ئاژانسى(ئەسوات ئەلعێراق) زۆرینەى خوێنەرانى هەردوو بەشى عەرەبى و کوردى پێیانوایە حکومەتى عێراقى ناتوانێ چوار ساڵى تەمەنى خۆى تەواو بکات، بەهۆى ئەو ناکۆییەکى کەوتۆتە نێوان پێکهاتەکانیەوە.

راپرسییەکە لە ماوەى نێوان 9 تا 28ى مانگى ئایار لەسەر روپەڕى هەر سێ بەشى عەرەبى و کوردى و ئینگلیزى پەخشکرابوو، تێیدا 188 دەنگدەر لە کۆى 267 دەنگدەرى بەشى عەرەبی واتە (78.15%) پێیانوایە حکومەتى مالیکیى ناتوانێ چوار ساڵى تەمەنى خۆى تەواو بکات، هاوکات 62 بەشداربوو واتە(23.22%)یان پێیانوایە حکومەتەکە چوار ساڵى خۆى تەواو دەکات، بەتەنها 7 بەشداربوو واتە رێژەى (2.62%) هیچ رایەکیان لەسەر بابەتەکە دەرنەبڕیوە.

لە بەشى کوردیشدا لەکۆى 54 بەشداربوودا 33 یان پێیانوایە حکومەتەکە وادەى دیاریکراوى خۆى تەواو ناکات، واتە (61.11%)، هەروەها 11 یان واتە (20.37%)یان پێیانوایە حکومەتەکە چوار ساڵى خۆى تەواو دەکات، هاوکات 6 دەنگدەر واتە (11.11%)یان بە نازانم وەڵامیان داوەتەوە، 4 بەشداربووش واتە(7.4%) هیچ رایەکیان دەرنەبڕیوە.

بەڵام لە بەشى ئینگلیزیدا کە 237 کەس بەشدارییان لە راپرسییەکەدا کردووە، 118یان پێیانوایە حکومەتەکە دەتوانێت وادەکەى خۆى تەواو بکات، واتە (49.78%)، بەڵام 89 دەنگدەر واتە رێژەى (37.55%) لەوبڕوایەجان کە حکومەتەکە وادەى دیاریکراوى خۆى تەواو ناکات، لەهەمانکاتدا 27 دەنگدەر، (11.39%) بە نازانم وەڵامیان داوەتەوەو 3 بەشداربووش واتە رێژەى (1.26%) هیچ رایەکیان دەرنەبڕیوە.
م هـ ا(خ/ع)- ج پ

وەزارەتى مافەکانى مرۆڤ: دەستورى عێراقی رێگە نادات ئازادى رادەربڕین سنووردار بکرێت

jamal — Mon, 06 Jun 2011 14:24:00 GMT

بەغدا/ئەسوات ئەلعێراق: بریکارى ئیدارى وەزارەتى مافەکانى مرۆڤ، رۆژى دووشەممە، رایگەیاند لە دەستورى عێراقیدا بە راشکاوى ئاماژەدراوە بەوەى کە نابێت ئازادى رادەربڕین سنووردار بکرێت، جگە لەو باباتەنانە نەبێت کە پەیوەستن بە سیستمى گشتى و ئادابەوە.

حوسێن زوهەیرى بەپێى بەیاننامەیەک کە وێنەیەکى دەست ئاژانسى(ئەسوات ئەلعێراق)کەوتووە، رایگەیاندووە "دەستورى عێراقى بە راشکاوى لە ماددەى 38دا باس لەم ئازادییە دەکات و چوارچێوەى گشتى بۆ داناوەو رێگریکردووە لە سنووردارکردنى ئازادییى رادەربڕین تەنها لەو بابەتانە نەبێت کە پەیوەندییان بە سیستمى گشتى و ئادابەوە هەیە".

روونیشیکردۆتەوە کە "لەمبارەیەوە پڕۆژە یاسایەکى تایبەت داڕێژراوەو تێیدا باشترین رێنمایی و پراکتیکە نێودەوڵەتیەکان لەبەرچاوگیراون لەم بوارەدا".
م هـ ا(ب/ع)- ج پ

زۆرینه‌ی‌ خوێنه‌رانی‌ ئه‌سوات ئه‌لعێراق پێیانوایه‌ حكومه‌تی‌ عێراقی‌ له‌واده‌ 100 رۆژییه‌كه‌دا له‌رووی‌ خزمه‌تگوزارییه‌وه‌ سه‌ركه‌وتوو نه‌بووه‌

jamal — Wed, 15 Jun 2011 01:58:00 GMT

به‌غدا/ئه‌سوات ئه‌لعێراق: زۆرینه‌ی‌ خوێنه‌رانی‌ ئاژانسی‌(ئه‌سوات ئه‌لعێراق) له‌ راپرسییه‌كدا پێیانوایه‌ حكومه‌تی‌ عێراقی‌ له‌واده‌ 100 رۆژییه‌كه‌دا نه‌یتوانیوه‌ له‌رووی‌ خزمه‌تگوزارییه‌وه‌ پێشكه‌وتنی‌ به‌رچاو به‌خۆیه‌وه‌ ببینێ‌.

راپرسییه‌كه‌ له‌ماوه‌ی‌ نێوان 28/5/2011 وه‌ تا 14/6/2011 له‌سه‌ر هه‌ر سێ‌ به‌شی‌ عه‌ره‌بی‌ و كوردی‌ و ئینگلیزی ماڵپه‌ڕی‌ ئه‌لیكتڕۆنی‌ ئه‌سوات ئه‌لعێراقدا په‌خش كرابوو، تێیدا له‌ كۆی‌ 313 به‌شداربووی‌ به‌شی‌ عه‌ره‌بیدا 246یان نه‌رێیانه‌ وه‌ڵامی‌ ئه‌م پرسیاره‌یان داوه‌ته‌وه‌(پێتوایە ئەو وادە 100 رۆژییەی‌ کە مالیکیی‌ لە 28ی‌ شوباتەوە رایگەیاندووە پێشکەوتنی‌ بەرچاوی‌ بەخۆوە بینیوە لە پێشکەشکردنی‌ خزمەتگوزارییەکاندا؟) واته‌ رێژه‌ی‌ 78.59%ی‌ به‌شداربووان، هاوكات 54 به‌شداربوویان به‌ به‌ڵی‌ وه‌ڵامی‌ پرسیاره‌كه‌یان داوه‌ته‌وه‌ واته‌ رێژه‌ی‌ 17.25%، له‌هه‌مانكاتدا 13یان به‌ نازانم وه‌ڵامیان داوه‌ته‌وه‌ واته‌ رێژه‌ی‌ 4.15%ی‌ به‌شداربووان.

له‌ به‌شی‌ كوردیشدا له‌ كۆی‌ 38 به‌شداربوو 27یان پێیانوایه‌ ئه‌و واده‌ 100 رۆژییه‌ی‌ كه‌ نوری‌ مالیكیی‌ ده‌ستنیشانی‌ كردبوو له‌ روی‌ پێشكه‌وتنی‌ خزمه‌تگوزارییه‌وه‌ پێشكه‌وتنی‌ به‌خۆیه‌وه‌ نه‌بینیوه‌، واته‌ رێژه‌ی‌ 71.05%ی‌ به‌شداربووان، هه‌روه‌ها 7 به‌شداربوو به‌به‌لێ‌ وه‌ڵامی‌ پرسیاره‌كه‌یان داوه‌ته‌وه‌ واته‌ رێژه‌ی‌ 18.42%، له‌ هه‌مانكاتدا 4 به‌شداربوو به‌ نازانم وه‌ڵامیان داوه‌ته‌وه‌ كه‌ ده‌كاته‌ رێژه‌ی‌ 10.52%ی‌ به‌شداران.

هه‌رچی‌ له‌ به‌شی‌ ئینگلیزییه‌ 303 كه‌س له‌راپرسییه‌كه‌دا به‌شداربووه‌و تێیدا 192یان واته‌ رێژه‌ی‌ 63.36% پێیانوایه‌ حكومه‌ت نه‌یتوانیوه‌ له‌م واده‌یه‌دا كاری‌ به‌رچاو ئه‌نجامبدات، له‌هه‌مانكاتدا 70 به‌شداربوو پێچه‌وانه‌ی‌ ئه‌وانه‌ ده‌نگیانداوه‌ واته‌ رێژه‌ی‌ 23.1%، به‌ڵام 41 به‌شداربوو واته‌ رێژه‌ی‌ 13.53% ی‌ به‌شداربوونی‌ ئه‌م به‌شه‌ به‌ نازانم وه‌ڵامیان داوه‌ته‌وه‌.
ج پ(خ)

سه‌دان كه‌س له‌ كورده‌كانی‌ سوریا دژ به‌ رژێمی‌ به‌شار ئه‌سه‌د خۆپیشاندانێكیان له‌ هه‌ولێر رێكخست

jamal — Mon, 27 Jun 2011 13:35:00 GMT

هه‌ولێر/ئه‌سوات ئه‌لعێراق: سه‌دان كه‌س له‌ كورده‌كانی‌ سوریای‌ نیشته‌جێی‌ هه‌رێمی‌ كوردستان، رۆژی‌ دووشه‌ممه‌، له‌به‌رده‌م نوسینگه‌ی‌ رێكخراوی‌ نه‌ته‌وه‌ یه‌كگرتووه‌كان له‌ شاری‌ هه‌ولێر خۆپیشاندانێكیان رێكخست بۆ پرۆتێستۆكردنی‌ "سه‌ركوتكردنی‌ خۆپیشانده‌ران"له‌لایه‌ن رژێمی‌ به‌شار ئه‌سه‌ده‌وه‌.

خۆپیشانده‌ران به‌ره‌زكردنه‌وه‌دروشمی‌(گه‌ل ده‌یه‌وێت رژێم بڕوخێت)‌و(تاكه‌ی‌ بێده‌نگی‌ له‌به‌رامبه‌ر رژێمی‌ ئه‌سه‌د)‌و(به‌ره‌و سوریایه‌كی‌ نوێی‌ دیموكراتی‌ له‌ژێر سایه‌ی‌ سیستمی‌ په‌ڕله‌مانی‌‌و داننانی‌ ده‌ستوری‌ به‌ مافه‌كانی‌ كورد)یان به‌رزكردبووه‌وه‌، هه‌روه‌ها ئاڵای‌ سه‌رده‌می‌ سه‌ربه‌خۆیی‌ سوریاو كوردستانیان به‌رزكردبووه‌وه‌.

له‌مباره‌یه‌وه‌ ئیبراهیم په‌هله‌وی‌ كه‌ یه‌كێك بوو له‌ رێكخه‌رانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "هاتوین داوا له‌ ئه‌نجومه‌نی‌ ئاسایشی‌ نێوده‌وڵه‌تی‌ بكه‌ین كاربكات بۆ راگرتنی‌ كرده‌وه‌ نامرۆیه‌ه‌كانی‌ دژ به‌ گه‌لی‌ سوریا به‌ ته‌واوی‌ پێكهاته‌كانیه‌وه‌".

وتیشی‌ "یاداشتێكمان دا به‌ نوسینگه‌ی‌ رێكخراوی‌ نه‌ته‌وه‌ یه‌كگرتووه‌كان له‌ هه‌ولێر".
هێماشی‌ بۆ ئه‌وه‌كرد كه‌ "زیاتر له‌ سێ‌ مانگه‌ رژێمی‌ سوریا خۆپیشانده‌ران سه‌ركوت ده‌كات‌و تاوان ده‌رهه‌ق به‌ میلله‌ت ئه‌نجامده‌دات".

هاوكات له‌گه‌ڵ كورده‌كانی‌ سوریادا ده‌یان كه‌سی‌ خه‌ڵكی‌ هه‌رێمی‌ كوردستان له‌م خۆپیشاندانه‌دا به‌شداربوون.
ق م(خ/ع)- ج پ

سه‌دان كه‌س له‌ ناسریه‌ له‌ خۆپیشاندانێكدا داوای‌ فیدڕالییه‌تی‌ باشووری‌ عێراقیان كرد

jamal — Sun, 03 Jul 2011 11:54:00 GMT

زیقاڕ/ئه‌سوات ئه‌لعێراق: نزیكه‌ی‌ 500 كه‌س له‌ دانیشتوانی‌ شاری‌ ناسریه‌، رۆژی‌ یه‌كشه‌ممه‌، له‌میانی‌ خۆپیشاندانێكدا بۆ به‌رده‌م ئه‌نجومه‌نی‌ پارێزگای‌ زیقاڕدا داوای‌ فیدڕالییه‌تی‌ باشوری‌ عێراقییان كرد.

عه‌هد موسه‌وی‌ كه‌ یه‌كێك له‌ رێكخرانی‌ خۆپیشاندانه‌كه‌ بوو به‌ ئاژانسی‌(ئه‌سوات ئه‌لعێراق)ی‌ وت "ئه‌مڕۆ به‌مه‌به‌ستی‌ داواكردنی‌ فیدڕالییه‌تی‌ باشوری‌ عێراق هاتووینه‌ته‌ ده‌ره‌وه‌ له‌سه‌ر بنه‌مای‌ جوگرافی‌، نه‌ك له‌سه‌ر بنه‌مای‌ تایه‌فی‌ وه‌ك كه‌ ئوسامه‌ نوجه‌یفی سه‌رۆكی‌ په‌ڕله‌مان داوایكردبوو، چونكه‌ فیدرالییه‌ت مافی‌ هاوڵاتیان دابینده‌كات‌و باری‌ خزمه‌تگوزاریی‌ باشتر ده‌كات".

وتیشی‌ "هه‌روه‌ها له‌میانی‌ ئه‌م خۆپیشاندانه‌دا داوای‌ ته‌رخانكردنی‌ پارچه‌ زه‌ویی‌ ده‌كه‌ین بۆ ئه‌و كه‌سانه‌ی‌ كه‌ پێشتر دژ به‌ رژێمی‌ به‌عس خه‌باتیان كردووه‌ چونكه‌ ئه‌وان روبه‌ڕووی‌ توندوتیژیی‌ بووینه‌ته‌وه‌".

جێی‌ باسه‌ نوجه‌یفی هه‌فته‌ی‌ رابردوو له‌ میانی‌ سه‌ردانێكیدا بۆ ئه‌مریكا له‌ چاوپێكه‌وتنێكدا رایگه‌یاند كه‌ سوننه‌كانی‌ عێراق به‌هۆی‌ ئه‌وه‌ی‌ په‌راوێزخراون ره‌نگه‌ داوای‌ فیدڕالییه‌تێك بكه‌ن بۆ خۆیان، ئه‌م لێدوانه‌شی‌ بووه‌ مایه‌ی‌ ناڕه‌زایی‌ چه‌ندین لایه‌نی‌ عێراقی.
و ط (خ/ع)- ج پ

خۆپیشاندانێك له‌ خانه‌قین وه‌ك ناڕه‌زایی‌ ده‌ربڕین دژ به‌ گرتنه‌وه‌ی‌ ئاوی‌ ئه‌لوه‌ند به‌ڕێوه‌چوو

jamal — Sun, 10 Jul 2011 12:11:00 GMT

دیاله‌/ئه‌سوات ئه‌لعێراق: نزیكه‌ی‌ 50 كه‌س له‌ نوێنه‌رانی‌ رێكخراوه‌كانی‌ كۆمه‌ڵگای‌ مه‌ده‌نی‌، رۆژی‌ یه‌كشه‌ممه‌، وه‌ك ناڕه‌زایی‌ ده‌ربڕین دژ به‌گرتنه‌وه‌ی‌ ئاوی‌ رووباری‌ ئه‌ڵوه‌ند له‌لایه‌ن ئێرانه‌وه‌ هاتنه‌ سه‌ر شه‌قامه‌كان‌و رێگه‌ی‌ سه‌ره‌كی‌ خاڵی‌ سنووری‌ مونزرییه‌یان گرت.

له‌مباره‌یه‌وه‌ سه‌رچاوه‌یه‌كی‌ ئه‌منی‌ به‌ ئاژانسی‌(ئه‌سوات ئه‌لعێراق)ی‌ وت "نزیكه‌ی‌ 50 كه‌س له‌ نوێنه‌رانی‌ رێكخراوه‌كانی‌ كۆمه‌ڵی‌ مه‌ده‌نی‌ خانه‌قین، له‌ نزیك خاڵی‌ سنووری‌ مونزرییه‌ی‌ نێوان عێراق‌و ئێران، خۆپیشاندانێكیان رێكخست‌و رێگه‌كه‌یان گرت".

وتیشی‌ "هۆكاری‌ ئه‌م خۆپیشاندانه‌ گرتنه‌وه‌ی‌ ئاوی‌ رووباری‌ ئه‌لوه‌نده‌ له‌لایه‌ن ئێرانه‌وه‌".
هێماشی‌ بۆ ئه‌وه‌كرد كه‌ "خۆپیشانده‌ران رێگه‌یان نه‌دا سه‌ردانكه‌ره‌ ئێرانییه‌كان به‌م رێگایه‌دا بێنه‌ ناو خاكی‌ عێراقه‌وه‌".

هه‌روه‌ها وتی‌ "لایه‌نی‌ ئێرانی‌ ئاماده‌نه‌بوون گوێ‌ له‌داواكانی‌ خۆپیشانده‌ران بگرن، به‌ڵام بڕیاروایه‌ هێزه‌ ئه‌منییه‌كانی‌ پارێزگای‌ دیاله‌ له‌گه‌ڵیان كۆببنه‌وه‌ بۆ چاره‌سه‌ركردنی‌ گرفته‌كه‌".
ح م ا(خ/ع)- ج پ

سه‌دان كه‌س له‌ به‌غدا به‌بۆنه‌ی‌ شۆڕشی‌ 14ی‌ ته‌مموزه‌وه‌ رێپێوانێكیان رێكخست

jamal — Thu, 14 Jul 2011 10:54:00 GMT

به‌غدا/ئه‌سوات ئه‌لعێراق: سه‌دان كه‌سی‌ دانیشتووی‌ شاری‌ به‌غدا، رۆژی‌ پێنجشه‌ممه‌، به‌بۆنه‌ی‌ شۆڕشی‌ 14ی‌ ته‌مموزی‌ ساڵی‌ 1958ه‌وه‌ رێپێوانێكیان له‌ گۆڕه‌پانی‌ فیرده‌وسه‌وه‌ به‌ره‌و گۆڕه‌پانی‌ ته‌حریر رێكخست.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق)كه‌ له‌ناو خۆپیشاندانه‌دا بوو، وتی‌ "رێپێوانه‌كه‌ به‌به‌شداری‌ سه‌دان كه‌س له‌لایه‌ن حزبی‌ شیوعی‌ عێراقه‌وه‌ رێكخرابوو‌و تێیدا هه‌وادارانی‌ عه‌بدولكه‌ریم قاسمی‌ سه‌رۆكی‌ ئه‌و شۆڕشه‌‌و كورده‌ فه‌یلییه‌كان به‌شداربوون".

روونیشیكرده‌وه‌ كه‌ هێزه‌ ئه‌منییه‌كان به‌مه‌به‌ستی‌ پاراستنی‌ خۆپیشانده‌ران ناوچه‌كه‌یان گه‌مارۆدا".

ئه‌بو ئه‌حمه‌د كه‌ یه‌كێك بو له‌ رێكخه‌رانی‌ رێپێوانه‌كه‌ به‌(ئه‌سوات ئه‌لعێراق)ی‌ وت "ئه‌م شۆڕه‌شه‌ كۆتاییهێنا به‌ رژێمی‌ فیودالیی‌و پادشایه‌تی‌، هه‌روه‌ها به‌ پره‌نسیپی‌ نوێوه‌ واقیعی كۆمه‌ڵگای‌ عێراقی‌ گۆڕی‌".

شۆڕشی‌ 14ی‌ ته‌مموز هه‌ندێك جار به‌ بزاڤ‌و كوده‌تاش وه‌سفده‌كرێت، له‌ ساڵی‌ 1958دا رژێمی‌ پادشایه‌تی‌ عێراقی‌ گۆڕی‌ ئه‌و كاته‌ی‌ كه‌ شا فه‌یسه‌ڵی‌ دووه‌م پادشای‌ عێراق بوو، پاشان كۆماری‌ عێراق راگه‌یه‌نرا.
م ص ب(خ/ع)- ج پ

سێیه‌مین كۆنگره‌ی‌ سه‌ندیكای‌ رۆژنامه‌نووسانی‌ كوردستان ده‌ستی‌ به‌كاره‌كانی‌ كرد

jamal — Thu, 21 Jul 2011 12:27:00 GMT

هه‌ولێر/ئه‌سوات ئه‌لعێراق: سێیه‌مین كۆنگره‌ی‌ سه‌ندیكای‌ رۆژنامه‌نووسانی‌ كوردستان، رۆژی‌ پێنجشه‌ممه‌، له‌ شاری‌ هه‌ولێر ده‌ستی‌ به‌كاره‌كانی‌ كرد، به‌پێی‌ ئه‌ندامێكی‌ كۆنگره‌كه‌.

ئازاد حه‌مه‌ده‌مین به‌ ئاژانسی‌(ئه‌سوات ئه‌لعێراق)ی‌ وت "سێیه‌مین كۆنگره‌ی‌ سه‌ندیكای‌ رۆژنامه‌نووسان، ئه‌مڕۆ(پێنجشه‌ممه‌) له‌ هۆڵی‌ پێشه‌وا له‌ناو باڵه‌خانه‌ی‌ وه‌زاره‌تی‌ رۆشنبیری‌‌و لاوان به‌ئاماده‌بوونی‌ سه‌رۆكی‌ په‌ڕله‌مانی‌ كوردستان كه‌مال كه‌ركوكی‌‌و نه‌قیبی‌ سه‌ندیكای‌ رۆژنامه‌نووسانی‌ عێراق موئه‌یه‌د لامی‌‌و ژماره‌یه‌ك رۆژنامه‌نووس ده‌ستی‌ به‌كاره‌كانی‌ كرد".

وتیشی‌ "كۆنگره‌كه‌ ماوه‌ی‌ سێ‌ رۆژ به‌رده‌وام ده‌بێت‌و تێیدا نه‌قیبێكی‌ نوێ‌ بۆ سه‌ندیكاكه‌ هه‌ڵده‌بژێردرێت".
ق م(خ/ع)- ج پ

سه‌ندیكای‌ رۆژنامه‌نووسانی‌ كوردستان ده‌سته‌یه‌كی‌ كارگێری‌ نویی‌ به‌ ته‌وافوق ده‌ستنیشانكرد

jamal — Sat, 23 Jul 2011 18:21:00 GMT

هه‌ولێر/ئه‌سوات ئه‌لعێراق: سه‌ندیكای‌ رۆژنامه‌نووسانی‌ كوردستان، ئێواره‌ی‌ شه‌ممه‌، له‌میانی‌ كاره‌كانی‌ سێیه‌مین كۆنگره‌ی‌ خۆیدا ده‌ستیه‌كی‌ نوێی‌ به‌ته‌وافوق هه‌ڵبژارد، هاوكات ئه‌ندامانی‌ سه‌ر به‌ یه‌كگرتووی‌ ئیسلامی‌‌و كۆمه‌ڵی‌ ئیسلامی‌ له‌ هۆڵی‌ كۆنگره‌كه‌دا چوونه‌ ده‌ره‌وه‌.

له‌ كۆتایی‌ كۆنگره‌كه‌دا ستافی‌ نویێ‌ سه‌ندیكا به‌م شێوه‌یه‌ ده‌ستنیشانكرا، ئازاد حه‌مه‌ده‌مین له‌ پارتی‌ دیموكراتی‌ كوردستانه‌وه‌ به‌ نه‌قیبی‌ سه‌ندیكا‌و شوان داوودی‌ له‌ یه‌كێتیی‌ نیشتیمانی‌ كوردستان به‌ جێگری‌ نه‌قیب ده‌ستنیشانكران، هه‌روه‌ها نوێنه‌رانی‌ حزبی‌ شیوعی‌ كوردستان‌و حزبی‌ زه‌حمه‌تكێشان‌و سۆسیالیست‌و بزوتنه‌وه‌ی‌ ئیسلامی‌‌و توركمان‌و ئاشورییه‌كان‌و پارتی‌ پارێزگارانیش وه‌ك ئه‌ندامی‌ ستافه‌كه‌ ده‌ستنیشانكران.

هه‌ر له‌م كۆنگره‌یه‌دا‌و له‌كاتی‌ ده‌ستنیشانكردنی‌ ستافه‌كه‌دا ئه‌ندامانی‌ سه‌ر به‌ یه‌كگرتووی‌ ئیسلامی‌‌و كۆمه‌ڵی‌ ئیسلامی‌ كه‌ ژماره‌یان 43 كه‌س بوو له‌كۆی‌ 286 ئه‌ندامه‌كه‌ی‌ كۆنگره‌دا، هۆڵی‌ كۆنگره‌یان جێهێشت.
له‌مباره‌یه‌وه‌ حامید محه‌مه‌د عه‌لی‌ سكرتێری‌ پێشووی‌ سه‌ندیكا كه‌ نوێنه‌ری‌ یه‌كگرتووی‌ ئیسلامی‌ كوردستان بوو رایگه‌یاند ئه‌وان بۆیه‌ بایكۆتی‌ كۆنگه‌ره‌كه‌یان كردووه‌ "چونكه‌ ستافی‌ سه‌ندیكا به‌ ته‌وافوق ده‌ستنیشانكراوه‌ له‌كاتێكدا ده‌مانه‌و‌یست له‌رێگه‌ی‌ پرۆسه‌يه‌كی‌ دیموكراتیدا ده‌ستنیشانبكرێ".

جێی‌ باسه‌ له‌سه‌ره‌تای‌ دامه‌زراندنی‌ سه‌ندیكاكه‌وه‌ ستافی‌ سه‌ندیكا له‌رێگه‌ی‌ ته‌وافوقه‌وه‌ ده‌ستنیشان ده‌كرێت‌و له‌وكاته‌وه‌ نه‌قیبی‌ سه‌ندیكا پشكی‌ پارتی‌ دیموكراتی‌ كوردستانه‌‌و جێگه‌ركه‌شی‌ پشكی‌ یه‌كێتیی‌ نیشتیمانی‌ كوردستانه‌، هاوكات ئه‌ندامانی‌ ئه‌نجومه‌نی‌ سه‌ندیكا له‌ نوێنه‌رانی‌ حزبه‌كانی‌ تری‌ كوردستان پێكدێن.
ك ن م(خ/ع)- ج پ

خوێندكارانی‌ زانكۆی‌ دیجله‌ به‌هۆی‌ زۆری‌ رێژه‌ی‌ ده‌رنه‌چووانه‌وه‌ خۆپیشاندانێكی‌ ناڕه‌زاییان رێكخست

jamal — Sun, 24 Jul 2011 11:51:00 GMT

هه‌ولێر/ئه‌سوات ئه‌لعێراق: ده‌یان خوێندكاری‌ زانكۆی‌ دیجله‌ له‌ شاری‌ هه‌ولێر، رۆژی‌ یه‌كشه‌ممه‌، به‌هۆی‌ ده‌رنه‌چوونی‌ زیاتر له‌ 90%ی‌ خوێندكارانیان له‌ تاقیكردنه‌وه‌كانی‌ كۆتاییدا خۆپیشاندانێكیان له‌به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵا‌و توێژینه‌وه‌ی‌ زانستی‌ رێكخست.

له‌مباره‌یه‌وه‌ خوێندكار هیوا ئه‌مین كه‌ له‌ قۆناغی‌ دووه‌می‌ كۆلیژه‌ وتی‌ "دوای‌ ئه‌وه‌ی‌ رۆژی‌ پێنجشه‌ممه‌ی‌ رابردوو ئه‌نجامه‌كانی‌ كۆتایی‌ تاقیكردنه‌وه‌كانمان وه‌رگرته‌وه‌، بڕیارماندا وه‌ك ناڕه‌زاییه‌ك له‌به‌رامبه‌ر زۆری‌ رێژه‌ی‌ ده‌رنه‌چوونمان كه‌ زیاتر له‌ 90%ه‌ ئه‌م خۆپیشاندانه‌ ناڕه‌زاییه‌ ئه‌نجامبده‌ین".

روونیشیكرده‌وه‌ كه‌ "ئه‌نجامه‌كان چاوه‌ڕوان نه‌كراو بوون، به‌وپێیه‌ی‌ كه‌ رێژه‌ی‌ ده‌رنه‌چوون زۆر به‌رز بووه‌، ئه‌مه‌ش واتای‌ به‌هه‌ده‌رچوونی‌ هه‌وڵی‌ هه‌موو خوێندكاره‌كان ده‌گه‌یه‌نێت".

ئاماژه‌شیدا به‌وه‌ی‌ كه‌ "ئه‌م رێژه‌ زۆره‌ی‌ ده‌رنه‌چوون بێجگه‌ له‌ قۆناغی‌ چواره‌م سه‌رجه‌م قۆناغه‌كانی‌ تری‌ گرتۆته‌وه‌".

هه‌روه‌ها وریا محه‌مه‌د كه‌ خوێندكاری‌ قۆناغی‌ دووه‌مه‌، به‌ ئاژانسی‌(ئه‌سوات ئه‌لعێراق)ی‌ وت "تاقیكردنه‌وه‌كان دابه‌شببوونه‌ سه‌ر دوو كۆرس، كۆرسی‌ یه‌كه‌میان 40 نمره‌ بووه‌‌و دووهه‌میشیان 60 نمره‌ی‌ له‌سه‌ر بوه‌، به‌ڵام به‌هیچ شێوه‌یه‌ك نمره‌كانی‌ كۆرسی‌ یه‌كه‌م حساب نه‌كراوه‌، ئه‌مه‌ش بۆته‌ هۆی‌ زۆری‌ رێژه‌ی‌ ده‌رنه‌چوون".

وتیشی‌ "تا ئێستا هۆكاره‌كانی‌ حساب نه‌كردنی‌ نمره‌كانی‌ كۆرسی‌ یه‌كه‌م دیار نین، ئاخۆ ئایا به‌هۆی‌ هه‌ڵه‌ی‌ ته‌كنیكییه‌وه‌ بوه‌ یان له‌لایه‌ن به‌رپرسانی‌ كۆلیژه‌وه‌ بڕیاری‌ له‌سه‌ردراوه‌".

داواشی‌ له‌ وه‌زاره‌تی‌ خوێندنی‌ باڵا كرد"چاره‌سه‌رێك بۆ ئه‌م گرفته‌ بدۆزێته‌وه‌، كه‌ راسته‌وخۆ كاریگه‌ری‌ به‌سه‌ر ئاینده‌ی‌ ده‌یان خوێندكاره‌وه‌ هه‌یه‌".
ق م(خ/ع)- ج پ

خۆپیشاندانێك له‌ هه‌ولێر دژ به‌ تۆپبارانكردنی‌ هه‌رێمی‌ كوردستان له‌به‌رده‌م كونسوڵگه‌ریی‌ ئێرانی‌ به‌ڕێوه‌چوو

jamal — Tue, 26 Jul 2011 13:45:00 GMT

هه‌ولێر/ئه‌سوات ئه‌لعێراق: سه‌دان كه‌س له‌ چاڵاكوانانی‌ بواری‌ كۆمه‌ڵگای‌ مه‌ده‌نی‌، رۆژی‌ سێشه‌ممه‌، له‌به‌رده‌م كونسوڵگه‌ریی‌ ئێران له‌ شاری‌ هه‌ولێر خۆپیشاندانێكی‌ ناڕه‌زاییان دژ به‌ تۆپبارانكردنی‌ ناوچه‌ سنوورییه‌كانی‌ هه‌رێمی‌ كوردستان رێكخست.

سه‌روره‌ محه‌مه‌د كه‌ یه‌كێك بوو له‌ رێكخرانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "400 چاڵاكوانی‌ بواری‌ كۆمه‌ڵگای‌ مه‌ده‌نی‌، ئه‌مڕۆ(سێشه‌ممه‌) بۆ داواكردنی‌ وه‌ستانی‌ تۆپبارانكردنی‌ ناوچه‌ سنوورییه‌كانی‌ هه‌رێمی‌ كوردستان له‌لایه‌ن سوپای‌ ئێرانه‌وه‌ ئه‌م خۆپیشاندانه‌یان رێكخست".

وتیشی‌ "خۆپیشانده‌رن ره‌خنه‌یان له‌ بێده‌نگی‌ حكومه‌تی‌ عێراقی‌ گرت به‌هۆی‌ ئه‌وه‌ی‌ تاكو ئێستا هیچ هه‌ڵوێستێكی‌ فه‌رمی‌ دژ به‌م تۆپبارانكردنه‌ نه‌بووه‌‌و داواشیان كرد حكومه‌ته‌كه‌ هه‌وڵی‌ بۆ وه‌ستاندنی‌ ئه‌م پێشێلكارییه‌ بدات".

هێماشی‌ بۆ ئه‌وه‌كرد كه‌ "خۆپیشانده‌ران ئه‌م هێرشانه‌ی‌ ئێران به‌ پێشێلكردنی‌ مافه‌كانی‌ مرۆڤ‌و به‌ڵگه‌نامه‌ نێوده‌وڵه‌تییه‌كان‌و سه‌روه‌ری‌ عێراق وه‌سفكرد".

جێی‌ باسه‌ ناوچه‌ سنوورییه‌كانی‌ هه‌رێمی‌ كوردستان له‌ئێستادا له‌لایه‌ن تۆپخانه‌كانی‌ ئێرانه‌وه‌ به‌بیانوی‌ لێدان له‌ پێگه‌‌و باره‌گاكانی‌ پژاكه‌وه‌ تۆپباران ده‌كرێن‌و بۆته‌ هۆی‌ ئاواره‌بوونی‌ دانیشتوانی‌ ناوچه‌كه‌‌و زیانگه‌‌یاندن به‌ مه‌ڕو ماڵات‌و كشتوكاڵی‌ ناوچه‌كان، هه‌ر له‌ماوه‌ی‌ دوو رۆژی‌ رابردوودا دوو كه‌سی‌ مه‌ده‌نی‌ به‌هۆی‌ ئه‌م تۆپبارانه‌ كوژراون‌و سیانی‌ دیكه‌ش برینداربوون.
ق م(خ/ع)- ج پ

خۆپیشانده‌رانی‌ خانه‌قین به‌هۆی‌ وشككردنی‌ ئاوی‌ ئه‌ڵوه‌نده‌وه‌ خاڵی‌ سنووری‌ مونزرییه‌یان داخست

jamal — Sun, 31 Jul 2011 15:39:00 GMT

دیاله‌/ئه‌سوات ئه‌لعێراق: ده‌یان خۆپیشانده‌ری‌ شاری‌ خانه‌قین، رۆژی‌ یه‌كشه‌ممه‌، وه‌ك ناڕه‌زایی‌ ده‌ربڕین له‌به‌رامبه‌ره‌ وشككردنی‌ ئاوی‌ ئه‌ڵوه‌ند له‌لایه‌ن ئێرانه‌وه‌، رێگه‌ی‌ سه‌ره‌كیی‌ خاڵی‌ سنووری‌ مونزرییه‌یان داخست، به‌پێی‌ به‌ڕێوبه‌ری‌ ده‌رامه‌ته‌ ئاوییه‌كانی‌ دیاله‌.

ئه‌ندازیار باسم مه‌جید به‌ ئاژانسی‌(ئه‌سوات ئه‌لعێراق)ی‌ وت "ده‌یان خۆپیشانده‌ری‌ شاری‌ خانه‌قین، ئه‌مڕۆ(یه‌كشه‌ممه‌) رێگه‌ی‌ سه‌ره‌كی‌ خاڵی‌ سنووری‌ مونزرییه‌ی‌ نێوان عێراق‌و ئێرانیان به‌ده‌م بارهه‌ڵگره‌كاندا داخست، وه‌ك ناڕه‌زاییه‌ك له‌به‌رامبه‌ر وشكردنی‌ ئاوی‌ روباری‌ ئه‌ڵوه‌ند له‌لایه‌ن ده‌سه‌ڵاتدارانی‌ ئێرانه‌وه‌".

روونیشیكرده‌وه‌ كه‌ "لیژنه‌یه‌كی‌ حكومی‌ به‌سه‌رۆكایه‌تی‌ پارێزگاری‌ دیاله‌ عه‌بدوڵناسر مه‌هداوی‌‌و ئه‌ندامێتی‌ نوێنه‌رانی‌ ئه‌نجومه‌نی‌ پارێزگاكه‌‌و فه‌رمانگه‌كانی‌ ده‌رامه‌ته‌ ئاویی‌‌و كشتوكاڵییه‌كان پێكهێنراوه‌‌و به‌ره‌و پارێزگای‌ كرمانشاهی‌ ئێرانی‌ به‌ڕێده‌كه‌وێت تا له‌گه‌ڵ به‌رپرسانی‌ ئه‌وێدا ئه‌م بابه‌ته‌ تاووتوێبكه‌ن".

روباری‌ ئه‌ڵوه‌ند له‌ لوتكه‌ی‌ چیای‌ داڵاهۆی‌ سه‌ر به‌ پارێزگای‌ كرمانشاهی‌ ئێرانی‌ سه‌رچاوه‌ده‌گرێت‌و به‌ناو شاری‌ خانه‌قیندا تێپه‌ڕده‌بێت‌و پاشان له‌گه‌ڵ روباری‌ سیرواندا یه‌كده‌گرنه‌وه‌‌و روباری‌ دیاله‌ پێكده‌هێنن‌و دواتر ده‌ڕژێته‌ نێو روباری‌ دیجله‌وه‌، ئه‌م روباره‌ سه‌رچاوه‌ی‌ سه‌ره‌كییه‌ بۆ خه‌ڵكی‌ ناوچه‌كه‌ كه‌ بۆ كشتوكاڵ سودی‌ لێوه‌رده‌گرن.

ح م ا(خ/ع)- ج پ

خۆپیشاندانێك له‌ خانه‌قین بۆ ناڕه‌زایی ده‌ربڕین به‌رامبه‌ر به‌ پچڕانی‌ كاره‌با به‌ڕێوه‌چوو

jamal — Thu, 04 Aug 2011 12:35:00 GMT

دیاله‌/ئه‌سوات ئه‌لعێراق: ده‌یان كه‌س له‌ دانیشتوانی‌ قه‌زای‌ خانه‌قین، رۆژی‌ پێنجشه‌ممه‌، به‌هۆی‌ پچڕانی‌ به‌رده‌وامی‌ ته‌زووی‌ كاره‌باوه‌ رژانه‌ سه‌ر شه‌قامه‌كان‌و داوایانكرد به‌ڕێوبه‌ری‌ كاره‌بای‌ قه‌زاكه‌ له‌سه‌ر كار لابدرێت.

له‌مباره‌یه‌وه‌ دلێر حه‌سه‌ن ئه‌ندامی‌ ئه‌نجومه‌نی‌ پارێزگای‌ دیاله‌ به‌ ئاژانسی‌(ئه‌سوات ئه‌لعێراق)ی‌ وت "ده‌یان كه‌س له‌ دانیشتوانی‌ قه‌زای‌ خانه‌قین بۆ ناڕه‌زایی ده‌ربڕین به‌رامبه‌ر به‌ پچڕانی‌ ته‌زووی‌ كاره‌باوه‌ له‌به‌رده‌م باڵه‌خانه‌ی‌ قائیمقامیه‌تدا داوای له‌كارلادانی‌ به‌ڕێوبه‌ری‌ كاره‌بایان كرد".

روونیشیكرده‌وه‌ كه‌ "كاره‌بای‌ پارێزگای‌ دیاله‌ له‌ رۆژێكدا 12 كاتژمێر ده‌بڕێت، له‌به‌رامبه‌ردا ته‌نها دوو كاتژمێر ده‌درێت".
ح م ا(خ/ع)- ج پ

زۆرینه‌ی‌ خوێنه‌رانی‌ ئه‌سوات ئه‌لعێراق پێشبینی ئه‌نجامدانی‌ هه‌ڵبژاردنێكی‌ پێشوه‌خت ده‌كه‌ن له‌ عێراقدا

jamal — Mon, 15 Aug 2011 01:17:00 GMT

به‌غدا/ئەسوات ئەلعێراق: بەپێی‌ راپرسییەکی‌ ئاژانسی‌(ئەسوات ئەلعێراق) زۆرینەی‌ خوێنەرانی‌ هەردوو بەشی‌ عەرەبی‌ و کوردی‌ پێشبینیده‌كه‌ن بۆ ده‌رچوون له‌م قه‌یرانه‌ی‌ سیاسییه‌ی‌ عێراقدا هه‌ڵبژاردنێكی‌ پێشوه‌خت ئه‌نجامبدرێت.

راپرسییەکە لە ماوەی‌ نێوان 14/6/2011 تا 13/8/2011 لەسەر روپەڕی‌ هەر سێ بەشی‌ عەرەبی‌‌و کوردی‌‌و ئینگلیزی‌ پەخشکرابوو، تێیدا 138 دەنگدەر لە کۆی‌ 698 دەنگدەری‌ بەشی‌ عەرەبی واتە (19.88%) پێیانوایە هه‌وڵه‌كانی‌ له‌یه‌كترنزیكبوونه‌وه‌ی‌ لایه‌نه‌كان سه‌رده‌گرێت، هاوکات 165 بەشداربوو واتە(23.77%)یان پێیانوایه‌ پێكهێنانی‌ حكومه‌تی‌ زۆرینه‌ چاره‌سه‌ره‌ له‌عێراقدا، له‌هه‌مانكاتدا 309 ده‌نگده‌ر واته‌ رێژه‌ی‌(44.52%) پێشبینیده‌كه‌ن بۆ ده‌رچوون له‌م قه‌یرانه‌ی‌ سیاسییه‌ی‌ عێراقدا هه‌ڵبژاردنێكی‌ پێشوه‌خت ئه‌نجامبدرێت. له‌كۆتاییشدا 82 ده‌نگده‌ر واته‌ (%11.81) به‌ نازانم وه‌ڵامیان داوه‌ته‌وه‌.

لە بەشی‌ کوردیشدا لەکۆی‌ 166 بەشداربوودا 39 یان پێیانوایە هه‌وڵه‌كانی‌ له‌یه‌كترنزیكبوونه‌وه‌ی‌ لایه‌نه‌كان سه‌رده‌گرێت‌و حكومه‌ته‌كه‌ی‌ ئێستا به‌رده‌وامده‌بێت، واتە (23.49%)، هەروەها 34یان پێیانوایه‌ پێكهێنانی‌ حكومه‌تی‌ زۆرینه‌ چاره‌سه‌ره‌ له‌عێراقدا واتە رێژه‌ی‌ (20.48%)، له‌هه‌مانكاتدا 76 ده‌نگده‌ریان پێشبینیده‌كه‌ن هه‌ڵبژاردنێكی‌ پێشوه‌خت ئه‌نجامبدرێت واتا رێژه‌ی‌(45.78%). ته‌نها 17 دەنگدەریش واتە (10.24%)یان بە نازانم وەڵامیان داوەتەوە.

بەڵام لە بەشی‌ ئینگلیزیدا بۆچوونه‌كان پێچه‌وانه‌ی‌ هه‌ردوو به‌شی‌ عه‌ره‌بی‌‌و كوردی‌ بوون‌، به‌وه‌ی‌ کە له‌كۆی‌ 481 به‌شداربوودا 108یان هه‌وڵه‌كانی‌ له‌یه‌كترنزیكبوونه‌وه‌ی‌ لایه‌نه‌كان سه‌رده‌گرێت، واته‌ رێژه‌ی‌ (22.45%)، له‌هه‌مانكاتدا رێژه‌ی‌ زۆرتری‌ ده‌نگده‌ران 232 به‌شداربوو واتا رێژه‌ی‌ (48.23%) پێیانوایه‌ پێكهێنانی‌ حكومه‌تی‌ زۆرینه‌ چاره‌سه‌ره‌ له‌عێراقدا، 73 شیان واته‌ رێژه‌ی‌(15.17%)یان له‌گه‌ڵ ئه‌وه‌دان هه‌ڵبژاردنێكی‌ پێشوه‌خت چاره‌سه‌ری‌ قه‌یرانه‌كه‌ ده‌كات، دواتریش 68یان واته‌ رێژه‌ی‌(14.13) به‌ نازانم وه‌ڵامیان داوه‌ته‌وه‌.
م هـ ا(خ/ع)- ج پ

خۆپیشاندانێك له‌ رانیه‌ دژ به‌ بۆردومانكردنه‌كانی‌ توركیا به‌ڕێوه‌چوو

jamal — Mon, 22 Aug 2011 13:10:00 GMT

سلێمانی‌/ئه‌سوات ئه‌لعێراق: ده‌یان كه‌س له‌ دانیشتوانی‌ قه‌زای‌ رانیه‌ی‌ سه‌ر به‌ پارێزگای‌ سلێمانی‌، رۆژی‌ دووشه‌ممه‌، له‌ خۆپیشاندانێكدا بۆردومانه‌كانی‌ فڕۆكه‌ جه‌نگییه‌كانی‌ توركیایان پرۆتێستۆكرد.

یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "خۆپیشانده‌ران هاوكات داوایان له‌ حكومه‌تی‌ هه‌رێمی‌ كوردستان كرد "هه‌ڵوێستی‌ توندی‌ هه‌بێت به‌رامبه‌ر به‌ توركیا دژ به‌ بۆردومانكردنی‌ ناوچه‌ سنوورییه‌كان، كه‌ بوونه‌ته‌ هۆی‌ زیانگه‌یاندنی‌ گیانی‌‌و ماددیی‌".

جێی‌ ئاماژه‌یه‌ فڕۆكه‌ جه‌نگییه‌كانی‌ توركیا،چه‌ند رۆژێكه‌ به‌بیانوی‌ لێدان له‌ په‌كه‌كه‌، له‌ ناوچه‌كانی‌ چیای‌ قه‌ندیل‌و خنێره‌ی‌ سێگۆشه‌ی‌ سنووری‌‌و چیای‌ مه‌تین‌و ناوچه‌ی‌ زابی‌ سه‌ر به‌ پارێزگای‌ دهۆكیان تۆپباران ده‌كه‌ن، به‌و هۆیه‌شه‌وه‌ دوێنێ‌ حه‌وت كه‌سی‌ مه‌ده‌نی‌ كه‌ ژن‌و منداڵیشیان تێدابووه‌ كوژران.
ج پ(خ)

ده‌یان هه‌واداری‌ په‌كه‌كه‌ له‌ شاری‌ سلێمانی‌ ئاڵای‌ توركیایان سوتاند

jamal — Mon, 22 Aug 2011 19:58:00 GMT

سلێمانی‌/ئه‌سوات ئه‌لعێراق: ده‌یان هه‌واداری‌ په‌كه‌كه‌ له‌ شاری‌ سلێمانی‌، ئێواره‌ی‌ دووشه‌ممه‌، وه‌ك ناڕه‌زایی‌ ده‌ربڕین به‌رامبه‌ر به‌ بۆردومانه‌كانی‌ توركیاوه‌ ئاڵای‌ ئه‌و وڵاته‌یان سوتاند.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) له‌نزیك خۆپیشاندانه‌كه‌دا بوو، وتی‌ "خۆپیشانده‌ران له‌ شه‌قامی‌ سالمی‌ ناوه‌ڕاستی‌ شاری‌ سلێمانی‌ بۆردومانی‌ فڕۆكه‌ جه‌نگییه‌كانی‌ توركیایان پرۆتێستۆ كرد".

روونیشیكرده‌وه‌ كه‌ "له‌ خۆپیشاندانه‌كه‌دا ئاڵای‌ توركیا سوتێنرا‌و دروشم‌و هوتافی‌ دژ به‌ ره‌جه‌ب ته‌یب ئه‌رۆدگانی‌ سه‌رۆك وه‌زیرانی‌ توركیا ده‌وترایه‌وه‌".

ژماره‌یه‌ك ده‌رچووی‌‌ زانكۆ له‌به‌رده‌م په‌ڕله‌مانی‌ كوردستاندا خۆپیشاندانێكیان رێكخست

jamal — Thu, 25 Aug 2011 13:51:00 GMT

هه‌ولێر/ئه‌سوات ئه‌لعێراق: ژماره‌یه‌ك له‌ده‌رچووانی‌ كۆلیژه‌كانی‌ شه‌ریعه‌، ئه‌وانه‌ی‌ تا ئێستا دانه‌مه‌زراون، رۆژی‌ پێنجشه‌ممه‌، بۆ ناڕه‌زایی‌ ده‌ربڕین له‌به‌رده‌م په‌ڕله‌مانی‌ كوردستاندا خۆپیشاندانێكیان رێكخست.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) كه‌ له‌نزیك خۆپیشاندانه‌كه‌ بوو، وتی‌ "22 كوڕ‌و كچی‌ ده‌رچووی‌ كۆلیژه‌ ئیسلامییه‌كان ئه‌وانه‌ی‌ ناویان له‌ دامه‌زراندنه‌كاندا نه‌هاتۆته‌وه‌ خۆپیشاندانێ:ی‌ ناڕه‌زاییان بر به‌رده‌م په‌ڕله‌مان رێكخست".

وتیشی‌ "پرسگه‌ی‌ په‌ڕله‌مان ته‌نها رێگه‌یدا سێ‌ له‌ خۆپیشانده‌ره‌كان بڕۆنه‌وه‌ ژووره‌وه‌ بۆ ئه‌وه‌ی‌ داواكارییه‌كانیان بگه‌یه‌ننه‌ په‌ڕله‌مان، ئه‌وانه‌ی‌ تریش له‌ كاتژمێر نۆ ی‌ به‌یانییه‌وه‌ تا دوای‌ نیوه‌ڕۆ له‌به‌رده‌م باڵه‌خانه‌ی‌ په‌ڕڵ‌ه‌ماندا وه‌ستان".

ئاماژه‌شیدا به‌وه‌ی‌ كه‌ "سه‌رجه‌م هه‌وڵه‌كانی‌ رۆژنامه‌وانان بۆ كردنه‌ ژووره‌وه‌ی‌ سه‌رجه‌م خۆپیشانده‌ره‌كان شكستییان هێنا".

له‌كۆتاییشدا وتی‌ "له‌به‌ر ئه‌وه‌ی‌ به‌رپرسه‌ په‌یه‌وه‌نداره‌كان پێشتر پێشوازییان له‌ خۆپیشانده‌ره‌كان نه‌كردووه‌، بۆیه‌ ناچار بوون په‌نابێنه‌ به‌ر په‌ڕله‌مان".
ق م(خ/ع)- ج پ

خۆپیشاندانێك له‌ دهۆك دژ به‌ بۆردومانكردنی‌ هه‌رێمی‌ كوردستان به‌ڕێوه‌چوو

jamal — Tue, 23 Aug 2011 18:57:00 GMT

دهۆك/ ئه‌سوات ئه‌لعێراق: سه‌دان كه‌س له‌ دانیشتوانی‌ شاری‌ دهۆك، رۆژی‌ سێشه‌ممه‌، به‌مه‌به‌ستی‌ ئیدانه‌كردنی‌ تۆپرانكردنی‌ ناوچه‌ سنوورییه‌كانی‌ هه‌رێمی‌ كوردستان له‌لایه‌ن فڕۆكه‌ جه‌نگییه‌كانی‌ توركیاوه‌، رژانه‌ سه‌ر شه‌قامه‌كان.

خۆپیشانده‌ران له‌ناوه‌ڕاستی‌ شاره‌كه‌دا‌و له‌به‌رده‌م باڵه‌خانه‌ی‌ ئه‌نجومه‌نی‌ پارێزگادا ئاڵای‌ كوردستانیان به‌رزكردبۆوه‌و دروشمی‌ چاره‌سه‌ركردنی‌ گرفته‌كانی‌ سنورییان ده‌وته‌وه‌، وه‌ك "به‌ڵێ‌ بۆ ئاشتی‌..نا نا بۆ تیرۆر‌و بۆردومانكردنی‌ گونده‌كان". "به‌ڵێ‌ به‌ڵێ‌ بۆ یه‌كخستنی‌ ریزه‌كانی‌ گه‌له‌كه‌مان"و "قامیشلۆ‌و دیاربه‌كر‌و هه‌ڵه‌به‌جه‌ پایته‌ختمانن"‌و چه‌ندین دروشمی‌ تری‌ تایبه‌ت به‌ ئیدانه‌كردنی‌ بۆردومانكردن‌و كوشتنی‌ خه‌ڵكی‌ مه‌ده‌نی‌.

له‌مباره‌یه‌وه‌ سه‌ڵاح خه‌یری‌ یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "پرۆسه‌ سه‌ربازییه‌كانی‌ سه‌ر هه‌رێكی‌ كوردستان ره‌تده‌كه‌ینه‌وه‌‌و با به‌س بێ‌ خوێنڕشتنی‌ هاوڵاتیانی‌ كه‌له‌كه‌مان، با هه‌موولایه‌ك په‌ناببنه‌ به‌ر دیالۆگ بۆ چاره‌سه‌ركدنی‌ گرفته‌كان، چونكه‌ كرده‌وه‌ی‌ سه‌ربازیی‌ زیان به‌ هاووڵاتیان‌و دانیشتوانی‌ گونده‌ سنوورییه‌كان ده‌گه‌یه‌نێت".

لای‌ خۆشییه‌وه‌ سه‌رۆكی‌ ئه‌نجومه‌نی‌ پارێزگای‌ دهۆك له‌كاتی‌ پێشوازیكردن له‌ خۆپیشانده‌راندا وتی‌ "هیچ بیانوێك نییه‌ بۆ ئه‌م بۆردومانكردنانه‌ به‌تایبه‌ت له‌ مانگی‌ ره‌مه‌زاندا، كه‌ نابێت موسڵمان برای‌ موسڵمانی‌ خۆی‌ بكوژێت، بۆیه‌ ده‌نگمان ده‌خه‌ینه‌ پاڵ ده‌نگی‌ ئێوه‌‌و ئه‌م كرده‌وانه‌ ئیدانه‌ ده‌كه‌ین".

هاوكات مافناس هه‌كار فه‌ندی‌ وتی‌ "ئه‌م بۆردومانانه‌ لادانن له‌ نه‌ریت‌و یاسا نێوده‌وڵه‌تییه‌كان، بۆیه‌ پێویسته‌ له‌سه‌ر حكومه‌تی‌ عێراقی‌ له‌دادگای‌ نێوده‌وڵه‌تیدا سكاڵا دژی‌ توركیا تۆمار بكات‌و داوای‌ راگرتنی‌ بۆردومانكردنه‌كان بكات، چونكه‌ ئه‌م كاره‌ به‌پێی‌ سیستمی‌ فیدرالیی‌ ئه‌ركی‌ حكومه‌تی‌ عێراقه‌".

جێی‌ ئاماژه‌یه‌ فڕۆكه‌ جه‌نگییه‌كانی‌ توركیا،چه‌ند رۆژێكه‌ به‌بیانوی‌ لێدان له‌ په‌كه‌كه‌، له‌ ناوچه‌كانی‌ چیای‌ قه‌ندیل‌و خنێره‌ی‌ سێگۆشه‌ی‌ سنووری‌‌و چیای‌ مه‌تین‌و ناوچه‌ی‌ زابی‌ سه‌ر به‌ پارێزگای‌ دهۆكیان تۆپباران ده‌كه‌ن، به‌و هۆیه‌شه‌وه‌ حه‌وت كه‌سی‌ مه‌ده‌نی‌ كه‌ ژن‌و منداڵیشیان تێدابووه‌ كوژران.
ك ن م(م/ع)- ج پ

ئه‌و خۆپیشاندانه‌ی‌ ئه‌مڕۆ به‌نیازبوو له‌ هه‌ولێر دژ به‌ بۆردومانی‌ كوردستان ئه‌نجامبدرێت دواخرا

jamal — Tue, 23 Aug 2011 10:14:00 GMT

هه‌ولێر/ئه‌سوات ئه‌لعێراق: چاڵاكوانێكی‌ مه‌ده‌نی‌، رایگه‌یاند به‌هۆی‌ گرفتی‌ ته‌كنیكییه‌وه‌ بڕیاردرا ئه‌و خۆپیشاندانه‌ی‌ كه‌ به‌نیازبوو له‌ شاری‌ هه‌ولێر دژ به‌ بۆردومانكردنه‌كانی‌ ناوچه‌ی‌ سنوورییه‌كان به‌ڕێوه‌بچێت دواخرا بۆ سبه‌ی‌ چوارشه‌ممه‌.

چاڵاكوانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "بڕیاردرا خۆپیشاندانه‌كه‌ كاتژمێر حه‌وتی‌ به‌یانی‌، رۆژی‌ چوارشه‌ممه‌، به‌ڕێوه‌بچێت، وه‌ك ناڕه‌زاییه‌ك ده‌رباره‌ی‌ بۆردومانكردنی‌ ناوچه‌ سنوورییه‌كانی‌ هه‌رێمی‌ كوردستان له‌لایه‌ن ئێران‌و توركیاوه‌".

روونیشیكرده‌وه‌ كه‌ "به‌هۆی‌ گرفتێكی‌ ته‌كنییكییه‌وه‌ نه‌توانرا ئه‌مڕۆ خۆپیشاندانه‌كه‌ سازبكرێت".

هێماشی‌ بۆ ئه‌وه‌كرد كه‌ "چه‌ندین چین‌و توێژی‌ جیاجیا به‌شداری‌ له‌م خۆپیشاندانه‌ ده‌كه‌ن، له‌وانه‌ رۆژنامه‌نووس‌و كرێكار‌و پزیشك‌و هونه‌رمه‌ند‌و ژنان‌و بێكاران".

هه‌روه‌ها وتی‌ "بڕیاروایه‌ خۆپیشانده‌ران داوا له‌ هه‌ردوو وڵاتی‌ توریكا‌و ئێران بكه‌ن هێرش‌و په‌لاماره‌كانیان بۆسه‌ر هه‌رێمی‌ كوردستان راگرن".

جێی‌ ئاماژه‌یه‌ فڕۆكه‌ جه‌نگییه‌كانی‌ توركیا،چه‌ند رۆژێكه‌ به‌بیانوی‌ لێدان له‌ په‌كه‌كه‌، له‌ ناوچه‌كانی‌ چیای‌ قه‌ندیل‌و خنێره‌ی‌ سێگۆشه‌ی‌ سنووری‌‌و چیای‌ مه‌تین‌و ناوچه‌ی‌ زابی‌ سه‌ر به‌ پارێزگای‌ دهۆكیان تۆپباران ده‌كه‌ن، به‌و هۆیه‌شه‌وه‌ حه‌وت كه‌سی‌ مه‌ده‌نی‌ كه‌ ژن‌و منداڵیشیان تێدابووه‌ كوژران.
ق م(خ/ع)- ج پ

خۆپیشانده‌رانی‌ سلێمانی‌ داوا له‌ كۆمه‌لی‌ نێوده‌وڵه‌تی‌ ده‌كه‌ن هه‌وڵی‌ راگرتنی‌ بۆردومانكردنی‌ كوردستان بدات

jamal — Sat, 27 Aug 2011 16:08:00 GMT

سلێمانی‌/ ئه‌سوات ئه‌لعێراق: سه‌دان كه‌س له‌ دانیشتوانی‌ شاری‌ سلێمانی‌، رۆژی‌ شه‌ممه‌، له‌ خۆپیشاندانێكدا بۆردومانكردنه‌كانی‌ هه‌رێمی‌ كوردستاناین پڕۆتێستۆ كرد‌و داواشیان له‌ كۆمه‌ڵی‌ نێوده‌وڵه‌تی‌ كرد هه‌وڵی‌ راگرتنی‌ ئه‌م بۆردومانكرنه‌كان بدات.

خۆپیشانده‌ره‌كان نزیكه‌ی‌ 500 كه‌س ده‌بوون له‌ پاركی‌ ئازادی‌(ناوه‌ڕاستی‌ سلێمانی‌) كۆببوونه‌وه‌‌و تێیدا ئاژانسی‌(ئه‌سوات ئه‌لعێراق)یش ئاماده‌بوو، هه‌شت لایه‌نی‌"چه‌پ‌و دیموكرات" دژ به‌ هێرش‌و په‌لاماره‌كانی‌ توركیا‌و ئێران رێكیانخستبوو، هه‌روه‌ها یاداشتێكی ناڕه‌زاییان دا به‌ پارێزگای‌ سلێمانی‌‌و تێیدا داوا له‌ ئه‌نجومه‌نی‌ ئاسایشی‌ نێوده‌وڵه‌تی‌‌و دادگای‌ نێوده‌وڵه‌تی‌‌و مافه‌كانی‌ مرۆڤ‌و حكومه‌ت‌و په‌ڕله‌مانی‌ عێراق‌و كوردستان كراوه‌، هه‌وڵبده‌ن به‌زووترین كات ئه‌م بۆردومانانه‌ راگرن.

له‌ یاداشتنامه‌كه‌دا داواكرابوو"جگه‌ له‌ راگرتنی‌ بۆردومان‌و تۆپبارانه‌كان پێویسته‌ قه‌ره‌بووی‌ سه‌رجه‌م ئه‌و كه‌سانه‌ بكرێـته‌وه‌ كه‌ زه‌ره‌مه‌ندبوون، به‌هه‌مان شێوه‌ پێویسته‌ ئه‌قه‌ڕه‌‌و تاران به‌ فه‌رمی‌ داوای‌ لێبوردن له‌ حكومه‌تی‌ هه‌رێمی‌ كوردستان بكه‌ن له‌سه‌ر ئه‌و پێشێلكارییانه‌یان كه‌ دژی‌ به‌ گه‌لی‌ كورد ئه‌نجامیانداوه‌".
هه‌روه‌ها داوایان له‌ حكومه‌تی‌ هه‌رێمیش كردووه‌ "قه‌باره‌ی‌ زه‌ره‌روزیانه‌كان ده‌ستنیشان بكات‌و داوایی‌ یاسایش له‌سه‌ر هه‌ردوو وڵات تۆماربكات".

عوسمان سه‌عید یه‌كێك بو له‌ رێكخةرا‌نی‌ ئه‌م خۆپیشاندانه‌ به‌(ئه‌سوات ئه‌لعێراق)ی‌ وت "ئه‌م بۆردومانانه‌ پێشێلكارییه‌كی‌ ئاشكرای‌ مافه‌كانی‌ مرۆڤ‌و یاسا‌و به‌ڵگه‌نامه‌ نێوده‌وڵه‌تییه‌كان‌و په‌یوه‌ندییی‌ دراوسێیه‌تین".
وتیشی‌ "ئێمه‌ وه‌كو جه‌ماوه‌ری‌ شاری‌ سلێمانی‌ ئه‌م بۆردومانانه‌ پرۆتێستۆ ده‌كه‌ین‌و وایداده‌نێین دوژمنكارییه‌كی‌ رێكخراوه‌ بۆسه‌ر مافه‌كانی‌ گه‌لی‌ كوردستان".

جێی‌ ئاماژه‌یه‌ فڕۆكه‌ جه‌نگییه‌كانی‌ توركیا،چه‌ند رۆژێكه‌ به‌بیانوی‌ لێدان له‌ په‌كه‌كه‌، له‌ ناوچه‌كانی‌ چیای‌ قه‌ندیل‌و خنێره‌ی‌ سێگۆشه‌ی‌ سنووری‌‌و چیای‌ مه‌تین‌و ناوچه‌ی‌ زابی‌ سه‌ر به‌ پارێزگای‌ دهۆكیان تۆپباران ده‌كه‌ن، به‌و هۆیه‌شه‌وه‌ حه‌وت كه‌سی‌ مه‌ده‌نی‌ كه‌ ژن‌و منداڵیشیان تێدابووه‌ كوژران.
س غ(م/ع)- ج پ

خۆپیشاندانێك له‌ هه‌ولێر دژ به‌ بۆردومان‌و تۆپبارانه‌كانی‌ توركیا‌و ئێران سازكرا

jamal — Wed, 07 Sep 2011 16:57:00 GMT

هه‌ولێر/ئه‌سوات ئه‌لعێراق: سه‌دان كه‌س له‌ نوێنه‌رانی‌ رێكخراوه‌كانی‌ كۆمه‌ڵگای‌ مه‌ده‌نی‌، رۆژی‌ چوارشه‌ممه‌، له‌به‌رده‌م نوسینگه‌ی‌ نه‌ته‌وه‌ یه‌كگرتووه‌كان له‌ شاری‌ هه‌ولێر خۆپیشاندانێكیان رێكخست دژ به‌ بۆردومانكردن‌و تۆپبارانكردنی‌ ناوچه‌ سنوورییه‌كانی‌ هه‌رێمی‌ كوردستان له‌لایه‌ن توركیا‌و ئێرانه‌وه‌.

خۆپیشانده‌ران ئاڵای‌ كوردستان‌و وێنه‌ی‌ قوربانیانی‌ بۆردومانه‌كانی‌ توركیایان به‌رزكردبووه‌وه‌ كه‌ بریتی بوون له‌ ئه‌ندامانی‌ خێزانێك جوای‌ ئه‌وه‌ی‌ به‌ هۆی‌ بۆردومانی‌ توركیاوه‌ به‌یه‌كه‌وه‌ بوونه‌ قوربانی‌.

له‌مباره‌یه‌وه‌ عه‌دنان ئه‌نوه‌ر به‌گ سه‌رۆكی‌ فیدراسیۆنی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌ له‌ هه‌رێمی‌ كوردستان به‌ ئاژانسی‌(ئه‌سوات ئه‌لعێراق)ی‌ وت "له‌م خۆپیشاندانه‌دا نوێنه‌رانی‌ رێكخراوه‌كانی‌ كۆمه‌ڵگای‌ مه‌ده‌نی‌ به‌شدارن، كه‌ له‌چوارچێوه‌ی‌ چاڵاكییه‌كانی‌ هه‌ڵمه‌تی‌ شه‌قام له‌پێناو نیشتیمانه‌وه‌ ئه‌نجامده‌درێت، هاتووین داوا له‌ نه‌ته‌وه‌ یه‌كگرتووه‌كان بكه‌ین داوا له‌ توركیا بكات هێرشه‌ دوژمنكارییه‌كانی‌ خۆی‌ بۆسه‌ر هه‌رێمی‌ كوردستان راگرێت".

هێماشی‌ بۆ ئه‌وه‌ كرد كه‌ "خپیشانده‌ران یاداشتنامه‌یه‌كیان له‌مباره‌یه‌وه‌ دا به‌ نوسینگه‌كه‌".

جێی‌ ئاماژه‌یه‌ هه‌ردوو وڵاتی‌ ئێران‌و توركیا ماوه‌ی‌ چه‌ند ساڵێكه‌ به‌ بیانوی‌ لێدان له‌ بنكه‌‌و باره‌گاكانی‌ په‌كه‌كه‌‌و پژاكه‌وه‌ ناوچه‌ سنوورییه‌كانی‌ هه‌رێمی‌ كوردستان تۆپباران‌و بۆردومان ده‌كه‌ن، كه‌ چه‌ندین جار زه‌ره‌رو زیانی‌ گیانیان لێكه‌وتۆته‌وه‌.
ك ن م(خ/ع_ ج پ

زۆربه‌ی‌ خوێنه‌رانی‌ ئه‌سوات ئه‌لعێراق پێیانوایه‌ په‌ڕله‌مانی‌ عێراق ناتوانێت یاسای‌ ئه‌نجومه‌نی‌ سیاسه‌ته‌كان تێبپه‌ڕێنێت

jamal — Fri, 09 Sep 2011 12:05:00 GMT

به‌غدا/ئه‌سوات ئه‌لعێراق: بەپێی‌ راپرسییەکی‌ ئاژانسی‌(ئەسوات ئەلعێراق) زۆرینەی‌ خوێنەرانی‌ هەردوو بەشی‌ عەرەبی‌ و کوردی پێیانوایه‌ په‌ڕله‌مانی‌ عێراق ناتوانێت یاسای‌ ئه‌نجومه‌نی‌ سیاسه‌ته‌كان تێبپه‌ڕێنێ‌، له‌به‌رامبه‌ردا خوێنه‌رانی‌ به‌شی‌ ئینگلیزی‌ پێیانوایه‌ یاساكه‌ په‌سه‌ند ده‌كرێت.

راپرسییەکە لە ماوەی‌ نێوان 14/8/2011 تا 8/9/2011 لەسەر روپەڕی‌ هەر سێ بەشی‌ عەرەبی‌‌و کوردی‌‌و ئینگلیزی‌ پەخشکرابوو، تێیدا 104 دەنگدەر لە کۆی‌ 246 دەنگدەری‌ بەشی‌ عەرەبی واتە (49.18%) پێیانوایە په‌ڕله‌مانی‌ عێراق شكستدێنێت له‌ تێپه‌ڕاندنی‌ یاسای‌ ئه‌نجومه‌نی‌ سیاسه‌ته‌ باڵاكان، هاوکات121 بەشداربوو واتە(42.27%) پێیانوایه‌ یاساكه‌ په‌سه‌ند ده‌كرێت، له‌كۆتاییشدا 21 ده‌نگده‌ر به‌ نازانم وه‌ڵامیان داوه‌ته‌وه‌.

لە بەشی‌ کوردیشدا لەکۆی‌ 83 بەشداربوودا 44 یان پێیانوایە په‌ڕله‌مان سه‌ركه‌وتوو نابێت له‌په‌سه‌ندكردنی‌ یاساكه‌، واتە (53.65%)، هەروەها 24 یان پێیانوایه‌ یاساكه‌ په‌سه‌ند ده‌كرێت واتا رێژه‌ی‌‌ (28.04%)، له‌هه‌مانكاتدا ته‌نها 15 دەنگدەر واتە (18.29%)یان بە نازانم وەڵامیان داوەتەوە.

بەڵام لە بەشی‌ ئینگلیزیدا بۆچوونه‌كان پێچه‌وانه‌ی‌ هه‌ردوو به‌شی‌ عه‌ره‌بی‌‌و كوردی‌ بوون‌، به‌وه‌ی‌ کە له‌كۆی‌ 169 به‌شداربوودا 119یان پێیانوایه‌ په‌ڕله‌مان ده‌توانێت یاساكه‌ تێبپه‌ڕێنێت، واته‌ رێژه‌ی‌ (70.41%)، له‌هه‌مانكاتدا 29 به‌شداربوو واتا رێژه‌ی‌ (17.15%) پێیانوایه‌ ناتوانرێت یاساكه‌ په‌سه‌ندبكرێت، دواتریش 21 ده‌نگده‌ریان واته‌ رێژه‌ی‌(12.42%) به‌ نازانم وه‌ڵامیان داوه‌ته‌وه‌.

پرۆِژه‌ یاسای‌ ئه‌نجومه‌نی‌ سیاسه‌ته‌ باڵاكان یه‌كێكه‌ له‌و بابه‌تانه‌ی‌ كه‌ بۆته‌ مایه‌ی‌ ناكۆكی‌ له‌نێوان هه‌ردوو ئیئتیلافی‌ عێراقییه‌‌و هاوپه‌یمانی‌ نیشتیمانی‌، به‌و پێیه‌ی‌ كه‌ پشكی‌ ئیتئیلافی‌ عێراقییه‌یه‌ له‌لایه‌ن ئه‌م ئیئتیلافه‌وه‌ داواده‌كرێت ده‌سه‌ڵاتی‌ راپه‌ڕاندنی‌ هه‌بێت، له‌به‌رامبه‌ریشدا هاوپه‌یمانی‌ نیشتیمانی‌ ده‌یه‌وێت ئه‌م ئه‌نجومه‌نه‌ ده‌بێت ته‌نها ئه‌نجومه‌نێكی‌ راوێژكاریی‌ بێت.
ب ف ح(خ/ع)- ج پ

خۆپیشانده‌رانی‌ به‌غدا ره‌خنه‌ له‌ بڕی‌ تێچوونی‌ سه‌فه‌ره‌كه‌ی‌ تاڵه‌بانی‌ ده‌گرن

jamal — Sat, 24 Sep 2011 01:04:00 GMT

به‌غدا/ئه‌سوات ئه‌لعێراق: ده‌یان كه‌س له‌ خۆپیشانده‌رانی‌ شاری‌ به‌غدا، رۆژی‌ هه‌ینی‌، ره‌خنه‌یان له‌ بڕی‌ تێچوونی‌ سه‌فه‌ره‌كه‌ی‌ تاڵه‌بانی‌ گرت بۆ نیویۆرك‌و داواشیان له‌ حكومه‌ت كرد به‌ڵێنه‌كانی‌ خۆی‌ به‌جێبگه‌یه‌نێت سه‌باره‌ت به‌ چاكسازیی‌‌و نه‌هێشتنی‌ گه‌نده‌ڵیی‌.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) كه‌ له‌ گۆڕه‌پانی‌ ته‌حریردا له‌نزیك خۆپیشاندانه‌كه‌ بوو، وتی‌ "خۆپیشانده‌ران له‌ سه‌رله‌به‌یانی‌ رۆژی‌ هه‌ینییه‌وه‌ له‌ گۆڕه‌پانی‌ ته‌حریربوون‌و چه‌ندین دروشمیان به‌رزكردبووه‌‌و داوای‌ چاكسازییان له‌حكومه‌ت ده‌كرد، هه‌روه‌ها داوایانده‌كرد رێگری‌ بكرێت له‌ ده‌ستێوه‌ردانی‌ وڵاتانی‌ دراوسێ‌".

وتیشی‌ "خۆپیشانده‌ران ره‌خنه‌یان له‌ بڕی‌ تێچوونی‌ سه‌فه‌ره‌كه‌ی‌ تاڵه‌بانی‌ گرت بۆ نیویۆرك كه‌ دوو ملیۆن دۆلاربووه‌‌و پێیانوایه‌ ئه‌م كاره‌ ته‌واو پێچه‌وانه‌ی‌ كه‌مكردنه‌وه‌ی‌ بڕی‌ مووچه‌ی‌ به‌رپرسانه‌، له‌كاتێكدا هاوڵاتیانی‌ ئاسایی‌ به‌ده‌ست ژیانێكی‌ سه‌خته‌وه‌ ده‌ناڵێنن".
ع ف(خ/ع)- ج پ

راپرسییه‌ك: عێراق‌و ئێران خراپترین ناوبانگیان هه‌یه‌ له‌ جیهاندا، باشترینیشیان كه‌نه‌دا‌و سوێدن

jamal — Sat, 01 Oct 2011 11:42:00 GMT

به‌غدا/ئه‌سوات ئه‌لعێراق: به‌پێی‌ راپرسییه‌كی‌ ده‌زگایه‌كی‌ ئه‌مریكیی‌، عێراق‌و ئێران له‌كۆی‌ 50 وڵاتی‌ جیهانیدا خراپترین ناوبانگییان هه‌یه‌‌و هه‌ریه‌كه‌ له‌ كه‌نه‌دا‌و سوێد‌و ئه‌ستڕالیاش باشترین ناوبانگیان هه‌یه‌.

راپرسییه‌كه‌ له‌لايه‌ن ده‌زگای‌(ریپیوتیشن ئینستیتیوت)ی‌ ئه‌مریكییه‌وه‌ ئاماده‌كراوه‌‌و ئاژانسی‌(فرانس پرێس) بڵاویكردۆته‌وه‌‌و تێیدا 42 هه‌زار كه‌س به‌شداریكردووه‌، به‌م پێوه‌رانه‌"متمانه‌ی‌ خه‌ڵكیی‌‌و هه‌ڵسه‌نگاندنیان‌و سه‌رسامییان" به‌رامبه‌ر هه‌ر وڵاتێك، به‌هه‌مان شێوه‌ دیدی‌ هه‌ر به‌شداربوێك سه‌باره‌ت به‌ جۆری‌ ژیان‌و سه‌قامگیریی‌ ئاسایش‌و بایه‌خدان به‌ژینگه‌".

له‌میانی‌ وه‌ڵامه‌كانیشدا ده‌ركه‌وت كه‌ "كه‌نه‌دا له‌ پله‌ی‌ یه‌كه‌م هات‌و دوای‌ ئه‌ویش وڵاتی‌ سوێد به‌ پله‌ی‌ دووه‌م‌و پاشان ئوستڕالیا‌و سویسرا‌و نیوزله‌ندا‌و هاتوون، یابانیش پله‌ی‌ 12ه‌یه‌م‌و فه‌ڕه‌نسا پله‌ی‌ 18یه‌م، هه‌روه‌ها ویلایه‌ته‌ یه‌كگرتووه‌كانی‌ ئه‌مریكا له‌ ناوه‌ڕاست‌و چینیش له‌ ریزبه‌ندی‌ سێیه‌كی‌ كۆتاییدا هاتووه‌".

له‌ دوای‌ عێراق‌و ئێران پاكستانیش به‌یه‌كێك له‌ وڵاتانه‌ داده‌نرێت كه‌ له‌سه‌ر ئاستی‌ جیهانیدا ناوبانگێكی‌ خراپی‌ هه‌یه‌.

به‌پێی‌ ئه‌و راپۆرته‌ی‌ كه‌ له‌مباره‌یه‌وه‌ بڵاوكراوه‌ته‌وه‌ هه‌ڵسه‌نگاندنی‌ ناوبانگی‌ وڵاته‌كان له‌سه‌ر بنه‌مای‌ پێوه‌ره‌كانی‌ ژیان‌و پێشكه‌وتوویی‌ فه‌رمانڕه‌وایی‌ سیاسیی‌‌و هه‌ڵوێسته‌ بێلایه‌نه‌كانیان له‌ئاست گرژییه‌ سیاسییه‌ نێوده‌وڵه‌تییه‌كان داڕێژراوه‌.

هه‌روه‌ها فاكته‌رێكی‌ تری‌ گرنگیش بۆ هه‌ڵسه‌نگاندنه‌كه‌ دانرابوو، ئه‌ویش پرسی‌ سه‌قامگیریی‌ ئه‌من‌و ئاسایشه‌، كه‌ عێراق له‌مه‌دا به‌خراپترین وڵاتی‌ دونیا دانراوه‌.
ج پ(خ)

له‌ خۆپیشاندانێكدا له‌به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵا له‌ هه‌ولێر ته‌قه‌كرا

jamal — Sun, 02 Oct 2011 13:24:00 GMT

هه‌ولێر/ئه‌سوات ئه‌لعێراق: ده‌یان خوێندكاری‌ كۆلیژی‌ شاهانه‌ی‌ به‌ریتانی‌، رۆژی‌ یه‌كشه‌ممه‌، له‌به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵای‌ حكومه‌تی‌ هه‌رێمی‌ كوردستان له‌ شاری‌ هه‌ولێر له‌ خۆپیشاندانێكدا داوایان له‌ وه‌زاره‌كه‌ كرد له‌ بڕیاری‌ داخستنی‌ كۆلیژه‌كه‌ پاشگه‌زبێته‌وه‌، له‌هه‌مانكاتدا به‌مه‌به‌ستی‌ په‌رتكردنی‌ خوۆپیشانده‌ره‌كان ده‌نگی‌ ته‌قه‌ بیسترا.

له‌مباره‌یه‌وه‌ یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "خۆپیشاندانه‌كه‌ سه‌رله‌به‌یانی‌(یه‌كشه‌ممه‌)له‌به‌رده‌م باڵه‌خانه‌ی‌ وه‌زاره‌ته‌كه‌دا ده‌ستیپێكرد‌و تێیدا داوا له‌ وه‌زاره‌ت كرا له‌ بڕیاری‌ داخستنی‌ كۆلیژی‌ شاهانه‌ی‌ به‌ریتانی‌ پاشگه‌زبێته‌وه‌".

وتیشی‌ "وه‌زاره‌ته‌كه‌ پێش ماوه‌یه‌ك كۆلیژه‌كه‌ی‌ داخستووه‌ به‌هۆی‌ ئه‌وه‌ی‌ ئاستی‌ خوێندن له‌ كۆلیژه‌كه‌دا سست بووه‌".

هێماشی‌ بۆ ئه‌وه‌كرد كه‌ "هاوكات له‌لایه‌ن هێزه‌ ئه‌منییه‌كانه‌وه‌ ته‌قه‌كرا بۆ په‌رتكردنی‌ خۆپیشانده‌ره‌كان، به‌هۆی‌ ئه‌وه‌ی‌ هه‌وه‌ڵی‌ ئه‌وه‌یانده‌دا هه‌ڵبكوتنه‌ سه‌ر باڵه‌خانه‌ی‌ وه‌زاره‌ت".
ق م(خ/ع)- ج پ

خۆپیشاندانێك بۆ پشتگیریكردن له‌ ئۆجه‌لان له‌ شاری‌ سلێمانی‌ سازكرا

jamal — Sun, 09 Oct 2011 20:01:00 GMT

سلێمانی‌/ئه‌سوات ئه‌لعێراق: ده‌یان كه‌س له‌ هه‌وادارانی‌ پارتی‌ دیموكراتی‌ كوردستان، ئێواره‌ی‌ یه‌كشه‌ممه‌، له‌ شاری‌ سلێمانی‌ بۆ پشتگیریكردن له‌ عه‌بدولا ئۆجه‌لانی‌ سه‌رۆكی‌ به‌ندكراوی‌ په‌كه‌كه‌ رژانه‌ سه‌ر شه‌قامه‌كان.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) له‌ناو خۆپیشاندانه‌كه‌دا ، وتی‌ "نزیكه‌ی‌ 150 كه‌س له‌ هه‌وادارانی‌ په‌كه‌كه‌، ئێواره‌ی‌ (یه‌كشه‌ممه‌)له‌به‌رده‌م سه‌هۆڵه‌كه‌ له‌ شه‌قامی‌ سالم رێپێوانێكی‌ تایبه‌ت به‌ پشتگیریكردنی‌ عه‌بدوڵلا ئۆجه‌لانی‌ سه‌رۆكی‌ پارتی‌ كرێكارانی‌ كوردستانیان رێكخست".

وتیشی‌ "خۆپیشانده‌ران بریتی‌ بوون له‌ كورده‌كانی‌ توركیا‌و ژماره‌یه‌ك كرێكار".
یه‌كیكَك له‌ خۆپیشانه‌ره‌كان به‌(ئه‌سوات ئه‌لعێراق)ی‌ وت "هۆكاری‌ رێكخستنی‌ ئه‌م خۆپیشاندانه‌ ئه‌وه‌یه‌ كه‌

له‌میانی‌ ئۆپه‌راسیۆنه‌كانی‌ توركیا بۆ سه‌ر ناوچه‌ سنوورییه‌كانی‌ هه‌رێمی‌ كوردستان‌و بنكه‌‌و باره‌گاكانی‌ په‌كه‌كه‌ ده‌وڵه‌تی‌ توركیا رێگه‌ی‌ به‌ پارێزه‌ران نه‌داوه‌ سه‌ردانی‌ ئۆجه‌لان بكه‌ن".
س غ(خ)- ج پ

خۆپیشاندانێك له ‌خانه‌قین دژ به‌ "بڕیاره‌كه‌ی‌" مالیكی ده‌رباره‌ی‌ ئاڵای‌ كوردستان به‌ڕێوه‌چوو

jamal — Sat, 15 Oct 2011 13:17:00 GMT

دیاله‌/ئه‌سوات ئه‌لعێراق: ئه‌ندامێكی‌ فراكسیۆنی‌ هاوپه‌یمانی‌ كوردستان، رۆژی‌ شه‌ممه‌ن رایگه‌یاند به‌هه‌زاران كه‌س له‌خانه‌قین دژ به‌ بڕیاره‌كه‌ی‌ مالیكی ده‌رباره‌ی‌ دابه‌زاندنی‌ ئاڵای‌ كوردستان له‌سه‌ر فه‌رمانگه‌ حكومییه‌كانی‌ ناوچه‌ جێناكۆكه‌كان، خۆپیشاندانێكیان سازكرد.

دلێر حه‌سه‌ن له‌لێدوانێكیدا به‌ ئاژانسی‌(ئه‌سوات ئه‌لعێراق)ی‌ وت "سه‌ركردایه‌تی‌ هه‌ردوو حزبی‌ سه‌ره‌كی‌ كوردی‌(یه‌كێتیی‌ نیشتیمانی‌ كوردستان‌و پارتی‌ دیموكراتی‌ كوردستان) رێككه‌وتن له‌سه‌ر ئه‌نجامدانی‌ خۆپیشاندانێك له‌ناو قه‌زای‌ خانه‌قین، به‌به‌شداری‌ زیاتر له‌ 10 هه‌زار كه‌س، دژ به‌ بڕیاره‌كه‌ی‌ مالیكی ده‌رباره‌ی‌ دابه‌زاندنی‌ ئاڵای‌ كوردستان له‌سه‌ر فه‌رمانگه‌ حكومییه‌كانی‌ ناوچه‌ جێناكۆكه‌كان".

جێی‌ ئاماژه‌یه‌ ده‌زگا راگه‌یا‌ندنه‌ كوردییه‌كان له‌م چه‌ند رۆژه‌دا ئاماژه‌یاندا به‌وه‌ی‌ كه‌ مالیكیی‌ داوایكردووه‌ ئاڵای‌ كوردستان له‌سه‌ر ده‌زگا‌و فه‌رمانگه‌ حكومییه‌كانی‌ قه‌زای‌ خانه‌قین بهێنرێته‌ خواره‌وه‌‌و له‌جیاتیدا ئاڵای‌ عێراق هه‌ڵبكرێت، ئه‌مه‌ش بووه‌ مایه‌ی‌ ناڕه‌زایی‌ خه‌ڵكی‌ ئه‌م ناوچه‌یه، له‌به‌رامبه‌ردا خالید ئه‌سه‌دی‌ سه‌ركرده‌ له‌ ده‌وڵه‌تی‌ یاسا ره‌تیكرده‌وه‌ مالیكیی‌ لێدوانی‌ له‌م شێوه‌ی‌ دابێت‌.
ح م ا(خ/ع)- ج پ

خۆپیشاندانێك له‌ هه‌ولێر دژ به‌ رژێمی‌ به‌شار ئه‌سه‌د‌و پرسی‌ دابه‌زاندنی‌ ئاڵای‌ كوردستان به‌ڕێوه‌چوو

jamal — Sun, 16 Oct 2011 21:16:00 GMT

هه‌ولێر/ئه‌سوات ئه‌لعێراق: به‌به‌شداری‌ سه‌دان كه‌س، رۆژی‌ یه‌كشه‌ممه‌، خۆپیشاندانێك له‌ شاری‌ هه‌ولێر دژ به‌ رژێمی‌ به‌شار ئه‌سه‌د‌و كوشتنی‌ چاڵاكوانی‌ كوردی‌ سوریا مشعه‌ل ته‌مۆ، هه‌روه‌ها دژ به‌ بڕیاره‌كه‌ی‌ سه‌رۆك وه‌زیرانی‌ عێراق نوری‌ مالیكیی‌ له‌باره‌ی‌ دابه‌زاندنی‌ ئاڵای‌ كوردستان له‌سه‌ر باڵه‌خانه‌كانی‌ قه‌زای‌ خانه‌قین به‌ڕێوه‌چوو.

له‌مباره‌یه‌وه‌ عه‌دنان ئه‌نوه‌ر سه‌رۆكی‌ فیدراسیۆنی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌ به‌ ئاژانسی‌(ئه‌سوات ئه‌لعێراق)ی‌ وت "سه‌دان كه‌س له‌ هاوڵاتیانی‌ هه‌رێمی‌ كوردستان، ئه‌مڕۆ(یه‌كشه‌ممه‌) له‌به‌رده‌م باڵه‌خانه‌ی‌ نوسینگه‌ی‌ نه‌ته‌وه‌ یه‌كگرتووه‌كان له‌ شاری‌ هه‌ولێر خۆپیشاندانێكیان دژ به‌ رژێمی‌ به‌شار ئه‌سه‌د‌و كوشتنی‌ مه‌شعه‌ل ته‌مۆ‌و بڕیاره‌كه‌ی‌ نوری‌ مالیكیی‌ رێكخست سه‌باره‌ت به‌ دابه‌زاندنی‌ ئاڵای‌ كوردستان له‌ خانه‌قین".

وتیشی‌ "خۆپیشانده‌ران ژماره‌یان نزیكه‌ی‌ 1000 كه‌س ده‌بوو، یاداشتنامه‌یه‌كیان دا به‌ نوسینگه‌ی‌ نه‌ته‌وه‌ یه‌كگرتووه‌كان".

هه‌روه‌ها چاڵاكوانی‌ كورد مشعه‌ل ته‌مۆ چه‌ند رۆژێك له‌مه‌وبه‌ر له‌لایه‌ن هێزه‌ ئه‌منییه‌كانی‌ سوریاوه‌ كوژرا، كه‌ بووه‌ مایه‌ی‌ ناڕه‌زایی‌ خه‌ڵكی‌ كورد له‌ سوریا‌و چه‌ند شارێكی‌ كوردستانی‌ عێراقدا.
ق م(خ/ع)- ج پ

100 رۆشنبیرو چالاكوانی‌ مه‌ده‌نی‌ داوای‌ ئازادكردنی‌ خۆپیشانده‌رێكی‌ هه‌ڵه‌بجه‌ ده‌كه‌ن

jamal — Mon, 17 Oct 2011 12:04:00 GMT

سلێمانی‌/ئه‌سوات ئه‌لعێراق: 100 رۆشنبیرو چالاكوانی‌ مه‌ده‌نی‌، رۆژی‌ دووشه‌ممه‌، داوایان له‌حكومه‌تی‌ هه‌رێمی‌ كوردستان كرد ده‌ستبه‌جێ‌ خۆپیشانده‌رێك ئازاد بكات، كه‌ ماوه‌ی‌ 10 رۆژه‌ به‌تۆمه‌تی‌ هاندان بۆ كوشتن له‌نێو رووداوه‌كانی‌ دوای‌ 17ی‌ شوباتی‌ هه‌رێمی‌ كوردستان ده‌ستگیركراوه‌.

به‌پێی‌ به‌یاننامه‌یه‌ك كه‌وێنه‌یه‌كی‌ نێردراوه‌ بۆ ئاژانسی‌ (ئه‌سوات ئه‌لعێراق)" 100 رۆشنبیرو چالاكوانی‌ مه‌ده‌نی‌ داوای‌ ئازادكردنی‌ هه‌ڵسوراوێكی‌ خۆپیشاندانه‌كانی‌ قه‌زای‌ هه‌ڵه‌بجه‌ (ئیبراهیم كاكه‌ ئه‌حه‌) ده‌كه‌ن كه‌ له‌دوای‌ رووداوی‌ 17ی‌ شوبات‌و خۆپیشاندانه‌كانی‌ شاری‌ سلێمانی‌‌و ئه‌و قه‌زایه‌وه‌ ده‌ستگیركراوه‌".

به‌پێی‌ به‌یاننامه‌كه‌ ده‌ستگیركردنی‌ ناوبراو له‌كاتێكدایه‌ كه‌ "ماوه‌ی 5 مانگه‌ هه‌ردوو حزبی ده‌سه‌لاتدار ڕۆژانه‌ به‌ڵێنی چاكسازی‌و وه‌لامدانه‌وه‌ به‌ داخوازیه‌كانی خه‌لكی كوردستان ده‌ده‌ن‌و ته‌نانه‌ت له‌مانگی ڕابردوشدا سه‌رۆكی هه‌رێم مه‌سعود بارزانی به‌ڵینی چاره‌سه‌ركردنی گیروگرفت‌و داخوازییه‌كانی خه‌لكی كوردستانیداو چه‌ندجار دووپاتی ئه‌وه‌ی كرده‌وه‌ كه‌ هه‌موو تاوانباران‌و ته‌قه‌كه‌رانی ڕووداو‌و خۆپیشاندانه‌كانی پاش 17 شوبات بده‌ن به‌دادگا تا به‌ سزای‌ خۆیان ده‌گه‌ن".

هێماشی‌ بۆ ئه‌وه‌كردووه‌ كه‌ "تائێستا نه‌ك ته‌نیا یه‌ك تاوانبار ده‌ستگیر نه‌كراوه‌، به‌ڵكو به‌پێچه‌وانه‌وه‌ پۆلیسی سلیمانی وه‌ك یه‌كه‌مین هه‌نگاو له‌هه‌وڵی ده‌سگیركردن‌و دادگاییكردنی كه‌سانێكه‌ كه‌ له‌خۆپیشاندانه‌كانی پاش 17 شوباتدا به‌شداریان كردوه‌".

له‌به‌یاننامه‌كه‌دا ئه‌وه‌شهاتووه‌ كه‌ "ماوه‌ی زیاتر له‌ 10 ڕۆژه‌ ده‌ستگیركاروه‌كه‌ كه‌ هه‌ڵسوڕاوێكی دیاری خۆپیشاندانه‌كانی شاری هه‌له‌بجه‌ی شه‌هیدبوو، له‌لایه‌ن پۆلیسی سلیمانیه‌وه‌ به‌تاوانی ئه‌وه‌ی كه‌ گوایه‌ ناوبراو له‌خۆپیشاندا هانی خه‌لكی داوه‌ بۆ كوشتن، ده‌ستگیركراوه‌".

جێی‌ ئاماژه‌یه‌ له‌رۆژی‌ 17ی‌ شوباتی‌ 2011 به‌ناوی‌ پشگیریكردنی‌ گه‌لانی‌ میسرو لیبیا خۆپیشاندانێك له‌شاری‌ سلێمانی‌ به‌رێوه‌چوو، به‌ڵام دوای‌ ته‌واوبوونی‌ خۆپیشاندانه‌كه‌ له‌به‌رده‌م سه‌رای‌ ناوه‌راستی‌ سلێمانی‌، رێره‌وی‌ خۆپیشاندانه‌كه‌ گۆڕدرا بۆ به‌رده‌م لقی‌ چواری‌ پارتی‌ دیموكراتی‌ كوردستان‌و شه‌ڕو پێكدادان له‌نێوان هێزه‌ چه‌كداره‌كانی‌ پارتی‌‌و خۆپیشانده‌ران روویداو دواتر دوو كه‌س له‌خۆپیشانده‌ران كوژران‌و 30 كه‌سی‌ تر برینداربوون، هه‌ر له‌به‌ر ئه‌وه‌ش 62 رۆژ خۆپیشاندان له‌شارو شارۆچكه‌كانی‌ سه‌ر به‌پارێزگاكه‌ به‌رده‌وامبوو كه‌ دواتر 10 كوژراو زیاتر له‌ 700 بریندار له‌خۆپیشانده‌ران‌و هێزه‌كانی‌ پۆلیسی‌ لێكه‌وته‌وه‌.
س غ(خ)- ج پ

قوتابیانی‌ هه‌ولێر دژ به‌دابه‌زاندنی‌ ئاڵای‌ كوردستان له‌سه‌ر داموده‌زگاكانی‌ خانه‌قین خۆپیشاندانێكیان رێكخست

jamal — Wed, 19 Oct 2011 16:33:00 GMT

هه‌ولێر/ئه‌سوات ئه‌لعێراق: قوتابیانی‌ شاری‌ هه‌ولێر،رۆژی‌ چوارشه‌ممه‌، وه‌ك ناڕه‌زاییه‌ك له‌باره‌ی‌ هێنانه‌ خواره‌وه‌ی‌ ئاڵای‌ كوردستان له‌سه‌ر باڵه‌خانه‌‌و داموده‌زگاكانی‌ قه‌زای‌ خانه‌قین، خۆپیشاندانێكیان رێكخست.

له‌مباره‌یه‌وه‌ سۆران عومه‌ر یه‌كێك له‌به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "سه‌دان قوتابی‌ ئاماده‌یی‌‌و زانكۆ، ئه‌مڕۆ(چوارشه‌ممه‌) له‌به‌رده‌م سه‌نته‌ری‌ رۆشنبیریی‌ له‌شاره‌كه‌دا بۆ پرۆتێستۆكردنی‌ بڕیاره‌كه‌ی‌ مالیكیی‌ له‌باره‌ی‌ دابه‌زاندنی‌ ئاڵای‌ كوردستان له‌سه‌ر ده‌زگاكانی‌ خانه‌قین، خۆپیشاندانێكی‌ ناڕه‌زاییان رێكخست".

ئاماژه‌شیدا به‌وه‌ی‌ كه‌ "عیراق وڵاتێكی‌ دیموكراتییه‌‌و هیچ كه‌سێك مافی‌ ئه‌وه‌ی‌ نییه‌ ئه‌م ئاڵایه‌ بهێنێته‌ خواره‌وه‌".

هه‌روه‌ها هاوڕێ‌ عوسمان كه‌ یه‌كێكی‌ تر بوو له‌ به‌شداربووان وتی‌ "به‌رزكردنه‌وه‌ی‌ ئاڵای‌ كوردستان له‌هه‌ر شوێنێكی‌ عێراقدا كارێكی‌ زۆر سروشتییه‌ چونكه‌ ئاڵایه‌كی‌ عێراقییه‌".ئێستادا وڵات پێویستی‌ پێیان هه‌یه‌، بۆ چاره‌سه‌ركردنی‌ گرفته‌ سیاسییه‌كان".

جێی‌ ئاماژه‌یه‌ به‌هۆی‌ بابه‌تی‌ هێنانه‌ خواره‌وه‌ی‌ ئاڵای‌ كوردستانه‌وه‌ چه‌ندین خۆپیشاندانی‌ جیاجیا له‌ شاره‌كانی‌ هه‌ولێر‌و سلێمانی‌‌و خانه‌قیندا ئه‌نجامدران.
م هـ ا(خ/ع)- ج پ

خۆپیشاندانێك له‌به‌رده‌م كونسوڵگه‌ریی‌ توركیا‌ له‌ هه‌ولێر به‌ڕێوه‌چوو

jamal — Tue, 25 Oct 2011 18:51:00 GMT

هه‌ولێر/ئه‌سوات ئه‌لعێراق: به‌مه‌به‌ستی‌ ئیدانه‌كردنی‌ ئۆپه‌راسیۆنه‌ سه‌ربازییه‌كانی‌ سوپای‌ توركیا بۆسه‌ر بنكه‌كانی‌ پارتی‌ كرێكارانی‌ كوردستان، سه‌دان كه‌س له‌ كوردانی‌ ئه‌م وڵاته‌ خۆپیشاندانێكیان له‌به‌رده‌م كونسوڵگه‌ریی‌ توركیا له‌ هه‌ولێر رێكخست‌و داوای‌ چاره‌سه‌ركردنی‌ كێشه‌ی‌ كوردیان كرد به‌ رێگه‌ی‌ ئاشتییانه‌.

خۆپیشانده‌ران ئاڵای‌ كوردستانی‌و وێنه‌ی‌ عه‌بدوڵلا ئۆجه‌لانی‌ سه‌رۆكی‌ پارتی‌ كرێكارانی‌ كوردستانیان به‌رزكردبووه‌وه‌، هه‌روه‌ها وێنه‌ی‌ ئه‌و قوربانیانه‌یان كه‌ به‌هۆی‌ بۆردومانه‌كانی‌ توركیاوه‌ بۆسه‌ر هه‌رێمی‌ كوردستانه‌وه‌ گیانیان له‌ده‌ستداوه‌ به‌رزكردبووه‌وه‌‌و چه‌ندین دروشمی‌ دیكه‌ی‌ دژ به‌م وڵاته‌یان ده‌وته‌وه‌.

دۆزدار یه‌كێك له‌به‌شداربووانی‌ خۆپیشاندانه‌كه‌ بوو به‌ ئاژانسی‌(ئه‌سوات ئه‌لعێراق)ی‌ وت "داوا له‌ حكومه‌تی‌ توركیا ده‌كه‌ین هێرشه‌كانی‌ سه‌ر پارتی‌ كرێكاران رابگرێت، هه‌روه‌ها رێگه‌ چاره‌ی‌ ئاشتییانه‌ بگرێته‌به‌ر بۆ چاره‌سه‌ركردنی‌ كێشه‌ی‌ كورد".

هه‌روه‌ها سالحه‌ ئه‌حمه‌دی‌ كه‌ یه‌كێكی‌ تر بوو له‌ به‌شداربووانی‌ خۆپیشاندانه‌كه‌ وتی‌ "داوای‌ ئازادكردنی‌ ئۆجه‌لان‌و راگرتنی‌ هێرشه‌كانی‌ توركیا ده‌كه‌ین، هه‌روه‌ها به‌توندی‌ كوژرانی‌ ژماره‌یه‌ك چه‌كدارای‌ په‌كه‌كه‌ ئیدانه‌ده‌كه‌ین".
ك ن م(خ/ع)- ج پ

ده‌یان كه‌س له‌به‌رده‌م كامپی‌ ئه‌شره‌ف له‌ پارێزگای‌ دیاله‌دا خۆپیشاندانێكیان رێكخست

jamal — Tue, 01 Nov 2011 13:12:00 GMT

دیاله‌/ئه‌سوات ئه‌لعێراق: ده‌یان كه‌س له‌ دانیشتوانی‌ پارێزگای‌ دیاله‌، رۆژی‌ سێشه‌ممه‌، له‌به‌رده‌م باره‌گای‌ موجاهیدینی‌ خه‌لقی‌ ئێران له‌ كامپی‌ ئه‌شره‌فدا له‌ خۆپیشاندانێكدا ئه‌م رێكخراوه‌یان به‌وه‌ تۆمه‌تبار كرد كه‌ له‌پشته‌وه‌ی‌ كاره‌ توندوتیژییه‌كاندایه‌.

له‌مباره‌یه‌وه‌ عوده‌ی‌ خدرانی‌ قائیمقامی‌ قه‌زای‌ خاڵس به‌ ئاژانسی‌(ئه‌سوات ئه‌لعێراق)ی‌ وت "ده‌یان كه‌س له‌ دانیشتوانی‌ ناوچه‌ جیاجیاكانی‌ سه‌ر به‌ پارێزگای‌ دیاله‌، ئه‌مڕۆ(سێشه‌ممه‌) له‌به‌رده‌م كامپی‌ ئه‌شره‌فی‌ باره‌گای‌ رێكخراوی‌ موجاهیدینی‌ خه‌ڵقی‌ ئێرانی‌ له‌ ناحیه‌ی‌ عوزێمی‌ باكوری‌ به‌عقوبه‌ خۆپیشاندانێكی‌ ناڕه‌زاییان دژ به‌م رێكخراوه‌ رێكخست".

وتیشی‌ "خۆپیشانده‌ران ئه‌م رێكخراوه‌یان به‌وه‌ تۆمه‌تبار كرد كه‌ له‌پشت كرده‌وه‌ توندوتیژییه‌كانی‌ سنوری‌ پارێزگاكه‌وه‌ن، هه‌وره‌ها به‌شداریشی له‌سه‌ركوتكردنی‌ راپه‌ڕینی‌ شه‌عبانییه‌دا كردووه‌ له‌ ساڵی‌ 1991".

روونیشیكرده‌وه‌ كه‌ "خۆپیشانده‌ران چه‌ند دروشمێكیان به‌رزكردبووه‌وه‌ تێیدا داوای‌ ده‌ركردنی‌ ئه‌م رێكخراوه‌یان كردبوو له‌ عێراقدا".

جێی‌ ئاماژه‌یه‌ پێشتر حكومه‌تی‌ عێراقی‌ بڕیاریداوه‌ له‌ كۆتایی‌ ئه‌مساڵدا ئه‌م رێكخراوه‌ له‌ناو خاكی‌ عێراقدا وه‌ده‌رنێت‌و راشیگه‌یاندووه‌ كه‌ چه‌كدارانی‌ رێكخراوه‌كه‌ به‌شداربوون له‌ كوشتنی‌ عێراقییه‌كان.
ح م ا(خ/ع)- ج پ

ژماره‌یه‌ك قوتابی‌ وه‌رنه‌گیراو له‌ زانكۆ‌و په‌یمانگاكان خۆپیشاندانێكیان له‌ هه‌ولێر رێكخست

jamal — Wed, 16 Nov 2011 12:22:00 GMT

هه‌ولێر/ئه‌سوات ئه‌لعێراق: ده‌یان خوێندكاری‌ ده‌رچووی‌ ئاماده‌یی‌، ئه‌مڕۆ چوارشه‌ممه‌، به‌هۆی‌ ئه‌وه‌ی‌ ناویان له‌ زانكۆ‌و په‌یمانگاكان نه‌هاتۆته‌وه‌ له‌به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵا له‌ شاری‌ هه‌ولێر خۆپشاندانێكیان رێكخست.

له‌مباره‌یه‌وه‌ سیروان محه‌مه‌د یه‌كێك بو له‌ قوتابیه‌ خۆپیشانداه‌ره‌كاندا به‌ ئاژانسی‌(ئه‌سوات ئه‌لعێراق)ی‌ وت "ئه‌م خۆپیشاندانه‌مان بۆ ئه‌وه‌یه‌ تاكو له‌ په‌یمانگا‌و زانكۆكانی‌ هه‌رێمی‌ كوردستان وه‌ربگیرێین".
وتیشی‌ "تێكڕای‌ نمره‌كانم 58% له‌ به‌شی‌ زانستیدا".

هه‌روه‌ها نه‌سرین عومه‌ر كه‌ یه‌كێكی‌ تر بوو له‌ خۆپیشانده‌ره‌كان وتی‌ "ساڵی‌ رابردوو به‌ تێكڕای‌ نمره‌ی‌ 61 ده‌رچووم، ئه‌مڕۆش هاتووم تا له‌ یه‌كێك له‌ په‌یمانگا یاخود زانكۆكانی‌ كوردستان وه‌ربگیرێم".
هه‌وره‌ها وتی‌ "مافه‌كانمان له‌به‌ر بێتوانایی‌ به‌رپرسان‌و توانای‌ ئیدارییان به‌زایه‌ع چووه‌".
داواشی‌ له‌ وه‌زاره‌ت كرد "چاره‌سه‌رێك بۆ ئه‌م گرفته‌ بدۆزێته‌وه‌".

جێی‌ ئاماژه‌یه‌ د. دلاوه‌ر عه‌لائه‌دینی‌ وه‌زیری‌ خوێندنی‌ باڵا‌و توێژینه‌وه‌ی‌ زانستی‌ له‌ حكومه‌تی‌ هه‌رێمی‌ كوردستان، دوێنێ‌‌ سێشه‌ممه‌، ناوی‌ ده‌رچووانی‌ ئاماده‌یی‌ له‌ زانكۆ‌و په‌یمانگاكانی‌ هه‌رێمی‌ راگه‌یاند‌و تێیدا هه‌زار‌و 800 قوتابی‌ له‌ كۆی‌ 30هه‌زار‌و 880 قوتابیدا ناویان له‌ زانكۆ‌و په‌یمانگاكان ده‌رچووه‌.
ق م(خ/ع)- ج پ

ده‌رچووانی‌ شه‌شی‌ ئاماده‌یی‌ جارێكی‌ دیكه‌ خۆپیشاندانی ناڕه‌زاییان له‌ هه‌ولێر رێكخسته‌وه‌

jamal — Sun, 20 Nov 2011 13:29:00 GMT

هه‌ولێر/ئه‌سوات ئه‌لعێراق: بۆ جاری‌ دووهه‌م له‌دوای‌ راگه‌یاندنی‌ ناوی‌ ده‌رچووانی‌ شه‌شه‌می‌ ئاماده‌یی‌ له‌ زانكۆ‌و په‌یمانگاكانی‌ هه‌رێمی‌ كوردستان، ده‌یان خوێندكاری‌ ده‌رچووی‌ ئاماده‌یی‌، رۆژی‌ یه‌كشه‌ممه‌، به‌هۆی‌ ئه‌وه‌ی‌ ناویان له‌ زانكۆ‌و په‌یمانگاكان نه‌هاتۆته‌وه‌ له‌به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵا له‌ شاری‌ هه‌ولێر خۆپشاندانێكیان رێكخست.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) رایگه‌یاند" ده‌یان ده‌رچووی‌ شه‌شه‌می‌ ئاماده‌یی‌ ئه‌وانه‌ی‌ كه‌ ناویان له‌ زانكۆ‌و په‌یمانگاكانی‌ هه‌رێمی‌ كوردستان نه‌گه‌ڕاوه‌ته‌وه‌، له‌ به‌رده‌م باڵه‌خانه‌ی‌ وه‌زاره‌تی‌ خوێندنی‌ باڵا‌و توێژینه‌وه‌ی‌ زانستی‌ له‌ شاری‌ هه‌ولێر خۆپیشاندانێكیان رێكخست".

وتیشی‌ "له‌نێو خوێندكاره‌كاندا هه‌بوو تێكڕای‌ نمره‌كانی‌ له‌نێوان 58 تا 62 بوو، به‌ڵام ناوی‌ نه‌گه‌ڕاوه‌ته‌وه‌‌و ئه‌مه‌ش بۆته‌ مایه‌ی‌ ناڕه‌زایی‌‌و به‌هۆیه‌وه‌ باڵه‌خانه‌ی‌ وه‌زاره‌تیان هێلكه‌باران كرد".

جێی‌ ئاماژه‌یه‌ د. دلاوه‌ر عه‌لائه‌دینی‌ وه‌زیری‌ خوێندنی‌ باڵا‌و توێژینه‌وه‌ی‌ زانستی‌ له‌ حكومه‌تی‌ هه‌رێمی‌ كوردستان، رۆژی‌ سێشه‌ممه‌ی‌ رابردوو‌، ناوی‌ ده‌رچووانی‌ ئاماده‌یی‌ له‌ زانكۆ‌و په‌یمانگاكانی‌ هه‌رێمی‌ راگه‌یاند‌و تێیدا هه‌زار‌و 800 قوتابی‌ له‌ كۆی‌ 30هه‌زار‌و 880 قوتابیدا ناویان له‌ زانكۆ‌و په‌یمانگاكان ده‌رچووه‌، رۆژێك دوای‌ ئه‌م راگه‌یاندنه‌ ده‌یان ده‌رچوو بۆ هه‌مان مه‌به‌ست خۆپیشاندانێكیان رێكخست.
ق م(خ/ع)- ج پ

ده‌یان خوێندكاری‌ خوێندنی‌ ئێوارانی‌ زانكۆی‌ سه‌ڵاحه‌دین داوای‌ نه‌هێشتنی‌ پاره‌ی‌ خوێندن ده‌كه‌ن

jamal — Tue, 22 Nov 2011 19:21:00 GMT

هه‌ولێر/ئه‌سوات ئه‌لعێراق: ده‌یان خوێندكاری‌ خوێندنی‌ ئێوارانی‌ زانكۆی‌ سه‌ڵاحه‌دین، رۆژی‌ سێشه‌ممه‌، له‌ خۆپیشاندانێكدا داوای‌ نه‌هێشتنی‌ پاره‌ی‌ خوێندنیان كرد.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق)وتی‌ "ده‌یان خوێندكاری‌ خوێندنی‌ ئێوارانی‌ كۆلیژه‌كانی‌ كارگێڕی‌‌و ئابوری‌، یاسا، په‌روه‌رده‌، ئه‌ده‌بیات، ئه‌مڕۆ(سێشه‌ممه‌) له‌ خۆپیشاندانێكدا داوایانكرد پاره‌ی‌ خوێندنی‌ ساڵانه‌ نه‌مێنێت، به‌وپێیه‌ی‌ كه‌ كۆلیژه‌كان حكومیین".

وتیشی‌"خوێندكاره‌ خۆپیشانده‌ره‌كان رێگه‌ی‌ سه‌ره‌كی‌ شه‌قامی‌ زانكۆیان داخست".
ق م(خ/ع)- ج پ

Expertise development partnership signed by Iraq and UNDP

jamal — Sun, 11 Dec 2011 18:02:00 GMT

BAGHDAD / Aswat al-Iraq: United Nations Development Program (UNDP) signed today with Iraqi Ministry of Oil a two-year new partnership to develop expertise and human recourses in oil and gas sectors in order to create new work opportunities, according to a statement issued Sunday here.

The statement, copy received by Aswat al-Iraq, added that this partnership will enhance the training aspects of the ministry, as well as having new skilled expertise.

It added that Iraq will be one of the major oil powers in the few coming years, pointing that its reserves are estimated to be 143 billion barrels, with a possibility of having additional 200 billion barrels, with increasing production capacity from 2.6 million b/d to 12 million b/d by 2017.

It is hoped that other UN agencies, like ILO, UNIDO and UNESCO to join this partnership to provide necessary expertise for oil and gas workers.

هه‌زاران كه‌س له‌ به‌عقوبه‌ دژ به‌ راگه‌یاندنی‌ به‌هه‌رێمبوونی‌ دیاله‌ خۆپیشاندانێكیان ئه‌نجامدا

jamal — Thu, 15 Dec 2011 14:22:00 GMT

دیاله‌/ئه‌سوات ئه‌لعێراق: هه‌زاران كه‌س له‌ دانیشتوانی‌ به‌عقوبه‌، رۆژی‌ پێنجشه‌ممه‌، دژ به‌ بڕیاره‌كه‌ی‌ ئه‌نجومه‌نی‌ پارێزگای‌ دیاله‌ له‌باره‌ی‌ به‌هه‌رێمبوونی‌ پارێ.گاكه‌ خۆپیشاندانێكیان ئه‌نجامدا، داواشیان له‌ ئه‌نجومه‌نه‌كه‌ كرد له‌م بڕیاره‌ی‌ پاشگه‌زبێته‌وه‌.

سه‌رچاوه‌یه‌كی‌ ئاگادار به‌ ئاژانسی‌(ئه‌سوات ئه‌لعێراق)ی‌ وت "هه‌زاران كه‌س له‌ دانیشتوانی‌ به‌عقوبه‌، ئه‌مڕۆ(پێنجشه‌ممه‌)له‌به‌رده‌م باڵه‌خانه‌ی‌ ئه‌نجومه‌نی‌ پارێزگای‌ دیاله‌دا خۆپیشاندانێكیان ئه‌نجامدا، دژ به‌ بڕیاره‌كه‌ی‌ ئه‌نجومه‌ن له‌ باره‌ی‌ به‌هه‌رێمبوونه‌وه‌".

روونیشیكرده‌وه‌ كه‌ "خۆپیشانده‌ره‌كان به‌ڵێنیان داوه‌ به‌رده‌م باڵه‌خانه‌كه‌ چۆڵ نه‌كه‌ن تا ئه‌و كاته‌ی‌ ئه‌نجومه‌ن له‌ بڕیاره‌كه‌ی‌ پاشگه‌زده‌بێته‌وه‌".

جێی‌ ئاماژه‌یه‌ ئه‌نجومه‌نی‌ پارێزگای‌ دیاله‌، رۆژی‌‌(دووشه‌ممه‌) له‌دانیشتنێكیدا به‌ زۆرینه‌ی‌ ده‌نگ بڕیاریدا پارێزگاكه‌ ببێته‌ هه‌رێمێكی‌ سه‌ربه‌خۆ.
ح م ا(خ/ع)- ج پ

(ئه‌سوات ئه‌لعێراق) به‌بۆنه‌ی‌ سه‌ری‌ ساڵی‌ زاینییه‌وه‌ پیرۆزبایی‌ له‌سه‌رجه‌م عێراقییه‌كان ده‌كات

jamal — Sun, 01 Jan 2012 00:00:00 GMT

ئاژانسی‌(ئه‌سوات ئه‌لعێراق) به‌بۆنه‌ی‌‌ سه‌ری‌ ساڵی‌ زاینییه‌وه‌ پیرۆزبایی‌ خۆی‌ ئاراسته‌ی‌ سه‌رجه‌م عێراقییه‌كان ده‌كات، به‌و هیوایه‌شه‌ ساڵی‌ نوێ‌ ساڵی‌ ئاشتی‌‌و خۆشگوزه‌رانی‌ بێت.

كۆنفرانسی‌ داڕشتنی پلانی کاری هه‌رێمیی مافه‌کانی مرۆڤ له‌ هه‌رێمی کوردستان ده‌ستیپێکرد

jamal — Tue, 10 Jan 2012 17:35:00 GMT

هه‌ولێر/ئه‌سوات ئه‌لعێراق: به‌ ئاماده‌بوونی‌ مارتن كۆپله‌ری‌ نێردراوی‌ سكرتێری‌ گشتی‌ نه‌ته‌وه‌ یه‌كگرتووه‌كان له‌ عێراق‌و ژماره‌یه‌ك به‌رپرسی‌ هه‌رێمی‌ كوردستان، رۆژی‌ سێشه‌ممه‌، كۆنفرانسی‌ داڕشتنی پلانی کاری هه‌رێمیی مافه‌کانی مرۆڤ له‌ کوردستان ده‌ستیپێکرد.

له‌ كۆنفرانسه‌كه‌دا فه‌لاح مسته‌فای‌ به‌پرسی‌ فه‌رمانگه‌ی‌ په‌یوه‌ندییه‌كانی‌ ده‌ره‌وه‌ له‌ حكومه‌تی‌ هه‌رێمی‌ كوردستان وتی‌ "حكومه‌تی‌ هه‌رێمی‌ كوردستان به‌ هاوكاری‌ رێكخراوه‌كانی‌ كۆمه‌ڵگه‌ی‌ مه‌ده‌نی‌‌و چاڵاكوانانی‌ بواری‌ مافه‌كانی‌ ژن‌و منداڵان‌و زیندانیان‌و رۆژنامه‌نوسان‌و ئازادی‌ راده‌ربڕین ئه‌م كۆنفرانسه‌ی‌ رێكخستوه‌".

روونیشیكرده‌وه‌ كه‌ "حكومه‌تی‌ هه‌رێم به‌بایه‌خه‌وه‌ له‌ پرسه‌كانی‌ مافه‌كانی‌ مرۆڤ ده‌ڕوانێت".
هه‌ر له‌ كۆنفرانسه‌كه‌دا مارتن كۆپله‌ر له‌وته‌یه‌كیدا داوای‌ له‌ حكومه‌تی‌ هه‌رێمی‌ كوردستان كرد "پابه‌ند بێت به‌م پلانه‌، چونكه‌ ده‌بێـه‌ هۆی‌ به‌ره‌وپێشه‌وه‌چوونی‌ مافه‌كانی‌ مرۆڤ له‌ كوردستاندا".
ناوبراو "ئه‌م هه‌نگاوه‌ی‌ به‌ گرنگ وه‌سفكرد".

له‌لایه‌كی‌ تره‌وه‌ هۆشیار مالۆ سه‌رۆكی‌ كۆمه‌ڵه‌ی‌ مافه‌كانی‌ مرۆڤ له‌ كوردستان، داوایكرد "سه‌رجه‌م ئه‌و یاسایانه‌ی‌ كه‌ له‌ په‌ڕله‌مانی‌ كوردستاندا ده‌رچوون له‌گه‌ڵ رێككه‌وتننامه‌ نێوده‌وڵه‌تییه‌كاندا كۆك بن، به‌تایبه‌ت له‌گه‌ڵ ئه‌و رێككه‌وتننامانه‌ی‌ كه‌ عێراق ئیمزای‌ كردوون".
ك ن م(خ/ع)- ج پ

سه‌نته‌ری‌ میترۆ: له‌ ساڵی‌ 2011دا 359 حاڵه‌تی‌ پێشێلكاری‌ دژ به‌ رۆژنامه‌نوسان له‌ هه‌رێمی‌ كوردستاندا تۆماركراون

jamal — Sat, 14 Jan 2012 12:50:00 GMT

سلێمانی‌/ئه‌سوات ئه‌لعێراق: سەنتەری میترۆ بۆ داکۆکیکردن لە رۆژنامەنوسان، رۆژی‌ شه‌ممه‌، رایگه‌یاند كه‌ له‌ماوه‌ی‌ ساڵی‌ 2011دا له‌ هه‌رێمی‌ كوردستان 359 حاڵه‌تی‌ پێشێلكاری‌ دژ به‌ رۆنامه‌نوسان تۆماركراوه‌.

له‌مباره‌یه‌وه‌ ئاوات عه‌لی‌ ئه‌ندامی‌ بۆردی‌ سه‌نته‌ره‌كه‌ له‌میانی‌ كۆنگره‌یه‌كی‌ رۆژنامه‌وانیدا وتی‌ "میترۆ له‌ ساڵی‌ 2011دا 359 حاڵه‌تی‌ پێشێلكاری‌ دژ به‌ رۆژنامه‌نوسانی‌ هه‌رێمی‌ كوردستانی‌ تۆماركردووه‌".

روونیشیكرده‌وه‌ كه‌ " له‌م ژماره‌یه‌دا چوار حاڵه‌تی‌ برینداربوون به‌ گولله‌‌و هه‌شت حاڵه‌تی‌ سوتاندنی‌ نوسنگه‌ی‌ كه‌ناڵی‌ راگه‌یاندن‌و 85 حاڵه‌تی‌ لێدان‌و 57 حاڵه‌تی‌ هه‌ڕه‌شه‌كردن‌و 52ی‌ دیكه‌ی‌ ده‌ستبه‌سه‌ركردن تۆماركراون".

هه‌روه‌ها وتی‌ "له‌ نێو سه‌رجه‌م حاڵه‌ته‌كاندا 81 حاڵه‌تی‌ رێگریكردن له‌ كاری‌ رۆژنامه‌وانی‌‌و 9 حاڵه‌تی‌ شكاندنی‌ كامێڕا‌و كه‌لوپه‌لی‌ رۆنامه‌وانی‌‌و 9 حاڵه‌تی‌ ته‌قه‌كردن له‌ رۆژنامه‌نوسان‌و 41 حاڵه‌تی‌ ده‌ستگرتن به‌سه‌ر كه‌لوپه‌لی‌ رۆژنامه‌وانی‌‌و دوو حاڵه‌تی‌ ته‌قه‌كردن له‌ كه‌ناڵه‌كانی‌ راگه‌یاندن‌و دوو حاڵه‌تی‌ دانانه‌وه‌ی‌ بۆمب‌و ته‌نها حاڵه‌تێكی‌ سوتاندنی‌ ئۆتۆمبێڵ هه‌بوون".

هه‌ر له‌‌كۆنگره‌ رۆژنامه‌نوسیه‌كه‌دا ره‌حمان غه‌ریب رێكخه‌ری سه‌نته‌ری میترۆ وتی‌ "له‌ ساڵی‌ رابردودا به‌هۆی‌ رووداوه‌ سیاسییه‌كانه‌وه‌ رێژه‌ی‌ هێرشكردنه‌ سه‌ر رۆژنامه‌نوسان له‌ هه‌رێمی‌ كوردستان به‌رزبووه‌وه‌".

تیشكیشی‌ خسته‌ر سه‌ر ئه‌وه‌ی‌ كه‌ "به‌ته‌نها له‌ مانگی‌ شوبات‌و نیساندا 200 حاڵه‌تی‌ پێشێلكردنی‌ دژ به‌ رۆژنامه‌نووسان تۆماركران".
س غ(خ/ع)- ج پ

خۆپیشاندانی‌ خه‌ڵكی‌ چۆمان به‌رده‌وامه‌‌و داواده‌كرێت بكوژی‌ گه‌نجێكی‌ ناوچه‌كه‌ بكوژرێته‌وه‌

jamal — Sat, 04 Feb 2012 15:28:00 GMT

هه‌ولێر/ئه‌سوات ئه‌لعێراق: خۆپیشاندانێكی‌ جه‌ماوه‌ری‌ دانیشتوانی‌ قه‌زای‌ چۆمان ماوه‌ی‌ چوار رۆژه‌ به‌رده‌وامه‌ له‌ په‌راوێزی‌ كوشتنی‌ گه‌نجێك‌و فڕێدانی‌ ته‌رمه‌كه‌یه‌وه‌‌و داوا ده‌كرێت به‌زووترین كات بكوژه‌كه‌ بكوژرێته‌وه‌، به‌پێی‌ به‌شداربوێكی‌ خۆپیشاندانه‌كه‌.

به‌شداربووه‌كه‌ ئێواره‌ی‌ شه‌ممه‌، له‌ناو ئاپۆرای‌ خۆپیشاندانه‌كه‌دا به‌ ئاژانسی‌(ئه‌سوات ئه‌لعێراق)ی‌ وت "ماوه‌ی‌ چوار رۆژه‌ خۆپیشاندانه‌كه‌ به‌رده‌وامه‌، به‌هۆی‌ ئه‌وه‌ی‌ كه‌سێك گه‌نجێكی‌ ناوچه‌كه‌ی‌ كوشتووه‌‌و ته‌رمه‌كه‌ی‌ فڕێداوه‌ته‌ ناو روبارێكه‌وه‌".

روونیشیكرده‌وه‌ كه‌ "خۆپیشانده‌ران رێگه‌ی‌ سه‌ره‌كی‌ هاملتۆنیان گرتووه‌ كه‌ له‌ سنوری‌ حاجی‌ ئۆمه‌رانه‌وه‌، هه‌رێمی‌ كوردستان به‌ ئێرانه‌وه‌ ده‌به‌ستێته‌وه‌‌و داوا ده‌كه‌ن به‌زووترین كات بكوژه‌كه‌ بكوژرێته‌وه‌".

وتیشی‌ له‌ ئێستادا شاندێكی‌ كه‌سایه‌تییه‌كانی‌ چۆمان سه‌ردانی‌ په‌ڕله‌مان‌و ئه‌نجومه‌نی‌ وه‌زیرانی‌ هه‌رێمی‌ كوردستانی كردووه‌ تاكو ئه‌م بابه‌ته‌ یه‌كلابكاته‌وه‌".

(ئه‌سوات ئه‌لعێراق)له‌باره‌ی‌ ئه‌م رووداوه‌وه‌ چه‌ند جارێك په‌یوه‌ندیكرد به‌ پارێزگاری‌ هه‌ولێر نه‌وزاد هادی‌ به‌ڵام هیچ وه‌ڵامێكی‌ ده‌ست نه‌كه‌وت.
ج پ(خ)

خۆپیشانده‌رانی‌ چۆمان مه‌ترسییان هه‌یه‌ له‌وه‌ی‌ بكوژی‌ هاوڵاتیه‌ كوژراوه‌كه‌ به‌سزای‌ دادپه‌وه‌رانه‌ نه‌گات

jamal — Sun, 05 Feb 2012 14:21:00 GMT

هه‌ولێر/ئه‌سوات ئه‌لعێراق: خۆپیشاندانه‌‌ جه‌ماوه‌رییه‌كه‌ی‌ دانیشتوانی‌ قه‌زای‌ چۆمان پێینایه‌ رۆژی‌ پێنجه‌می‌ خۆیه‌وه‌ له‌ په‌راوێزی‌ كوشتنی‌ گه‌نجێك‌و فڕێدانی‌ ته‌رمه‌كه‌یه‌وه‌‌و خۆپیشانده‌رانیش مه‌ترسییان هه‌یه‌ بكوژی‌ هاوڵاتیه‌ كوژراوه‌كه‌ به‌سزای‌ دادپه‌وه‌رانه‌ نه‌گات.

له‌مباره‌یه‌وه‌ سۆران محه‌مه‌د عومه‌ر كه‌ هاوڵاتییه‌كی‌ ئه‌و سنووره‌یه‌ به‌ ئاژانسی‌(ئه‌سوات ئه‌لعێراق)ی‌ وت "ده‌مانه‌وێ‌ بكوژی‌ هاوڵاتی‌(رێباز ره‌حیم) به‌ سزای‌ یاسایی‌ خۆی‌ بگات، جا له‌سێداره‌دان بێ‌ یان زیندانی‌ تاهه‌تایی‌ یاخود راده‌ستی‌ ئێمه‌ بكرێته‌وه‌".

روونیشیكرده‌وه‌ كه‌ "مه‌ترسی‌ هه‌یه‌ بكوژه‌كه‌ ئازاد بكرێت، چونكه‌ په‌یوه‌ندیی كه‌سیی‌ به‌رفراوانی‌ هه‌یه‌".

هه‌روه‌ها زۆراب كه‌ریمیش یه‌كێكی‌ تر بوو له‌ هاوڵاتییه‌كانی‌ ئه‌و ناوچه‌یه‌‌و به‌(ئه‌سوات ئه‌لعێراق)ی‌ وت "ده‌بێ‌ ئه‌م بكوژه‌ له‌سێداره‌ بدرێت، بۆ ئه‌وه‌ی‌ ببێته‌ عیبڕه‌ت، به‌و پێیه‌ی‌ كه‌ به‌شێوه‌یه‌كی‌ دڕندانه‌ گه‌نجێكی‌ ئه‌م ناوچه‌یه‌ی‌ كوشتووه‌".

هه‌روه‌ها هاووڵاتییه‌كی‌ تر به‌ناوی‌ سلێمان به‌كر وتی‌ "زنیاریمان به‌ده‌ستگه‌یشت كه‌ بكوژه‌كه‌ له‌به‌رامبه‌ر بڕێك پاره‌دا له‌لایه‌ن هێزه‌ ئه‌منییه‌كانه‌وه‌ ئازادكراوه‌، هه‌روه‌ها بیسوومانه‌ كه‌ بیر له‌ ناردنه‌ده‌ره‌وه‌ی‌ ناوبراو ده‌كرێته‌وه‌، بۆیه‌ خه‌ڵكی‌ ناوچه‌كه‌ به‌ توڕه‌ییه‌وه‌ هاتنه‌ سه‌ر شه‌قام".

هه‌ر له‌سه‌ر ئه‌م بابه‌ته‌ شاندێكی‌ كه‌سایه‌تییه‌كانی‌ چۆمان،دوێنێ‌ شه‌ممه‌،سه‌ردانی‌ په‌ڕله‌مان‌و ئه‌نجومه‌نی‌ وه‌زیرانی‌ هه‌رێمی‌ كوردستانی كرد، له‌ ئێستاشدا خۆپیشانده‌ران رێگه‌ی‌ سه‌ره‌كی‌ هاملتۆنیان گرتووه‌ كه‌ له‌ سنوری‌ حاجی‌ ئۆمه‌رانه‌وه‌، هه‌رێمی‌ كوردستان به‌ ئێرانه‌وه‌ ده‌به‌ستێته‌وه.
ق م(خ/ع)- ج پ

خۆپیشانده‌ران رێگه‌ی‌ نێوان چۆمان‌و حاجی‌ ئۆمه‌رانیان كرده‌وه‌

jamal — Sun, 05 Feb 2012 19:29:00 GMT

هه‌ولێر/ئه‌سوات ئه‌لعێراق: دوای‌ ئه‌وه‌ی‌ خۆپیشاندانه‌‌ جه‌ماوه‌رییه‌كه‌ی‌ دانیشتوانی‌ قه‌زای‌ چۆمان پێینایه‌ رۆژی‌ پێنجه‌می‌ خۆیه‌وه‌ له‌ په‌راوێزی‌ كوشتنی‌ گه‌نجێك‌و فڕێدانی‌ ته‌رمه‌كه‌یه‌وه‌‌، رۆژی‌ یه‌كشه‌ممه‌، خۆپیشانده‌ران رێگای‌ سه‌ره‌كی‌ حاجی‌ ئۆمه‌رانیان كرده‌وه‌، ئه‌مه‌ش له‌دوای‌ وه‌رگرتنی‌ به‌ڵێن بوو له‌ حكومه‌تی‌ هه‌رێمه‌وه‌ بۆ به‌سزاگه‌یاندنی‌ بكوژه‌كه‌.

له‌مباره‌یه‌وه‌ یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "نوێنه‌رانی‌ خۆپیشانده‌ران دوێنێ‌ سه‌ردانی‌ سه‌رۆكی‌ حكومه‌تی‌ هه‌رێمی‌ كوردستانیان كرد‌و له‌ كۆبونه‌وه‌یه‌كدا به‌ڵێنیان پێدرا داواكارییه‌كان جێبه‌جێ بكرێن كه‌ دیارترینیان سزادانی‌ بكوژه‌كه‌ به‌پێی‌ یاسا".

وتیشی‌ "خۆپیشانده‌ران سوورن له‌سه‌ر سزادانی‌ بكوژه‌كه‌ له‌ ماوه‌یه‌كی‌ كورتدا، به‌پێچه‌وانه‌وه‌ ده‌ستده‌كه‌نه‌وه‌ به‌ خۆپیشاندان".
ج پ(خ)

خۆپیشاندانێك له‌ سلێمانی‌ بۆ ئازادكردنی‌ ئۆجه‌لان سازكرا

jamal — Mon, 13 Feb 2012 17:29:00 GMT

سلێمانی‌/ئه‌سوات ئه‌لعێراق: ده‌یان گه‌نجی‌ شاری‌ سلێمانی‌، رۆژی‌ دووشه‌ممه‌، خۆپیشاندانێكیان بۆ ئازادكردنی‌ سه‌رۆكی‌ پارتی‌ كرێكارانی‌ كوردستان عه‌بدوڵلا ئۆجه‌لان سازكرد.

له‌مباره‌یه‌وه‌ سه‌رچاوه‌یه‌ك له‌ناو خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "خۆپیشاندانه‌كه‌، سه‌رله‌به‌یانی‌(دووشه‌ممه‌) ده‌ستیپێكرد‌و تێیدا داوا كرا ئۆجه‌لان كه‌ ئێستا له‌ توركیا زیندانیكراوه‌ ئازادبكرێت".

روونیشیكرده‌وه‌ كه‌ "خۆپیشانده‌ران وێنه‌ی‌ ئۆجه‌لان‌و دروشمیان به‌رزكردبووه‌وه‌ كه‌ ئاماژه‌ بوون بۆ داواكاری‌ ئازادكردنی‌ سه‌ركرده‌ی‌ ناوبراو".

وتیشی‌ "خۆپیشاندانه‌كه‌ له‌ به‌رده‌م زانكۆی‌ سلێمانییه‌وه‌ ده‌ستیپێكرد‌و به‌ نێو شه‌قامه‌ سه‌ره‌كییه‌كانی‌ شاردا تێپه‌ڕبوو".

هێماشی‌ بۆ ئه‌وه‌ كرد كه‌ "خۆپیشانه‌كه‌ ده‌برێته‌ شاری‌ هه‌ولێر به‌رده‌م باره‌گای‌ نه‌ته‌وه‌ یه‌كگرتووه‌كان".
س غ(خ/ع)- ج پ

سه‌نته‌ری‌ ميترۆ داوا له‌ رۆژنامه‌نووسان ده‌كات له‌به‌رده‌م مه‌كته‌بی‌ سیاسیی‌ یه‌كێتییدا كۆببنه‌وه‌

jamal — Wed, 22 Feb 2012 19:02:00 GMT

سلێمانی‌/ئه‌سوات ئه‌لعێراق :سه‌نته‌ری‌ میترۆ بۆ داكۆكیكردن له‌ رۆژنامه‌نووسان، داوای‌ له‌ رۆژنامه‌نووسانی‌ هه‌رێمی‌ كوردستان كرد رۆژی‌ پێنجشه‌ممه‌، له‌به‌رده‌م باره‌گای‌ مه‌كته‌بی‌ سیاسیی‌ یه‌كێتیی‌ نیشتیمانی‌ كوردستاندا گردبوونه‌وه‌یه‌ك سازبكه‌ن، وه‌ك ناڕه‌زاییه‌ك له‌به‌رامبه‌ر "پێشێلكارییه‌كان"ی‌ دژ به‌ رۆژنامه‌نووسان.

له‌مباره‌یه‌وه‌ ره‌حمان غه‌ریب رێكخه‌ری‌ سه‌نته‌ره‌كه‌ به‌ ئاژانسی‌(ئه‌سوات ئه‌لعێراق)ی‌ وت "داوا له‌ رۆژنامه‌نوسانی‌ هه‌رێمی‌ كوردستان ده‌كه‌ین گردبوونه‌وه‌یه‌ له‌به‌رده‌م مه‌كته‌بی‌ سیاسیی‌ یه‌كێتییدا سازبكه‌ن وه‌ك ناڕه‌زاییه‌ك له‌به‌رده‌م ئه‌و پیشێلكارییانه‌ی‌ دژ به‌ رۆژنامه‌نووسان ئه‌نجامده‌درێن، به‌تایبه‌تی‌ له‌ پارێزگای‌ سلێمانی‌".

روونیشیكرده‌وه‌ كه‌ گردبوونه‌وه‌كه‌ "یاداشتێكی‌ ناڕه‌زایی‌ ده‌ده‌نه‌ مه‌كته‌بی‌ سیاسیی‌ یه‌كێتیی‌‌و داوا له‌ ده‌سه‌ڵاتدارنیش ده‌كات به‌رپرسیارییه‌تی‌ پاراستنی‌ رۆژنامه‌نووسان له‌ئه‌ستۆبگرن‌و كه‌شی‌ گونجاو بۆ ئازادی‌ بیروڕا‌و گوزارشتكردن بڕ‌خسێنن".
س غ(خ/ع)- ج پ

ده‌یان كه‌س به‌بۆنه‌ی‌ ساڵێك تێپه‌ڕبوون به‌سه‌ر خۆپیشاندانه‌كانی‌ به‌غدا رژانه‌ سه‌ر شه‌قامه‌كان

jamal — Fri, 24 Feb 2012 04:26:00 GMT

به‌غدا/ئه‌سوات ئه‌لعێراق: ده‌یان كه‌س له‌ رۆشنبیرانی‌ شاری‌ به‌غدا، رۆژی‌ هه‌ینی‌، به‌بۆنه‌ی‌ تێپه‌ڕبوونی‌ ساڵێك به‌سه‌ر خۆپیشاندانه‌كانی‌ 25ی‌ شوباتی‌ ساڵی‌ رابردوو رژانه‌ سه‌ر شه‌قامه‌كان.

له‌مباره‌یه‌وه‌ په‌یامنێری‌ ئاژانسی‌(ئه‌سوات ئه‌لعێراق) له‌ شاری‌ به‌غدا وتی‌ "خۆپیشانده‌ران له‌ گۆڕه‌پانی‌ ته‌حریر(ناوه‌ڕاستی‌ به‌غدا) به‌چه‌ندین چاڵاكیی‌ رۆشنبیریی‌‌و هونه‌ریی‌ ناڕه‌زاییه‌تیی‌ خۆیان ده‌ربڕی‌، له‌رێگه‌ی‌ پێشكه‌شكردن‌و خوێندنه‌وه‌ی‌ قه‌سیده‌‌و لێدوان كه‌ گوزارشت بوون له‌و توڕه‌ییه‌ی‌ هاوڵاتیان به‌هۆی‌ بێكاریی‌‌و خراپی‌ خزمه‌تگوزارییه‌وه‌ به‌ده‌ستییه‌وه‌ ده‌ناڵێنن".

روونیشیكرده‌وه‌ كه‌ "هاوكات ده‌یان هاوڵاتیی‌ له‌ ده‌وری‌ ئه‌م گردبونه‌وه‌یه‌دا كۆببوونه‌وه‌".

وتیشی‌ "خۆپیشانده‌ران سه‌رله‌نوێ‌ داوای‌ چاكسازیی‌ سیاسیی‌‌و دژایه‌تیكردنی‌ گه‌نده‌ڵیی‌‌و ره‌خساندنی‌ هه‌لی‌ كار‌و باشكردنی‌ ته‌زووی‌ كاره‌با‌و ئازادكردنی‌ ده‌ستگیركراوه‌كانیان ده‌كرد".
ع ف(خ/ع)- ج پ

سه‌نته‌رێكی‌ یاسایی‌ بۆ داكۆكیكردن له‌ رۆژنامه‌نووسان له‌ به‌غدا كرایه‌وه‌

jamal — Sun, 04 Mar 2012 18:49:00 GMT

به‌غدا/ئه‌سوات ئه‌لعێراق:رێكخراوی‌ رۆژنامه‌گه‌ریی‌ جیهانیی‌ (IMS)، رۆژی‌ یه‌كشه‌ممه‌، به‌ ئاماده‌بوونی‌ چاڵاكوانان‌و یاساناسان‌و راگه‌یاندنكاران، سه‌نته‌رێكی‌ یاسایی‌ بۆ داكۆكیكردن له‌ رۆژنامه‌نوسانی‌ له‌ شاری‌ به‌غدا كرده‌وه‌.

له‌مباره‌یه‌وه‌ سه‌رۆكی‌ سه‌نته‌ره‌كه‌ حه‌سه‌ن شه‌عبان به‌ ئاژانسی‌(ئه‌سوات ئه‌لعێراق)ی‌ وت "سه‌نته‌ره‌كه‌ به‌ هاوكاری‌ ماددیی‌ رێكخراوی‌ رۆژنامه‌گه‌ریی‌ جیهانی‌ له‌ كۆبینهاگن (IMS)‌و له‌سه‌ر داوای‌ چاڵاكوانان‌و یاساناسان‌و راگه‌یاندنكارانی‌ عێراقی‌ دامه‌زراوه‌".

روونیشیكرده‌وه‌ كه‌ سه‌نته‌ره‌كه‌ "داكۆكیكار ده‌بێ‌ له‌ وشه‌ی‌ راست‌و شه‌ره‌فی‌ پیشه‌ی‌ راگه‌یاندن‌و رێگه‌ش به‌ سه‌ركوتكه‌رانی‌ ئازادی‌ نادات به‌ رێگه‌ی‌ یاسایی‌ دژایه‌تی‌ رۆژنامه‌نوسان بكه‌ن".

وتیشی‌ "سه‌نته‌ره‌كه‌مان له‌ژێر ناونیشانی‌ راگه‌یاندن‌و یاسا خولی‌ تایبه‌ت رێكده‌خات‌و له‌رێگه‌ی‌ هێڵی‌ ته‌له‌فۆنه‌وه‌ وه‌ڵامی‌ رۆژنامه‌نوسان ده‌داته‌وه‌ له‌باره‌ی‌ شاره‌زایی‌ پرسه‌ یاساییه‌كانه‌وه‌".
ا ی‌ ع(خ/ع)- ج پ

سه‌نته‌ری‌ به‌رگری‌ یاسایی‌ بۆ رۆژنامه‌نوسان له‌سلێمانی‌ كرایه‌وه‌

jamal — Tue, 06 Mar 2012 00:00:00 GMT

سلێمانی‌/ئه‌سوات ئه‌لعێراق: به‌ئاماده‌بوونی‌ ژماره‌یه‌كی‌ به‌رچاو له‌پارێزه‌ران‌و رۆژنامه‌نوسان، رۆژی‌ دووشه‌ممه‌، سه‌نته‌ری‌ به‌رگری‌ یاسایی‌ بۆ رۆژنامه‌نوسان‌و راگه‌یاندنكارانی‌ هه‌رێمی‌ كوردستان كرایه‌وه‌.

پێش نیوه‌رۆی‌ دووشه‌ممه‌، له‌كۆنگره‌یه‌كی‌ رۆژنامه‌وانیدا، سێ‌ رێكخراوی‌ یاسایی‌‌و رۆژنامه‌نوسی‌ كردنه‌وه‌ی‌ سه‌نته‌ری‌ به‌رگری‌ یاسایی‌ بۆ رۆژنامه‌نوسان‌و راگه‌یاندنكارانیان ڕاگه‌یاند.

ئاوات عه‌لی‌ ئه‌ندامی‌ بۆردی‌ سه‌نته‌ری‌ میترۆ بۆ به‌رگریكردن له‌رۆژنامه‌نوسان، له‌كۆنگره‌ رۆژنامه‌وانییه‌كه‌دا ڕایگه‌یاند "ئه‌م سه‌نته‌ره‌ له‌لایه‌ن سه‌نته‌ری‌ په‌ره‌پێدانی‌ دیموكراسی‌ DHRD و سه‌نته‌ری‌ میترۆ بۆ داكۆكی‌ له‌رۆژنامه‌نوسان‌و به‌هاوكاری‌ رێكخراوی‌ پاڵپشتی‌ میدیای‌ نێوده‌وڵه‌تی‌ IMS ده‌كرێته‌وه‌".

روونیشیكرده‌وه‌ كه‌ "ئه‌م هه‌وڵه‌ یه‌كێكه‌ له‌و هه‌وڵانه‌ی‌ كه‌ له‌پێناو داكۆكی‌ كردن له‌ئازادی‌ رۆژنامه‌گه‌ری‌‌و ئازادی‌ ڕاده‌ربڕین"ئه‌ویش به‌پێدانی‌ راوێژی‌ یاسایی‌‌و نوێنه‌رایه‌تی‌ كردنی‌ یاسایی‌ له‌بنكه‌كانی‌ پۆلیس‌و له‌به‌رده‌م دادگاكان‌و ئه‌مه‌ش له‌رێی‌ دابینكردنی‌ پارێزه‌ره‌وه‌ بۆ رۆژنامه‌نوسان".

دواتر سه‌رده‌شت عه‌بدولره‌حمان به‌رێوبه‌ری‌ سه‌نته‌ری‌ په‌ره‌پێدانی‌ دیموكراسی‌ DHRD ئامانجه‌كانی‌ پرۆژه‌كه‌ی‌ رونكرده‌وه‌و وتی‌"ئه‌م سه‌نته‌ره‌ له‌پێناو كه‌مكردنه‌وه‌ی‌ ئه‌و پێشێلكارییانه‌دا پێكهاتووه‌ كه‌ به‌رامبه‌ر رۆژنامه‌نوسان ده‌كرێت، هه‌روه‌ها بۆ هۆشیاركردنه‌وه‌ی‌ رۆژنامه‌نوسانه‌ به‌یاسای رۆژنامه‌نوسی‌‌و چۆنێتی‌ ئیجرائاته‌كانی‌ لێكۆڵینه‌وه‌و دادگاییكردن".

ناوبراو تیشكی‌ خسته‌ سه‌ر ئه‌وه‌ی‌ كه‌"ئه‌و سه‌نته‌ره‌ پردێكی‌ دیالۆگیش دروستده‌كات له‌نێوان راگه‌یاندن‌و دادگاكاندا به‌مه‌به‌ستی‌ پاڵپشتیكردنی‌ ئازادی‌ ڕاده‌ربڕین".

وتیشی‌ "هێڵێكی‌ ته‌له‌فونی‌ گه‌رم به‌ژماره‌ی‌ 3344 له‌لایه‌ن ئاسیا سێڵه‌وه‌ دابینكراوه‌و رۆژنامه‌نوسان ده‌توانن 24 كاتژمێر به‌به‌رده‌وامی‌ په‌یوه‌ندی‌ بكه‌ن به‌سه‌نته‌ره‌كه‌وه‌".
س غ(خ)- ج پ

زۆرینه‌ی‌ خوێنه‌رانی‌ (ئه‌سوات ئه‌لعێراق) پێیانوایه‌ كوتله‌ سیاسییه‌كان جیددی‌ نین له‌ته‌نازولكردن بۆ یه‌كتری‌

jamal — Sat, 10 Mar 2012 13:07:00 GMT

به‌غدا/ئه‌سوات ئه‌لعێراق: به‌پێی‌ راپرسییه‌كی‌ ئاژانسی‌ (ئه‌سوات ئه‌لعێراق) زۆرینه‌ی‌ به‌شداربووان پێیانوایه‌ كوتله‌ سیاسییه‌كانی‌ عێراق جیددی‌ نین له‌ته‌نازولكردن بۆ یه‌كتری‌، كه‌ گه‌ره‌نتییه‌ بۆ سه‌ركه‌وتنی‌ كۆنگره‌ی‌ نیشتیمانی‌ چاوه‌ڕوانكراو.

راپرسییه‌كه‌ به‌هه‌ر سێ‌ زمانی‌ عه‌ره‌بی‌‌و كوردی‌‌و ئینگلیزی له‌سه‌ر رووی‌ ماڵپه‌ڕی‌ ئاژانسی‌(ئه‌سوات ئه‌لعێراق)دا له‌ماوه‌ی‌ نێوان 6/2/2012 تا 10/3/2012 بڵاوكرابووه‌وه‌‌و تێیدا 389 كه‌س له‌ به‌شی‌ عه‌ره‌بیدا به‌شدارییان كردبوو، له‌م ژماره‌یه‌دا 339یان واته‌ (%87.17)یان پێیانوایه‌ كوتله‌ سیاسییه‌كانی‌ عێراق جیددی‌ نین له‌ته‌نازولكردن بۆ یه‌كتری‌، كه‌ گه‌ره‌نتییه‌ بۆ سه‌ركه‌وتنی‌ ئه‌و كۆنگره‌ نیشتیمانییه‌ی‌ بڕیاروایه‌ به‌مزوانه‌ ببه‌سترێت، هاوكات له‌كۆی‌ ئه‌م 389 به‌شداربووه‌دا 34یان واته‌ (%8.71) به‌پێچه‌وانه‌ی‌ ئه‌م بۆچونه‌ ده‌نگیانداوه‌، هه‌روه‌ها 16یان واته‌ رێژه‌ی‌ (%4.1)ی به‌شداربووان به‌ نازانم وه‌ڵامیان داوه‌ته‌وه‌.

هه‌ر له‌سه‌ر ئه‌م راپرسییه‌دا 144 كه‌س له‌ خوێنه‌رانی‌ به‌شی‌ كوردی‌ به‌شدارییان كردووه‌‌و تێیدا 122یان واته‌ رێژه‌ی‌ (%84.82)یان پێیانوایه‌ كوتله‌ سیاسییه‌كانی‌ عێراق جیددی‌ نین له‌ته‌نازولكردن بۆ یه‌كتری‌، هه‌روه‌ها 11 یان واته‌ (%7.58)یان، له‌گه‌ڵ ئه‌وه‌دان كوتله‌ سیاسییه‌كان جیددین له‌ ته‌نازولكردن بۆ یه‌كتری‌، له‌هه‌مانكاتدا 16 به‌شداربوو وات رێژه‌ی‌ (%7.58)یان به‌ نازانم وه‌ڵامیان داوه‌ته‌وه‌.

به‌ڵام له‌ به‌شی‌ ئینگلیزیدا بۆچونی‌ زۆرینه‌ی‌ به‌شداربووان ته‌واو پێچه‌وانه‌ی‌ بۆچونی‌ خوێنه‌رانی‌ هه‌ردوو به‌شی‌ عه‌ره‌بی‌‌و كوردییه‌‌و به‌شێوه‌یه‌ك كه‌ له‌ كۆی‌ 175 به‌شداربوودا 89یان واته‌ رێژه‌ی‌ (%50.56)یان پێیانوایه‌ كوتله‌ سیاسییه‌كان جیددین له‌ ته‌نازولكردن بۆ یه‌كتریدا له‌پێناو سه‌رخستنی‌ كۆنگره‌ی‌ نیشتیمانیدا، هاوكات 63یان واته‌ رێژه‌ی‌(%36.36) پێیانوایه‌ كوتله‌ سیاسییه‌كان له‌سه‌ر ئه‌م بابه‌ته‌دا جیددی‌ نین، 23شیان واته‌ رێژه‌ی‌ (%13.06) به‌ نازانم وه‌ڵامیان داوه‌ته‌وه‌.
م هـ ا(خ/ع)- ج پ

كورده‌كانی‌ سوریا له‌ هه‌ولێر داوا له‌ نه‌ته‌وه‌ یه‌كگرتووه‌كان ده‌كه‌ن پاڵپشتی‌ له‌ شۆڕشی‌ سوریا بكات

jamal — Mon, 12 Mar 2012 17:25:00 GMT

هه‌ولێر/ئه‌سوات ئه‌لعێراق: سه‌دان كه‌س له‌ كوردانی‌ سوریا، رۆژی‌ دووشه‌ممه‌، له‌به‌رده‌م باره‌گای‌ نه‌ته‌وه‌ یه‌كگرتووه‌كان له‌ شاری‌ هه‌ولێر خۆپیشاندانێكیان رێكخست‌و داوایان له‌و رێكخراوه‌ كرد پشتگیریی‌ له‌ شۆڕشی‌ سوریا بكات.

خۆپیشانده‌ران ئاڵای‌ شۆڕشی‌ سوریا‌و ئاڵای‌ كوردستان‌و چه‌ندین دروشمییان به‌رزكردبووه‌وه‌ كه‌ تێیاندا داواكرابوو(دانبنرێت به‌ ئه‌نجومه‌نی‌ نیشتیمانی‌ كوردی‌ سوریا)، هه‌وره‌ها هاتبوو (داوا له‌ كۆمه‌ڵگای‌ نێوده‌وڵه‌تی‌ ده‌كه‌ین به‌په‌له‌ هه‌وڵبدات خه‌ڵكی‌ مه‌ده‌نی‌ سوریا بپارێزێت".

له‌باره‌ی‌ ئه‌م خۆپیشاندانه‌وه‌ به‌هجه‌ت به‌شیر له‌ ئه‌نجومه‌نی‌ نیشتیمانی‌ كوردی‌ سورییه‌وه‌ به‌ ئاژانسی‌(ئه‌سوات ئه‌لعێراق)ی‌ وت "دوای‌ چه‌ند رۆژێكی‌ تر شۆڕشه‌كه‌ پێده‌نێته‌ نێو ساڵی‌ دووه‌مییه‌وه‌، سوپا‌و ئه‌منی‌ سوریاش به‌دڕندانه‌ترین شێوه‌ به‌به‌رچاوی‌ جسهانه‌وه‌ به‌بێ‌ سنوور تاوان به‌رامبه‌ر به‌ گه‌له‌كه‌مان ئه‌نجامده‌ده‌ن".

ئاماژه‌شیدا به‌وه‌ی‌ كه‌ له‌م خۆپیشاندانه‌دا "یاداشتێك درا به‌ نه‌ته‌وه‌ یه‌كگرتوه‌كان‌و تێیدا هاتبوو "ته‌واوی‌ ئه‌و كاره‌ نامرۆڤانه‌‌و دڕندانه‌یه‌ی‌ كوشتن‌و گرتن بوه‌ستێنرێت، سوپا‌و سه‌رباز له‌ناو شاره‌كاندا بڕۆنه‌ ده‌ره‌وه‌".
ك ن م(خ/ع)- ج پ

له‌ خۆپیشاندانێكدا خه‌ڵكی‌ فه‌لوجه‌ دژی‌ دڕاندنی‌ قورئان داوای‌ داخستنی‌ بالیۆزخانه‌ی‌ ئێران ده‌كه‌ن

jamal — Tue, 13 Mar 2012 11:39:00 GMT

ئه‌نباڕ/ئه‌سوات ئه‌لعێراق: سه‌دان كه‌س له‌ دانیشتوانی‌ قه‌زای‌ فه‌لوجه‌ی‌ سه‌ر به‌ پارێزگای‌ ئه‌نباڕ، رۆژی‌ سێشه‌ممه‌، له‌میانی‌ خۆپیشاندانێكدا داوایانكرد باڵیۆزخانه‌ی‌ ئێران له‌ به‌غدا دابخرێت‌و له‌رووی‌ سیاسی‌‌و ئابورییه‌وه‌ بایكۆتی‌ ئێران بكرێت، به‌هۆی‌ دڕاندنی‌ قورئان‌و پێچانه‌وه‌ی‌ له‌ میوه‌جاته‌كاندا.

له‌مباره‌یه‌وه‌ شێخ حه‌مید محه‌مه‌دی‌ یه‌كێك له‌ رێكخه‌رانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "سه‌رجه‌م ناوچه‌كانی‌ سه‌ر به‌ فه‌لوجه‌ پێكهاته‌كانی‌ له‌م خۆپیشاندانه‌دا به‌شدارن‌و تێیدا داوا له‌ حكومه‌تی‌ عێراقی‌ ده‌كه‌ن به‌په‌له‌ باڵیۆزخانه‌ی‌ ئێران له‌ به‌غدا دابخرێت‌و له‌رووی‌ سیاسی‌‌و ئابورییه‌وه‌ بایكۆتی‌ ئێران بكرێت".

وتیشی‌ "خه‌ڵكی‌ فه‌لوجه‌ چاوه‌ڕوانی‌ جێبه‌جێكردنی‌ داواكارییه‌كانیان ده‌كه‌ن، ئه‌گه‌ر نا له‌چه‌ند رۆژی‌ داهاتوودا مانگرتنی‌ گه‌وره‌ رێكده‌خه‌ن".

هێماشی‌ بۆ ئه‌وه‌كرد كه‌ هاوكات "داوا له‌ نوێنه‌رانی‌ پارێزگای‌ ئه‌نباڕ كراوه‌ له‌ په‌ڕله‌مانی‌ عێراق داوای‌ یاسایی‌ دژ به‌ ئێران تۆماربكه‌ن به‌هۆی‌ دڕاندنی‌ كتێبی‌ خوا".

جێی‌ ئاماژه‌یه‌ ئه‌نجومه‌نی‌ زانایانی‌ فه‌لوجه‌ پێشتر فتوایه‌كی‌ ده‌ركرد تایبه‌ت به‌ حه‌رامكردنی‌ كه‌لوپه‌لی‌ ئێرانی‌‌و رێگرتن له‌ كڕین‌و فرۆشتنیدا به‌هۆی‌ ئه‌وه‌ی‌ له‌نێو میوه‌ی‌ هاوه‌رده‌كراوی‌ ئێرانییدا بینراوه‌ به‌ لاپه‌ڕه‌كانی‌ قورئان پێچراونه‌ته‌وه‌.
ع د(خ/ع)- ج پ

وه‌زاره‌تی‌ ده‌ره‌وه‌ی‌ ئیتاڵیا ته‌ئكید ده‌كاته‌ سه‌ر پاڵپشتيكردنی‌ كاری‌ مه‌ده‌نی‌ له‌ عێراق‌و هه‌رێمی‌ كوردستاندا

jamal — Sun, 18 Mar 2012 15:30:00 GMT

هه‌ولێر/ئه‌سوات ئه‌لعێراق: وه‌زاره‌تی‌ ده‌ره‌وه‌ی‌ ئیتاڵیا، رۆژی‌ یه‌كشه‌ممه‌،له‌دیدارێكدا له‌گه‌ڵ نوێنه‌رانی‌ رێكخراوه‌كانی‌ كۆمه‌ڵگای‌ مه‌ده‌نی‌ عێراق، ته‌ئكیدیكرده‌ سه‌ر پاڵپشتیكردنی‌ كاری‌ مه‌ده‌نی‌ له‌ عێراق و هه‌رێمی‌ كوردستاندا.

له‌مباره‌یه‌وه‌ شاندێكی‌ رێكخراوه‌كانی‌ كۆمه‌ڵگای‌ مه‌ده‌نیی‌ هه‌رێمی‌ كوردستانی‌ عێراق كه‌ له‌ئێستادا به‌سه‌ردانێك له‌ ئیتاڵیان چاویكه‌وت به‌ ئه‌رنیستۆ ماسیمینۆ بیلێلی‌ی‌ رێكخه‌ری‌ كاروباری‌ عێراق له‌ وه‌زاره‌تی‌ ده‌ره‌وه‌ی‌ ئیتاڵیا‌و جیۆڤانی‌ لویجی‌ گراندی‌ راوێژكار له‌ وه‌زاره‌ته‌كه‌.

له‌ كۆبونه‌وه‌یه‌كدا بڕیاردرا لیژنه‌ی‌ هاوبه‌ش پێكبهێنرێن بۆ زیاتركردنی‌ هه‌ماهه‌نگی‌ نێوان رێكخراوه‌كانی‌ كۆمه‌ڵگای‌ مه‌ده‌نی‌ عێراق‌و هه‌رێمی‌ كوردستان له‌گه‌ڵ وه‌زاره‌تی‌ ده‌ره‌وه‌ی‌ ئیتاڵیادا، بۆ ئه‌وه‌ی‌ له‌ ئاینده‌دا پڕۆژه‌یان هه‌بێت تایبه‌ت به‌ كاری‌ مه‌ده‌نی‌ له‌ ته‌واوی‌ عێراقدا، هه‌وره‌ها بۆ پته‌وتركردنی‌ په‌یوه‌ندییه‌ دوو قۆڵییه‌كان.

شانده‌كه‌ی‌ هه‌رێمی‌ كوردستان پێكهاتبوو له‌ عیسمه‌ت یونس سه‌رۆكی‌ شاند‌و ئیبراهیم ئیسماعیل له‌ رێكخراوی‌ مه‌سه‌له‌‌و شاد محه‌مه‌د له‌ رێكخراوی‌ تواناسازی‌ لاوانی‌ هه‌رێمی‌ كوردستان‌و دلێر ئیبراهیم به‌ڕێوبه‌ری‌ راگه‌یاندن له‌ ئه‌نجومه‌نی‌ رێكخراوه‌ ناحكومییه‌كانی‌ كوردستانی‌ عێراق(IKNN)‌و محه‌مه‌د موشیر نوێنه‌ری‌ وه‌زاره‌تی‌ رۆشنبیری‌‌و لاوانی‌ هه‌رێمی‌ كوردستان.
ح ج م(خ/ع)- ج پ

زۆربه‌ی‌ خوێنه‌رانی‌ ئه‌سوات ئه‌لعێراق پێیانوایه‌ لوتكه‌ی‌ عه‌ره‌بی‌ كاریگه‌ریی‌ نابێت به‌سه‌ر ئاشته‌وایی‌ نیشتیمانیدا

jamal — Sun, 01 Apr 2012 12:36:00 GMT

به‌غدا/ئه‌سوات ئه‌لعێراق: به‌پێی‌ راپرسییه‌كی‌ ئاژانسی‌ (ئه‌سوات ئه‌لعێراق) زۆرینه‌ی‌ به‌شداربووان پێیانوایه‌ لوتكه‌ی‌ عه‌ره‌بی‌ كاریگه‌ریی‌ نابێت به‌سه‌ر ئاشته‌وایی‌ نیشتیمانی نێوان لایه‌نه‌ سیاسییه‌كانی‌ عێراقدا.

راپرسییه‌كه‌ به‌هه‌ر سێ‌ زمانی‌ عه‌ره‌بی‌‌و كوردی‌‌و ئینگلیزی له‌سه‌ر رووی‌ ماڵپه‌ڕی‌ ئاژانسی‌(ئه‌سوات ئه‌لعێراق)دا له‌ماوه‌ی‌ نێوان 10/3/2012 تا 31/3/2012 بڵاوكرابووه‌وه‌‌و تێیدا ئه‌م پرسیاری‌ ئــایــا لوتكه‌ی‌ عه‌ره‌بی‌ چ كاریگه‌رییه‌كی‌ ده‌بێت به‌سه‌ر بارودۆخی‌ ناوخۆی‌ عێراقدا؟ ئاراسته‌ی‌ خوێنه‌ران كرابوو، كه‌ 226 ده‌نگده‌ر له‌ كۆی‌ 289دا له‌ به‌شی‌ عه‌ره‌بی‌ واته‌ (%75.83) پێیانوایه‌ لوتكه‌ی‌ عه‌ره‌بی‌ كاریگه‌ری‌ دانانێته‌ سه‌ر بارودۆخی‌ ناوخۆی‌ عێراق به‌تایبه‌ت ئه‌م قه‌یرانه‌ی‌ كه‌ ئێستا هاتۆته‌ ئاراوه‌، به‌ڵام 35 ده‌نگده‌ریان كه‌ ده‌كاته‌ رێژه‌ی‌ (%11.74) پێیانوایه‌ لوتكه‌كه‌ رێگر ده‌بێت له‌به‌رده‌م هاتنه‌كایه‌ی‌ ئاسته‌واییدا، هاوكات 37یان واته‌ رێژه‌ی‌ (%12.41) له‌گه‌ڵ ئه‌وه‌دان لوتكه‌كه‌ ده‌بێته‌ هۆی‌ هاتنه‌ كایه‌ی‌ ئاسته‌وایی‌ نیشتیمانی‌ له‌ وڵاتدا.

هه‌ر له‌سه‌ر ئه‌م راپرسییه‌دا 85 كه‌س له‌ خوێنه‌رانی‌ به‌شی‌ كوردی‌ به‌شدارییان كردووه‌‌و تێیدا 66یان واته‌ رێژه‌ی‌ (%77.9) بڕوایان وایه‌ كۆبونه‌وه‌ی‌ لوتكه‌ی‌ عه‌ره‌بی‌ كه‌ چه‌ند رۆژێك له‌مه‌وبه‌ر له‌ به‌غدا به‌ڕێوه‌چوو هیچ كاریگه‌ری‌ نابێت به‌سه‌ر بارودۆخی‌ ناوخۆی‌ وڵاتدا، هاوكات 11 ده‌نگده‌ریان واته‌ رێژه‌ی‌ (%12.79) له‌و باوه‌ڕدان كه‌ لوتكه‌كه‌ ده‌بێته‌ به‌ربه‌ست له‌به‌رده‌م ئاشته‌واییدا، له‌ هه‌مانكاتدا 8 ده‌نگده‌ریان واته‌ رێژه‌ی‌ (%9.3) پێیانوایه‌ لوتكه‌كه‌ ده‌بێته‌ هۆی‌ هاتنه‌ كایه‌ی‌ ئاشته‌وایی‌ له‌ عێراقدا.

به‌ڵام له‌ به‌شی‌ ئینگلیزیدا بۆچونی‌ زۆرینه‌ی‌ به‌شداربووان ته‌واو پێچه‌وانه‌ی‌ بۆچونی‌ خوێنه‌رانی‌ هه‌ردوو به‌شی‌ عه‌ره‌بی‌‌و كوردییه‌‌و به‌شێوه‌یه‌ك كه‌ له‌ كۆی‌ 140 به‌شداربوودا 82یان واته‌ رێژه‌ی‌ (%58.57)یان پێیانوایه‌ لوتكه‌كه‌ كاریگه‌ریی‌ ده‌بێت به‌سه‌ر هاتنه‌كایه‌ی‌ ئاشته‌وایی‌ نیشتیمانیدا، ته‌نها 3 ده‌نگده‌ریان كه‌ ده‌كاته‌ رێژه‌ی‌ (%2.14) به‌پێچه‌وانه‌ی‌ ئه‌م بۆچونه‌ به‌شدارییان كردووه‌، له‌هه‌مانكاتدا 55 به‌شداربوو واته‌ ریّژه‌ی‌ (%39.28)پێیانوایه‌ لوتكه‌كه‌ هیچ كاریگه‌ری‌ نابێت به‌سه‌ر ئاشته‌وایی‌ نیشتیمانیدا.
م هـ ا(خ/ع)- ج پ

كه‌سێكی‌ دانیشتووی‌ سنووری‌ پارێزگای‌ سه‌ڵاحه‌دین له‌رۆژێكدا دوو ژنی‌ هێنا

jamal — Sat, 21 Apr 2012 13:28:00 GMT

به‌غدا/ئه‌سوات ئه‌لعێراق: له‌حاڵه‌تێكی‌ ده‌گمه‌ندا كه‌سێكی‌ عێراقی‌ دانیشتووی‌ سنوری‌ پارێزگای‌ سه‌لاحه‌دین،رۆژی‌ پێنجشه‌ممه‌ی‌ رابردوو له‌ ئاهه‌نگێكدا دوو ژنی‌ به‌یه‌كه‌وه‌ هێنا.

له‌مباره‌یه‌وه‌ یه‌كێك له‌ خزمه‌كانی‌ زاوا كه‌ نه‌یویست ناوی‌ بڵاوبكرێته‌وه‌ به‌ ئاژانسی‌(ئه‌سوات ئه‌لعێراق)ی‌ وت "ره‌حمان نایف عیفان كه‌ دانیشتوی‌ گوندی‌ له‌قله‌قه‌ له‌ ناحیه‌ی‌ عه‌له‌می‌ سه‌ر به‌ قه‌زای‌ تكریت له‌ پاريزگای‌ سه‌ڵاحه‌دین، له‌رۆژێكدا‌و له‌ ته‌نها ئاهه‌نگێكدا دوو ژنی‌ به‌یه‌كه‌وه‌ گواسته‌وه‌".

روونیشیكرده‌وه‌ كه‌ "كه‌سوكاری‌ هه‌ردوو كچه‌كه‌ به‌یه‌كه‌وه‌ له‌ ئاهه‌نگه‌كه‌دا ئاماده‌بوون".

هێماشی‌ بۆ ئه‌وه‌ كرد كه‌ "هه‌ر دوو كچه‌كه‌ ئامۆزای‌ زاوان، زاواش لای‌ خۆیه‌وه‌ سوور بوو له‌سه‌ر ئه‌وه‌ی‌ كه‌ له‌ رۆژێكدا‌و له‌یه‌ك ئاهه‌نگدا به‌یه‌كه‌وه‌ هه‌ردووكیان بگوازێته‌وه‌".
ع ف(خ/ع)- ج پ

مافی‌ مرۆڤی‌ عێراق به‌مزووانه‌ 9 گۆڕی‌ به‌كۆمه‌ڵ له‌ 5 پارێزگای‌ عێراقدا هه‌ڵده‌داته‌وه‌

jamal — Mon, 30 Apr 2012 14:25:00 GMT

به‌غدا/ئه‌سوات ئه‌لعێراق: وه‌زاره‌تی‌ مافی‌ مرۆڤی‌ عێراق، رۆژی‌ دووشه‌ممه‌، رایگه‌یاند كه‌ له‌ماوه‌ی‌ چه‌ند هه‌فته‌یه‌كی‌ داهاتوودا نزیكه‌ی‌ نۆ گۆڕی‌ به‌ كۆمه‌ڵ له‌ پێنج پارێزگای‌ عێراقدا هه‌ڵده‌درێنه‌وه‌.

له‌مباره‌یه‌وه‌ زیا كه‌ریمی‌ به‌ڕێوبه‌ری‌ به‌شی‌ گۆڕه‌ به‌ كۆمه‌ڵه‌كان له‌ وه‌زاره‌تی‌ ناوبراودا له‌لێدوانێكیدا كه‌ له‌ كه‌ناڵی‌ نیمچه‌ فه‌رمی‌ عێراقیه‌دا بڵاوكرایه‌وه‌، رایگه‌یاندووه‌ كه‌ "گۆڕه‌ به‌كۆمه‌ڵه‌كان له‌ پارێزگاكانی‌ ئه‌نباڕ‌و دیاله‌‌و به‌سره‌و واسیت‌و میسان هه‌ڵده‌درێنه‌وه‌، یه‌كه‌مینیشیان له‌ماوه‌ی‌ مانگی‌ رابردوودا له‌ ناوچه‌ی‌ حه‌مرین هه‌ڵدرایه‌وه‌‌و تێیدا 158 روفاتی‌ كورد ده‌رهێنران".

وتیشی‌ "تیمێكی‌ به‌شه‌كه‌مان هه‌فته‌ی‌ رابردوو بۆ ئه‌م مه‌به‌سته‌ سه‌ردانی‌ پارێزگای‌ به‌سره‌ی‌ كرد، له‌ شوێنێكدا كه‌ ته‌رخانكراوه‌ بۆ پڕۆژه‌ی‌ شاری‌ وه‌رزشی‌و ده‌یه‌وێت لێكۆڵینه‌وه‌ بكات له‌سه‌ر هه‌بوونی‌ گۆڕی‌ به‌ كۆمه‌ڵ له‌م شوێنه‌دا".

روونیشیكردۆته‌وه‌ كه‌ "میلاكاتی‌ ئه‌ندازیاری‌‌و ته‌كنیكی‌ پڕۆژه‌كه‌ نوسینگه‌ی‌ وه‌زاره‌تیان له‌ شاری‌ به‌سره‌ ئاگادار كردۆته‌وه‌ به‌وه‌ی‌ كه‌ گۆڕی‌ به‌ كۆمه‌ڵی‌ قوربانیانی‌ راپه‌ڕینه‌كه‌ی‌ شه‌عبانییه‌ی‌ تێدا دۆزراوه‌ته‌وه‌، له‌مباره‌یه‌شه‌وه‌ لێكۆڵینه‌وه‌ ئه‌نجامده‌درێت".
م ی‌ ر(ب/ع)- ج پ

رێكخراوێك :له‌ماوه‌ی‌ ساڵێكدا 272 پێشێلكاریی‌ له‌ عێراقدا دژ به‌ رۆژنامه‌وانان ئه‌نجامدراون

jamal — Wed, 02 May 2012 14:10:00 GMT

به‌غدا/ئه‌سوات ئه‌لعێراق: روانگه‌ی‌ ئازادییه‌ رۆژنامه‌وانییه‌كان،رۆژی‌ چوارشه‌ممه‌، رایگه‌یاند كه‌ له‌ ماوه‌ی‌ ساڵێكدا له‌ 3/5/2011 تا 3/5/2012 له‌سه‌رتاسه‌ری‌ عێراقدا 272 پێشێلكاریی‌ دژ به‌ رۆژنامه‌وانان ئه‌نجامدراون، له‌نێویاندا سێ‌ حاڵه‌تی‌ كوشتنی‌ رۆژنامه‌نووسان تۆماركراون.

روانگه‌ی‌ ناوبراو له‌ راپۆرتێكیدا كه‌ وێنه‌یه‌كی‌ ده‌ست ئاژانسی‌(ئه‌سوات ئه‌لعێراق)كه‌وتووه‌، رایگه‌یاندووه‌ كه‌ "تێكڕاكانی‌ توندوتیژیی‌‌و به‌ندو كۆسپ خستنه‌به‌رده‌م میدیاكار‌و رۆژنامه‌نووسان له‌ عێراقدا به‌رزبوونه‌وه‌یه‌كی‌ به‌رچاویان به‌خۆوه‌بینیوه‌".

روونیشیكردۆته‌وه‌ كه‌ "له‌ماوه‌ی‌ نێوان 3ی‌ ئایاری‌ 2011 تا 3ی‌ ئایاری‌ 2012 له‌سه‌رتاسه‌ری‌ عێراقدا 272 پیشیلكاریی‌ تۆماركراون، له‌وانه‌ سیانیان حاڵه‌تی‌ كوشتن بووه‌، كه‌ یه‌كێكیان به‌ پلانێكی‌ داڕێژراوی‌ مه‌حكه‌م بوو ئه‌ویش كوشتنی‌ راگه‌یاندنكار‌و بێژه‌ری‌‌و هونه‌رمه‌ندێكی‌ ناسراو‌و چاڵاكوانی‌ ناڕه‌زاییه‌ میلییه‌كان بوو".

هێماشی‌ بۆ ئه‌وه‌ كردووه‌ كه‌ "31 حاڵه‌تی‌ لێدان له‌ رۆژنامه‌نووس‌و وێنه‌گره‌ مه‌یدانییه‌كان تۆماركراون، به‌ده‌ستی‌ هێزه‌ سه‌ربازیی‌‌و ئه‌منییه‌كانه‌وه‌ كه‌ هه‌ندێك جار به‌ جلی‌ مه‌ده‌نییه‌وه‌ ئه‌م كاره‌ ئه‌نجامدراوه‌".

به‌پێی‌ راپۆرته‌كه‌ "65 حاڵه‌تی‌ گرتن‌و ده‌ستبه‌سه‌ركردنی‌ رۆژنامه‌نوس‌و میدیاكاران تۆماركراون، له‌هه‌مانكاتدا حاڵه‌تی‌ رێگریكردن له‌ وێنه‌گرتن‌و روماڵكردنی‌ رووداوه‌كانیش تۆماركراون به‌رێژه‌یه‌ك كه‌ له‌م ساڵه‌دا گه‌یشتۆته‌ 84 حاڵه‌ت، هه‌روه‌ها 43 حاڵه‌تی‌ رێگرتن له‌ جوڵه‌ی‌ رۆژنامه‌نوسان تۆماركراون، 12 حاڵه‌تی‌ شكاندن‌و ده‌ستگرتن به‌سه‌ر كه‌لوپه‌لی‌ رۆژنامه‌نوسانیش تۆماركراون".

راپۆرته‌كه‌ تیشكیشی‌ خستۆته‌ سه‌ر "هێرشكردنه‌ سه‌ر دوو ده‌زگای‌ ئیعلامی‌‌و داخستنی‌ ئیستگه‌یه‌كی‌ رادیۆی‌ ناوخۆیی‌ له‌ دیوانیه‌ تۆماركراون، هه‌روه‌ها 7 حاڵه‌تی‌ دیكه‌ی‌ رزگاربوونی‌ رۆژنامه‌نووسان له‌ده‌ست هێرشه‌ چه‌كدارییه‌كان‌و 3 حاڵه‌تی‌ برینداربوون تۆماركراون".
م هـ ا(ب/ع)- ج پ

داوا ده‌كرێت ‌لیژنه‌یه‌كی‌ لێكۆڵینه‌وه‌ی‌ نێوده‌وڵه‌تی‌ پێكبهێنرێت بۆ دۆسییه‌ی‌ كوژرانی‌ سه‌رده‌شت عوسمان

jamal — Sat, 05 May 2012 09:09:00 GMT

هه‌ولێر/ئه‌سوات ئه‌لعێراق: بنه‌ماڵه‌ی‌ رۆژنامه‌نوس سه‌رده‌شت عوسمان كه‌ ساڵی‌ رابردوو رفێنراو دواتر كوژرا، داوای‌ پێكهێنانی‌ لیژنه‌یه‌كی‌ نێوده‌وڵه‌تی‌ ده‌كه‌ن له‌باره‌ی‌ دۆسییه‌ی‌ كوژرانی‌ ناوبراوه‌وه‌.

له‌مباره‌یه‌وه‌ سه‌ركه‌وت عوسمان برای‌ سه‌رده‌شت عوسمان له‌سه‌ر گۆڕی‌ سه‌رده‌شت له‌ شاری‌ هه‌ولێر به‌بۆنه‌ی‌ ساڵڕۆژی‌ كوژرانی‌ سه‌رده‌شته‌وه‌‌و به‌ ئاماده‌بوونی‌ ژماره‌یه‌ك رۆژنامه‌نوس‌و رۆشنبیران‌و په‌ڕله‌مانتاران‌و رێكخراوه‌كانتی‌ كۆمه‌ڵی‌ مه‌ده‌نی‌، وتی‌ "ئێمه‌ متمانه‌مان به‌ده‌ره‌نجامه‌كانی‌ لێكۆڵینه‌وه‌كانتی‌ لایه‌نه‌ ئه‌منییه‌كانی‌ هه‌رێمی‌ كوردستان نییه‌ له‌باره‌ی‌ كوژرانی‌ براكه‌مانه‌وه‌، بۆیه‌ داوا ده‌كه‌ین لیژنه‌یه‌كی‌ لێكۆڵینه‌وه‌ی‌ نێوده‌وڵه‌تی‌ پێكبهێنرێت تاكو بگه‌ینه‌ راستیی‌ هۆكاری‌ كوژرانییه‌وه‌".

لای‌ خۆشییه‌وه‌ عه‌دنان عوسمان ئه‌ندامی‌ فراكسیۆنی‌ گۆڕان له‌ په‌ڕله‌مانی‌ كوردستان، له‌ مه‌راسیمه‌كه‌دا وتی‌ "په‌ڕله‌مانی‌ كوردستان له‌ باره‌ی‌ كوژرانی‌ سه‌رده‌شته‌وه‌ وه‌ك پێویست به‌و ئه‌ركه‌ی‌ هه‌ڵنه‌ستاوه‌".

ناوبراو پێشیوابوو "كوژرانی‌ سه‌رده‌شت په‌یامێك بوو بۆ ده‌نگه‌ ئازاد‌و سه‌ربه‌خۆكان".

جێی‌ ئاماژه‌یه‌ سه‌رده‌شت عوسمان كه‌ رۆژنامه‌نوس‌و خوێندكاری‌ دوا قۆناغی‌ به‌شی‌ ئینگلیزی‌ كۆلیژی‌ ئه‌ده‌بیانی‌ زانكۆی‌ سه‌ڵاحه‌دین بوو، ساڵی‌ رابردوو له‌م كاته‌دا له‌به‌رده‌م كۆلیژه‌كه‌ی‌ رفێنراو دوای‌ دوو رۆژ له‌ رفاندنیشی‌ ته‌رمه‌كه‌ی‌ له‌ شاری‌ موسڵ دۆرزایه‌وه‌، له‌دوای‌ كوشتنه‌كه‌یشی‌ وه‌زاره‌تی‌ ناوخۆی‌ هه‌رێمی‌ كوردستان رایگه‌یاند كه‌ "گروپی‌ ئه‌نسارولئیسلام كوشتیوویه‌تی‌ پاش ئه‌وه‌ی‌ به‌ڵێنی‌ پێاندابوو كاریان بۆ بكات‌و دواتر په‌شیمان بۆته‌وه‌". له‌دوای‌ ئه‌م راگه‌یه‌نراوه‌شدا خۆپیشاندانی‌ جه‌ماوه‌ری‌ له‌ شاره‌كانی‌ هه‌رێمی‌ كوردستاندا ده‌سیپێكرد.
ق م(خ/ع)- ج پ

خۆپیشاندانێكی‌ گه‌وره‌ له‌ شاری‌ هه‌ولێر دژی‌ "سوكایه‌تیكردن به‌ خوا‌و پێغه‌مبه‌ر"به‌ڕێوه‌چوو

jamal — Tue, 08 May 2012 13:00:00 GMT

هه‌ولێر/ئه‌سوات ئه‌لعێراق: خۆپیشاندانێكی‌ ناڕه‌زایی‌ گه‌وره‌، رۆژی‌ سێشه‌ممه‌، له‌ شاری‌ هه‌ولێر دژی‌ بڵاوكردنه‌وه‌ی‌ بابه‌تێك له‌ رۆژنامه‌ی‌ چرپه‌ به‌ڕێوه‌چوو، كه‌ تێیدا نووسه‌ره‌كه‌ی‌ تۆمه‌تباركراوه‌ به‌ سوكایه‌تیكردن به‌ خواو پێغه‌مبه‌ر.

له‌مباره‌یه‌وه‌ یه‌كێك له‌ به‌شداربووانی‌ خۆپیشاندانه‌كه‌ به‌ ئاژانسی‌(ئه‌سوات ئه‌لعێراق)ی‌ وت "ئێمه‌ بڵاوكردنه‌وه‌ی‌ سوكایه‌تیكردن به‌ خواو پێغه‌مبه‌ر له‌ رۆژنامه‌ی‌ كوردی‌ ره‌تده‌كه‌ینه‌وه‌".

وتیشی‌ "پێویسته‌ ئه‌و كه‌سانه‌ی‌ ئه‌م كاره‌یان كردووه‌ سزا بدرێن".

ژماره‌یه‌ك له‌ خۆپیشانده‌ران چه‌ندین لافیته‌یان به‌رزكردبووه‌وه‌‌و به‌ ده‌نگی‌ به‌رزه‌وه‌ هاواریان ده‌كرد‌و داوای‌ سزادانی‌ ئه‌نجامده‌رانی‌ ئه‌م كاره‌یان ده‌كرد.

جێی‌ ئاماژه‌یه‌ سه‌رنووسه‌ری‌ رۆژنامه‌كه‌ش دوێنێ‌ له‌لایه‌ن هێزێكی‌ ئه‌منییه‌وه‌ به‌هۆی‌ بڵاوكردنه‌وه‌ی‌ بابه‌ته‌كه‌وه‌ ده‌ستگیركرا.

هه‌ر له‌مباره‌یه‌وه‌ یه‌كێتی‌ زانایانی‌ ئیسلام‌و نوسینگه‌ی‌ شه‌ریعه‌تی‌ ئیسلامی‌ له‌ هه‌ولێر، رۆژی‌ یه‌كشه‌ممه‌، داوایان له‌ هاوڵاتیانی‌ هه‌رێمی‌ كوردستان كرد به‌مه‌به‌ستی‌ سازكردنی‌ خۆپیشاندنی‌ گه‌وره‌ بڕژێنه‌ سه‌ر شاقه‌مه‌كان، گه‌ر بێتو رۆژنامه‌ی‌ چرپه‌ دانه‌خرێت، هاوكات ده‌سته‌ی‌ شه‌رعی‌‌و داواكاریی‌ گشتی‌ داوای‌ یاساییان له‌سه‌ر رۆژنامه‌كه‌ تۆماركرد.

رۆژنامه‌كه‌ بابه‌تێكی‌ بڵاوكردۆته‌وه‌ كه‌ له‌لایه‌ن هه‌ڵمه‌ت گۆرانه‌وه‌ نووسراوه‌‌و تێیدا "سوكایه‌تی‌ به‌ خوا‌و پێغه‌مبه‌ری‌ خوا كراوه‌"،به‌پێی‌ ئه‌و هه‌واڵانه‌ی‌ كه‌ له‌مباره‌یه‌وه‌ بڵاوكراونه‌ته‌وه‌.
ق م(خ/ع)- ج پ

خۆپیشانده‌رانی‌ هه‌ولێر دوو پۆلیسیان برینداركرد‌و داوای‌ له‌كارلادانی‌ وه‌زیری‌ رۆشنبیریی‌‌و لاوان ده‌كه‌ن

jamal — Tue, 08 May 2012 13:54:00 GMT

هه‌ولێر/ئه‌سوات ئه‌لعێراق: خۆپیشانده‌رانی‌ شاری‌ هه‌ولێر، كه‌ ئه‌مڕۆ سێشه‌ممه‌، وه‌ك ناڕه‌زایه‌تییه‌ك دژ به‌ بڵاوكردنه‌وه‌ی‌ بابه‌تێك له‌ گۆڤاری‌ چرپه‌ رژاونه‌ته‌ سه‌ر شه‌قامه‌كان‌و له‌به‌رده‌م په‌ڕله‌مانی‌ كوردستاندا دوو پۆلیسیان به‌به‌رد برینداركرد، هه‌روه‌ها داوای‌ له‌كارلادانی‌ وه‌زیری‌ رۆشنبیریی‌‌و لاوانی‌ حكومه‌تی‌ هه‌رێمی‌ كوردستان ده‌كه‌ن.

خۆپیشانه‌ده‌ران هه‌وڵیاندا ده‌ست به‌سه‌ر باڵه‌خانه‌ی‌ په‌ڕله‌ماندا بگرن‌و به‌به‌ردهاویشتن هێرشیانكرده‌ سه‌ر خاڵه‌كانی‌ پشكنینی‌ ده‌وروبه‌ری‌ په‌ڕله‌مان‌و له‌ ئه‌نجامدا دوو پۆلیس برینداربوون، هاوكات به‌ردیان گرته‌ ئۆتۆمبێڵه‌كانی‌ هێزه‌ ئه‌منییه‌كان‌و زیانی‌ ماددیان پێگه‌یاند.

خۆپیشانده‌ره‌كان چه‌ندین لافیته‌یان به‌رزكردبووه‌وه‌‌و به‌ ده‌نگی‌ به‌رزه‌وه‌ هاواریان ده‌كرد‌و داوای‌ سزادانی‌ ئه‌وه‌ كه‌سانه‌یان ده‌كرد كه‌ بابه‌تێكیان له‌ رۆژنامه‌ی‌ چرپه‌ بڵاوكرۆدته‌وه‌‌و تێیدا تۆمه‌تبار ده‌كرێت به‌ "سوكایه‌تیكردن به‌ خواو پێغه‌مبه‌ر".

پێشتر یه‌كێتی‌ زانایانی‌ ئیسلام‌و نوسینگه‌ی‌ شه‌ریعه‌تی‌ ئیسلامی‌ له‌ هه‌ولێر، داوایان له‌ هاوڵاتیانی‌ هه‌رێمی‌ كوردستان كرد به‌مه‌به‌ستی‌ سازكردنی‌ خۆپیشاندنی‌ گه‌وره‌ بڕژێنه‌ سه‌ر شاقه‌مه‌كان، گه‌ر بێتو رۆژنامه‌ی‌ چرپه‌ دانه‌خرێت، هاوكات ده‌سته‌ی‌ شه‌رعی‌‌و داواكاریی‌ گشتی‌ داوای‌ یاساییان له‌سه‌ر رۆژنامه‌كه‌ تۆماركرد.

خۆپیشانده‌رانی‌ هه‌ولێر هێرشیانكرده‌ سه‌ر كه‌ناڵی‌ ئاسمانی‌ زاگرۆس

jamal — Tue, 08 May 2012 14:47:00 GMT

هه‌ولێر/ئه‌سوات ئه‌لعێراق: دوای‌ خۆپیشانده‌رانی‌ شاری‌ هه‌ولێر، كه‌ ئه‌مڕۆ سێشه‌ممه‌، وه‌ك ناڕه‌زایه‌تییه‌ك دژ به‌ بڵاوكردنه‌وه‌ی‌ بابه‌تێك له‌ گۆڤاری‌ چرپه‌ رژاونه‌ته‌ سه‌ر شه‌قامه‌كان‌و له‌به‌رده‌م په‌ڕله‌مانی‌ كوردستاندا دوو پۆلیسیان به‌به‌رد برینداركرد، هێرشیانكرده‌ سه‌ر باڵه‌خانه‌ی‌ كه‌ناڵی‌ ئاسمانی‌ زاگرۆس‌و به‌شێكیی‌ باڵه‌خانه‌كه‌یان سوتاند.

له‌مباره‌یه‌وه‌ په‌یامنیرَی‌ ئاژانسی‌(ئه‌سوات ئه‌لعێراق) له‌ناو خۆپیشاندانه‌كه‌ وتی‌ "خۆپیشانده‌ران دوای‌ ئه‌وه‌ی‌ له‌به‌رده‌م په‌ڕله‌ماندا كۆببوونه‌وه‌‌و به‌به‌ردبارانكردن په‌لاماری‌ ئۆتۆمبێڵه‌ ئه‌منییه‌كان‌و خاڵه‌كانی‌ پشكنینی‌ ده‌وروبه‌ری‌ په‌ڕله‌مانیاندا‌و دوو پۆلیسیان به‌ سوكی‌ برینداركرد، پاشان ئاراسته‌ی‌ خۆپیشاندانه‌كه‌یان گۆڕی‌ به‌ره‌و به‌رده‌م مزگه‌وتی‌ سه‌واف له‌ ناو شاری‌ هه‌ولێر، دواتر هه‌ڵیانكوتایه‌ سه‌ر كه‌ناڵی‌ ئاسمانی‌ زاگرۆس‌و به‌شێكی‌ باڵه‌خانه‌كه‌یان سوتان به‌ڵام به‌ زوویی‌ توانراوه‌ ئاگره‌كه‌ كۆنتڕۆل بكرێت.

سه‌نته‌ری‌ میترۆ :پێشێلكارییه‌كانی‌ سه‌ر رۆژنامه‌نوسان له‌ هه‌ولێر ژماره‌ی‌ پێوانه‌ییان تۆماركرد

jamal — Tue, 08 May 2012 20:06:00 GMT

هه‌ولێر/ئه‌سوات ئه‌لعێراق: سه‌نته‌ری‌ میترۆ بۆ داكۆكیكردن له‌رۆژنامه‌نووسان،‌رۆژی‌ سێشه‌ممه‌، ده‌ستدرێژییه‌كانی‌ سه‌ر رۆژنامه‌نووسان له‌شاری‌ هه‌ولێر ئیدانه‌ ده‌كات ‌و رایده‌گه‌یه‌نێت كه‌ جارێكی‌ تر رۆژنامه‌نوسان بونه‌وه‌ قوربانی‌ ژماره‌ یه‌كی‌ خۆپیشاندانه‌كان‌و ،پێشێلكارییه‌كانیش ژماره‌ی‌ پێوانه‌ییان تۆماكرد.

سه‌نته‌ری‌ ناوبراو له‌ راگه‌یه‌نراوێكیدا كه‌ وێنه‌یه‌كی‌ نێردراوه‌ بۆ ئاژانسی‌(ئه‌سوات ئه‌لعێراق)، رایگه‌یاندووه‌ كه‌ "ئه‌وه‌ی‌ ئه‌مڕۆ له‌كاتی‌ ڕووماڵكردنی‌ خۆپیشاندانه‌كانی‌ شاری‌ هه‌ولێردا به‌سه‌ر رۆژنامه‌نوساندا هات كارێكی‌ نه‌خوازراوه‌و مافی‌ مرۆڤ و ئازادی‌ رۆژنامه‌نوسی‌ له‌هه‌رێمی‌ كوردستان ده‌خاته‌ ژێر پرسیاره‌وه‌".

روونیشیكردۆته‌وه‌ كه‌ "له‌كاتی‌ ڕووماڵكردنی‌ خۆپیشاندانه‌كاندا 12 حاڵه‌تی‌ پێشێلكاری‌ تۆماركراون كه‌ تیایاندا ده‌یان پێشێلكاری‌ جۆراوجۆر له‌هه‌وڵی‌ سوتاندن و ده‌ستگیركردن و لێدان و ڕێگری‌ و سوكایه‌تی‌ و برینداركردن و ده‌ستبه‌سه‌راگرتنی‌ كه‌لوپلی‌ رۆژنامه‌وانی‌ و ئوتومبێلی‌ ڕۆژنامه‌نوسان به‌رامبه‌ر به‌ 20 ڕۆژنامه‌نوس و دوو كه‌ناڵی‌ ڕاگه‌یاندن تۆماكراون، ئه‌نجامده‌رانی‌ ئه‌م پێشێلكارییانه‌ش هێزه‌كانی‌ ئاسایشی ناوخۆ و به‌شداربوانی‌ خۆپیشاندانه‌كان بووه‌".

به‌پێی‌ راگه‌یه‌نراوه‌كه‌ سه‌نته‌ری‌ ناوبراو داوی‌ا له‌حكومه‌تی‌ هه‌رێمی‌ كوردستان كردووه‌ كه‌" له‌ ئاستی‌ به‌رپرسیارێتی‌ دا بێت و سزای‌ ئه‌و كه‌س و لایه‌نانه‌ بدات كه‌ پێشێلكارییان به‌رامبه‌ر به‌ ڕۆژنامه‌نوسان كردووه‌".

جێی‌ ئاماژه‌یه‌ ئه‌مڕۆ سێشه‌ممه‌، خۆپیشاندانه‌كه‌‌ له‌ شاری‌ هه‌ولێر دژ به‌ بڵاوكردنه‌وه‌ی‌ بابه‌تێك له‌ رۆژنامه‌ی‌ چرپه‌ ئه‌نجامدرا‌و به‌هۆی‌ ئه‌وه‌ی‌ بابه‌ته‌كه‌ تۆمه‌تبار ده‌كرێت به‌ "سوكایه‌تیكردن به‌ خواو پێغه‌مبه‌ر".

ج پ(ب)